ភ្នំពេញៈ ដោយសារតែមិនចង់ឲ្យវិស័យសិល្បៈបុរាណទម្រង់ល្ខោននិយាយដែលមានប្រជាប្រិយភាពតាំងពីទសវត្សរ៍ទី ៦០-៧០ កាន់តែមានភាពស្ងាត់ជ្រងំហើយក្មេងៗជំនាន់ក្រោយនេះសឹងតែមិនសូវបានស្គាល់ និងឃើញផងនោះទើបក្រុមសិល្បករ-ការិនីប្រមាណ ៧ រូបខិតខំលះបង់ធនធានផ្ទាល់ក្នុងការរៀបចំឲ្យមានការសម្តែងទម្រង់សិល្បៈល្ខោននិយាយបានចំនួនលើកទី ៣ នៅក្នុងឆ្នាំនេះ។
ខណៈតាំងពីសល់ប៉ុន្មានថ្ងៃខិតជិតទៅរកការរៀបចំសម្តែងល្ខោននិយាយរឿង «វង្សត្រកូលកម្សត់» ដែលជាប្រភេទល្ខោននិយាយបែបទស្សនៈវិទ្យាសាស្ត្រនិយម និងទស្សនៈពុទ្ធសាសនានិយមនិពន្ធដោយលោកសាស្ត្រាចារ្យ ហង្ស ធុនហាក់ ក្នុងទសវត្សរ៍ទី ៦០ ក៏ស្រាប់តែមានការបង្ហោះផ្សព្វផ្សាយពីព័ត៌មាន និងប្រកាសរកគាំទ្រតាមគេហទំព័រខ្លួនថា៖ «តោះ!នាំលោកយាយលោកតា ម៉ាក់ប៉ា បងប្អូន មិត្តភក្តិ មកមើលល្ខោននិយាយទាំងអស់គ្នា ដើម្បីចូលរួមលើកស្ទួយវិស័យវប្បធម៌ខ្មែរ និងសិល្បៈខ្មែរថែមទាំងបានយល់ដឹងពីទម្រង់នៃល្ខោននិយាយផងដែរ។ ការសម្តែងឆ្នាំនេះគឺរឿង «វង្សត្រកូលកម្សត់» ដែលនឹងប្រព្រឹត្តទៅនៅថ្ងៃ ៣ រោច និង ៤ រោច ខែផល្តុន ឆ្នាំច សំរឹទ្ធិស័ក ព.ស ២៥៦២ ដែលត្រូវនឹងថ្ងៃទី ២៣ និងទី ២៤ ខែមីនា ឆ្នាំ ២០១៩ នៅឯសាលមហោស្រពចតុមុខ»។
ការសម្តែងល្ខោននិយាយនេះបានប្រារព្ធធ្វើលើកទី ៣ ហើយដោយរាប់ទាំងឆ្នាំ ២០១៩ នេះ ខណៈការរៀបចំលើកដំបូងនៅឆ្នាំ ២០១៧ ដោយសម្តែងរឿង «តៃកុងហំ» ដែលដកស្រង់ចេញពីអក្សរសិល្ប៍ខ្មែរគឺរឿង «ថៅកែចិត្តចោរ» នៅឯសាលមហោស្រពចតុមុខ និងលើកទី ២ ឆ្នាំ ២០១៨ នៅមជ្ឈមណ្ឌលសហប្រតិបត្តិការកម្ពុជា-ជប៉ុនក្នុងសាច់រឿងដដែល។
កញ្ញា គាត សុភី ជាប្រធានក្រុមអ្នកស្ម័គ្រចិត្តនៃក្រុមអ្នករៀបចំការសម្តែងល្ខោននិយាយនេះបានបញ្ជាក់ថា៖ «ល្ខោននិយាយដែលមានភាពល្បីល្បាញខ្លាំងពេញផ្ទៃប្រទេសនៅក្នុងនាទសវត្សរ៍ឆ្នាំ ៦០ រឿង «វង្សត្រកូលកម្សត់» ស្នាដៃនិពន្ធ ល្បីឈ្មោះ លោក ហង្ស ធុនហាក់ ត្រូវបានអង្គការសកម្មភាពសិល្បៈ សហការជាមួយសាលាមធ្យមសិក្សាវិចិត្រសិល្បៈដើម្បីរៀបចំសម្ដែងសាជាថ្មីចែកជូនបងប្អូនខ្មែរជាពិសេសយុវជនជំនាន់ក្រោយបានចូលទស្សនានៅសាលមហោស្រពចតុមុខ។ ល្ខោននេះបានដកស្រង់ចេញពីស្នាដៃអក្សរខ្មែរបែបទស្សនៈវិទ្យាសាស្ត្រនិយម និងទស្សនៈពុទ្ធសាសនានិយមមានចំណងជើងថា «រឿងព្រះអាទិត្យរះហើយ» របស់អ្នកនិពន្ធខាងលើ»។
គួរបញ្ជាក់ថាការសម្តែងល្ខោននិយាយតាំងពីរៀបចំលើកដំបូងមកដល់លើកទី ៣ នេះពុំសូវមានការជួយឧបត្ថម្ភគាំទ្រពីសំណាក់ខាងក្រុមហ៊ុនស្ពនស័រនានា ឲ្យបានច្រើនកុះករនោះឡើយទើបតម្រូវឲ្យមានការលក់សំបុត្រដើម្បីបានប្រាក់មកចាត់ចែងលើការចំណាយផ្សេងៗក្នុងការរៀបចំនេះគឺសំបុត្រ ១ តម្លៃ ២ ម៉ឺនរៀល។ នៅសល់តែ ២-៣ ថ្ងៃទៀតប៉ុណ្ណោះនឹងដល់ការប្រារព្ធហើយ ខណៈក្តីសង្ឃឹមប្រាក់បានពីការលក់សំបុត្រសម្រាប់ចាត់ចែងលើការចំណាយជូនសិល្បករ-ការិនីជើងចាស់ទាំង ៧ រូបនោះហាក់នៅមានសម្ទុះយឺតៗនៅឡើយផងដែរ។
កញ្ញា គាត សុភី បានលើកឡើងដែរថា៖ «ចាប់តាំងពីយើងបានដំឡើងថ្លៃសំបុត្រ ១ ដុល្លារបន្ថែមពីតម្លៃឆ្នាំមុន ៤ ដុល្លារ គឺ ៥ ដុល្លារសម្រាប់ឆ្នាំនេះមក ហាក់ដូចជាមានការធ្លាក់ចុះសម្ទុះនៃការជាវសំបុត្រដើម្បីចូលរួមគាំទ្រការសម្តែងល្ខោននិយាយនៅក្នុងឆ្នាំនេះគួរឲ្យកត់សម្គាល់តែម្តង មិនដឹងថា មូលហេតុមកពីអ្វី»៕