The Phnom Penh Post Search

Search form




Logo of Phnom Penh Post newspaper Phnom Penh Post - តូយ៉ូតា ​បើក​ការប្រកួត​គំនូរ​រថយន្ត​ ក្នុងក្ដី​ស្រមៃ ថ្ងៃ​អនាគត​ឆ្នាំ ២០១៧




តូយ៉ូតា ​បើក​ការប្រកួត​គំនូរ​រថយន្ត​ ក្នុងក្ដី​ស្រមៃ ថ្ងៃ​អនាគត​ឆ្នាំ ២០១៧

Content image - Phnom Penh Post
ជយលាភីឆ្នាំ ២០១៦ បានទៅ​លើក្មេងស្រី​ ប៊ុន រក្សា អាយុ ១៣ ឆ្នាំ និងកុមារី ផាត អេលីនកនិកា អាយុ ៦ ឆ្នាំ។ ឈឹម ស្រីនាង

តូយ៉ូតា ​បើក​ការប្រកួត​គំនូរ​រថយន្ត​ ក្នុងក្ដី​ស្រមៃ ថ្ងៃ​អនាគត​ឆ្នាំ ២០១៧

ភ្នំពេញ: ក្នុង​ឯកសណ្ឋាន​អាវយឺត​ពណ៌​ផ្កាឈូក កុមារ និងក្មេង​ជំទង់​ប្រុស​ស្រីអាយុ​ក្រោម ១៦ ឆ្នាំ​ជាច្រើន​នាក់កំពុង​អង្គុយ​ផ្ចិតផ្ចង់​គូរគំនូរ​រថយន្ត​នៃក្ដី​ស្រមៃ​របស់ខ្លួន​សម្រាប់​ថ្ងៃអនាគត នៅ​ផ្សារទំនើប​អ៊ីអនម៉ល កាលពី​ថ្ងៃសុក្រ​កន្លងទៅនេះ។

នេះគឺជា​ការប្រកួត «គូរគំនូរ​រថយន្ត​តូយ៉ូតា​ក្នុងក្តី​ស្រមៃ​សម្រាប់​ថ្ងៃអនាគត» ដែល​រៀបចំ​ឡើង​ដោយ​ក្រុមហ៊ុន តូយ៉ូតា (ខេមបូឌា) ឆ្នាំ ២០១៧ ស្របនឹង​ការប្រគល់​ជយលាភី​គូរគំនូរ​ថ្នាក់​ពិភពលោក​ឆ្នាំ ២០១៦ ដល់កុមារី​ឈ្មោះ ផាត អេលីនកនិកា អាយុ ៦ ឆ្នាំ ដែលគូរ​គំនូរ ឡាន​មិត្តភាព (Friendship car) ទទួលបាន​ពានរង្វាន់​ពិសេស (អាគីអូ តូយ៉ូតា) និងកុមារី ប៊ុន រក្សា អាយុ ១៣ ឆ្នាំ គូរគំនូរ​ឡាននៃ​ការចងចាំ (Memory car) ទទួលបាន​ពានរង្វាន់ ដែលស្អាត​បំផុត។

លោក ហ៊ីរ៉ូយូគី អ៊ីតុ អគ្គនាយក​ក្រុមហ៊ុន តូយ៉ូតា (ខេមបូឌា) បានឲ្យ​ដឹងថា៖ «ការគូរគំនូរ​រថយន្ត​តូយ៉ូតា​ក្នុងក្តី​ស្រមៃ​សម្រាប់ថ្ងៃ​អនាគត កាលពី​ឆ្នាំ ២០១៥-២០១៦ កន្លងទៅ​ដែល​ក្រុមហ៊ុន​តូយ៉ូតា (ខេមបូឌា) ទទួលបាន​រូបគំនូរ​សរុប ក្នុងប្រទេស​ចំនួន ៨២៣ ផ្ទាំង ដែល​ប្រមូល​បានពី​ការប្រកួត​ប្រជែង​គូរ​នៅតាម​សាលា​ឯកជន​ផ្សេងៗ ក្នុង​ទីក្រុង​ភ្នំពេញ​ក៏ដូចជា​តាមបណ្តា​ខេត្ត​មានខេត្ត​សៀមរាប និង​បាត់ដំបង​ជាដើម»។

[IMG]

រូបគំនូរ​ទាំងអស់​ត្រូវបាន​ឆ្លងកាត់​ការវាយតម្លៃ ជ្រើសរើស និងជម្រុះ​ចំនួន ២ លើក ទើបចម្រាញ់​យក​រូបគំនូរ​ដែល​ស្រស់ស្អាត និងមាន​អត្ថន័យ​ល្អ ចំនួន ៩ ផ្ទាំង សម្រាប់់​ជយលាភី​ថ្នាក់ជាតិ។ បន្ទាប់មក​រូបគំនូរ​ទាំង ៩ ផ្ទាំង​ត្រូវបាន​បញ្ជូនទៅ​ប្រទេស​ជប៉ុន ដើម្បី​ចូលរួម​ប្រកួត​ជាមួយនឹង​រូបគំនូរ​ពីបណ្តា​ប្រទេស​ផ្សេងៗទៀត​ទូទាំង​សកលលោក។

ចំពោះប្អូនៗ​ដែល​មិនបាន​ចូលរួម​ប្រកួតប្រជែង​ដោយផ្ទាល់​នៅផ្សារ​ទំនើប​អ៊ីអនម៉ល​ក៏អាច​ផ្ញើគំនូរ​ដែលបាន​គូរ​នៅផ្ទះ​មក​ចូលរួម​ប្រកួត​ប្រជែង​ផងដែរ។

កាលបរិច្ឆេទ​ឈប់​ទទួល​គំនូរគឺ​នៅថ្ងៃទី ៣១ ខែមករា ឆ្នាំ ២០១៧។ លក្ខខណ្ឌ​នៃប្រភេទ​អាយុ​ដែលអាច​ចូលរួម​ប្រកួត​ប្រជែង​បាន​មានដូចជា: ក្រោម​អាយុ ៨ ឆ្នាំ, ពីអាយុ ៨ឆ្នាំ ដល់ ១១ ឆ្នាំ, និងពីអាយុ ១២ឆ្នាំ ដល់ ១៥ ឆ្នាំ។ ជយលាភី​ថ្នាក់ជាតិ នឹងត្រូវ​ជ្រើសរើស​ចំនួន ៣ នាក់នៃ​ប្រភេទ​អាយុនីមួយៗ គំនូរជាប់​ជយលាភី​ថ្នាក់ជាតិ នឹងត្រូវ​បញ្ជូនទៅ​ចូលរួម​ប្រកួត​ថ្នាក់​ពិភពលោក​ឯប្រទេស​ជប៉ុន។

ចំពោះ​ជយលាភី​ថ្នាក់​ពិភពលោក​មាន មេដាយមាស មេដាយប្រាក់ មេដាយសំរិទ្ធ រង្វាន់​ចុងក្រោយ និងរង្វាន់​ពិសេស។ អ្នកឈ្នះ​មេដាយ នឹងត្រូវ​ទទួលបាន​នូវដំណើរ​ទស្សនកិច្ច​ទៅកាន់​ប្រទេស​ជប៉ុន ជាមួយ​អាណាព្យាបាល ២ រូប។ ការប្រកាស​លទ្ធផល​ជយលាភី​ថ្នាក់ជាតិ​នឹងត្រូវ​ធ្វើឡើង​នៅខែ មីនា ឆ្នាំ ២០១៧ រីឯ​ជយលាភី​ថ្នាក់​ពិភពលោក​ក្រុមហ៊ុន​នឹងប្រកាស នៅ​ខែសីហា ឆ្នាំ ២០១៧៕

អត្ថបទគួរចាប់អារម្មណ៍