The Phnom Penh Post Search

Search form

Logo of Phnom Penh Post newspaper Phnom Penh Post - តូយ៉ូតា​ជ្រើស​គំនូរ​រថយន្ដ​របស់កុមារ​ក្នុង​ក្ដី​ស្រមៃ ទៅ​ប្រកួត​នៅលើ​ឆាក​អន្ដរជាតិ​




តូយ៉ូតា​ជ្រើស​គំនូរ​រថយន្ដ​របស់កុមារ​ក្នុង​ក្ដី​ស្រមៃ ទៅ​ប្រកួត​នៅលើ​ឆាក​អន្ដរជាតិ​

Content image - Phnom Penh Post
​កុមារ​ចូល​រួម​ប្រកួត​ស្នាដៃគំនូរ​រថយន្ដ​ក្នុង​ក្ដីស្រមៃ​។ ឈឹម ស្រីនាង

តូយ៉ូតា​ជ្រើស​គំនូរ​រថយន្ដ​របស់កុមារ​ក្នុង​ក្ដី​ស្រមៃ ទៅ​ប្រកួត​នៅលើ​ឆាក​អន្ដរជាតិ​

ភ្នំពេញ: រំលេច​ចេញ​ពី​គំនិត​គិត​ដល់​រថយន្ដ​ក្នុង​ក្ដី​ស្រមៃ​ កុមារ​កម្ពុជា​អាច​បង្ហាញ​ស្នាដៃគំនូរ​របស់​ខ្លួន​តាម​រយៈ​កម្ម​វិធី​ប្រកួត​គំនូរ​ថ្នាក់​ជាតិ និង​​ពិភព​លោក​ដែល​រៀបចំ​ដោយ​ក្រុម-ហ៊ុន​តូយ៉ូតា (ខេ​ម​បូ​ឌា) ដើម្បី​​ជ្រើស​យក​ម្ចាស់​ជើង​ឯក​តាម​កម្រិតអាយុ​នីមួយ​ៗ​ដណ្ដើម​ពាន​នៅ​ឯ​បរទេស។​

ក្រោម​ប្រធាន​បទ «​គូរគំនូរ​រថយន្ដ​ក្នុង​ក្តី​ស្រមៃ​សម្រាប់​ថ្ងៃ​អនាគត» សម្រាប់ការ​ប្រកួត​លើកទី ៦ ​កុមារអាយុក្រោម ១៦ ​ឆ្នាំ ​ជាង ៤០ នាក់​ កាលពីថ្ងៃទី ២១ ​ខែវិច្ឆ​កា កន្លងទៅ​។

គួរបញ្ជាក់​ថា ការ​ប្រកួត​ឆ្នាំ ២០១៤-២០១៥ ​ក្រុមហ៊ុន តូយ៉ូ​តា (ខេមបូឌា) ទទួល​បាន​រូបគំនូរ​ក្នុង​ប្រទេស​សរុប ៩០០ ផ្ទាំង ដែលប្រមូល​តាម​សាលា​ឯកជនផ្សេងៗ​ក្នុង​ក្រុងភ្នំពេញ ​និង​​បណ្តា​​ខេត្ត​នានា ​ដូចជា ​សៀមរាប និង​បាត់​ដំបង ហើយ​រូប​ទាំង​អស់​​ត្រូវ​បាន​ឆ្លងកាត់​ការ​ជ្រើសរើស និងជម្រុះ​ ២ លើក ដើម្បី​ចម្រាញ់​​យក​រូបគំនូរ​ដែល​ស្រស់​ស្អាត និង​មានន័យ​ល្អ​ ៩ ផ្ទាំង​​ជា​​ជយ​លាភីថ្នាក់ជាតិ។

បន្ទាប់មក​​រូប​គំនូរ​ទាំង ៩ ផ្ទាំង​នេះត្រូវបាន​បញ្ចូនទៅ​ប្រទេស​ជប៉ុន ដើម្បី​ចូលរួម​ប្រកួតប្រជែង​ជាមួយ​រូប​គំនូរ​​ ៨ ប្រទេស​ផ្សេង​ទៀត​។

ការ​ប្រកួត​ឆ្នាំនេះ​ក៏​មិន​ខុស​គ្នា​ពីឆ្នាំមុនៗដែរ ដោយកុមារ​អាយុ​ក្រោម ១៦ ឆ្នាំទាំង​អស់​អាច​ផ្ញើគំនូរ​ដែល​ខ្លួន​បាន​គូរ​នៅ​​ផ្ទះ​​មកកាន់​ក្រុមហ៊ុន​តូយ៉ូតា (ខេម​បូ​ឌា) ដើម្បី​ចូលរួម​ប្រកួតប្រជែង​ ក្នុង​ករណី​មិនបាន​ចូលរួម​​ប្រកួត​ផ្ទាល់ ។

លោក ម៉ាសា​​អា​គិ កា​វ៉ា​បាតា អគ្គនាយក​ក្រុម​ហ៊ុន​តូយ៉ូតា (ខេ​ម​បូ​ឌា) ​ថ្លែងថា៖ «កម្មវិធី​គំនូរ​រថយន្ត​តូយ៉ូតា​ក្នុង​ក្តី​ស្រមៃ​សម្រាប់​ថ្ងៃ​អនាគត ​ត្រូវ​បាន​​រៀប​ចំឡើង​​ក្នុង​គោលបំណង​ផ្តល់​ឱកាស​​ឲ្យក្មួយៗ​ជំនាន់​ក្រោយ​បាន​ប​ង្ហាញ​នូវ​សមត្ថភាព ក៏ដូចជា​គំនិត​ច្នៃប្រឌិត​ក្នុង​ការ​គូរគំនូរ​ឲ្យ​បាន​ស្អាត​ទៅតាម​ក្តី​ស្រមៃ​របស់ខ្លួន ព្រម​ទាំង​ដើម្បី​ចូល​រួមលើកកម្ពស់​ សារៈ​សំខាន់​សិល្បៈ​គំនូរ​»។ ​

ប្រភព​ពី​តូយ៉ូតា បាន​បន្ដ​ថា ចំពោះ​​លក្ខខណ្ឌ​នៃ​អាយុ​ដែល​អាចចូលរួម​ប្រកួតប្រជែង​បាន​មាន​​បី​ប្រភេទ គឺ​ក្រោមអាយុ ៨ ឆ្នាំ ពី​អាយុ ៨ ឆ្នាំ​ដល់ ១១ ឆ្នាំ ពី​អាយុ ១២ ឆ្នាំ​ដល់ ១៥ ឆ្នាំ ហើយ​កាល​បរិច្ឆេ​ទ​ឈប់​ទទួលគំនូរ​គឺ​នៅ​ថ្ងៃទី ៣១ ខែមករា​ឆ្នាំ ២០១៦។

ចំពោះ​ជយលាភី​ថ្នាក់​ជាតិ​នឹង​ត្រូវ​ជ្រើសរើស ៣​ នាក់តាម​ប្រភេ​ទ​អាយុ​នីមួយៗ ហើយ​គំនូរ​ដែល​ទទួលជយ​លាភី​ថ្នាក់​ជាតិទាំង​នោះ​ ​តូយ៉ូតា (ខេមបូឌា) នឹង​ប​ញ្ជូន​ទៅ​ប្រកួត​​ថ្នាក់​ពិភពលោក​នៅប្រទេស​ជប៉ុន។ ក្រុមហ៊ុន​នឹង​ប្រកា​សល​ទ្ធ​ផលជយលាភី​ថ្នាក់ជាតិ​នៅ​ខែមីនា ​ឆ្នាំ ២០១៦ និង​ជយលាភី​​ថ្នាក់​ពិភពលោក នៅក្នុង​​ខែសីហា​ ឆ្នាំ ២០១៦ ខាងមុខ​៕

អត្ថបទគួរចាប់អារម្មណ៍