.jpg)
ទម្រង់សិល្បៈល្ខោនខោល និងសិល្បៈសៀក មានបង្រៀននៅសាលាមធ្យមវិចិត្រសិល្បៈ។ រូបថត សាលាមធ្យមវិចិត្រសិល្បៈ
ភ្នំពេញៈ ទោះបីជាការប្រឡងបញ្ចប់ការសិក្សាជំនាញសិល្បៈក្តី តែជាផ្នែកមួយជួយការពារ និងអភិរក្សវប្បធម៌ជាតិ ដើម្បីបណ្តុះស្មារតីយុវជនជំនាន់ក្រោយឲ្យស្រឡាញ់សិល្បៈខ្មែរ តាមរយៈការសម្តែងទស្សនីយភាព របាំប្រពៃណីខ្មែរច្រើនទម្រង់របស់ក្រុមសិស្សានុសិស្ស ដែលមានឧបនិស្ស័យផ្នែកសិល្បៈ។
រយៈពេល ៣ ថ្ងៃ គឺចាប់ពីថ្ងៃទី ៨-១០ ខែ សីហា ឆ្នាំ ២០១៩ ខាងមុខនេះ ក្រុមសិស្សានុសិស្សនៃសាលាមធ្យមវិចិត្រសិល្បៈនៃក្រសួងវប្បធម៌វិចិត្រសិល្បៈ នឹងបើកការប្រឡងបញ្ចប់ការសិក្សាតាមជំនាញទាំង ៥ ដូចជាជំនាញតូរ្យតន្ត្រី របាំ ល្ខោន សៀក និងសិល្ប:សូនរូប ជាដើម នៃឆ្នាំសិក្សា ២០១៨-២០១៩។ ការសម្តែងសិល្បៈទស្សនីយភាព របាំបុរាណ ប្រពៃណី ល្ខោនខោល ល្ខោនបាសាក់ ល្ខោននិយាយ យីកេ សៀក ចម្រៀងបុរាណ-សម័យ តន្រ្តីបុរាណ-សម័យ និងទម្រង់ផ្សេងៗទៀត ព្រមទាំងមានតាំងពិព័រណ៍ស្នាដៃផ្នែកវិចិត្រកម្ម គំនូរបុរាណ គំនូរផ្សាយ គំនូរលម្អនៅលើក្រណាត់ ចម្លាក់ពុម្ព ចម្លាក់ប្រាក់ ចម្លាក់ស្មិត ចម្លាក់ឈើ ខ្មុកស្មាច់ កុលាលភាជន៍ ពីសិស្សសាលាមធ្យមវិចិត្រសិល្បៈ រយៈពេល ៣ ថ្ងៃ ថ្ងៃទី ៨-១០ ខែ សីហា ឆ្នាំ ២០១៩ ចាប់ពីម៉ោង ៨ ព្រឹក ដល់ម៉ោង ៥ រសៀល នៅសាលសម្តែងសាលាមធ្យមវិចិត្រសិល្បៈ បឹងបាយ៉ាប។
បើតាមលោក ប៊ុន ហៀង ដែលជានាយករងនៃសាលាមធ្យមវិចិត្រសិល្បៈបានឲ្យដឹងពីការប្រឡងបញ្ចប់ជំនាញសិស្សានុសិស្សទាំង ៥ ជំនាញ តាមរយៈការសម្តែងផ្ទាល់ទៅតាមមុខជំនាញរៀងខ្លួន បានឲ្យដឹងត្រួសៗថា៖ «នៅថ្ងៃដំបូងគឺថ្ងៃទី ៨ ខែសីហា ចាប់ពីម៉ោង ៨ កន្លះទៅ នឹងមានការប្រឡងសម្តែងជំនាញរបាំបុរាណ ការសម្តែងល្ខោនយីកេ និងបាសាក់ សម្តែងសៀក និងរបាំប្រពៃណី ដោយប្រើពេលចំនួន ២ ម៉ោង សម្រាប់សិស្សានុសិស្សនៃជំនាញទាំងនេះ សម្តែងជូនដល់រដ្ឋមន្រ្តីក្រសួងវប្បធម៌ និងវិចិត្រសិល្បៈ ដែលលោកជំទាវ នឹងអញ្ជើញចូលរួម។ លុះពេលរសៀលនឹងមានការសម្តែងទម្រង់សិល្បៈនានា ជាហូរហែ ដែលមានរយៈពេលយូរតាមសាច់រឿង ឬខ្លឹមសារនៃការសម្តែងរបស់សិស្សរហូតដល់ថ្ងៃចុងក្រោយតែម្តង»។
ទម្រង់របាំសម្តែងជាក្រុមនៅសាលាមធ្យមវិចិត្រសិល្បៈ។ រូបថត សាលាមធ្យមវិចិត្រសិល្បៈ
តាមសេចក្ដីជូនដំណឹងរបស់សាលាកន្លងមក ឲ្យដឹងថា ជំនាញផ្នែកសិល្បៈ ដែលបើកឲ្យសិក្សា ឯកទេស របាំបុរាណ ខោល ចម្រៀងបុរាណ តន្ត្រីបុរាណ និងតន្ត្រីសម័យចំពោះសិស្សរៀនចប់ថ្នាក់ទី៣ ឬទី៤ សាលាចំណេះដឹងទូទៅ មានអាយុ ៩ ឆ្នាំ ឬ ១០ ឆ្នាំ។ ឯកទេសរបាំប្រពៃណី សៀក តន្ត្រីសម័យ ស្រឡៃ កុងត្របាស ត្រុំប៉ែត ហ្លុត សាក់សូ ក្លារីណែត យីកេ និងបាក់សាក់ ចំពោះសិស្សរៀនចប់ថ្នាក់ទី៥ ឬទី៦ មានអាយុ ១១ ឆ្នាំ ដល់ ១៣ ឆ្នាំ។
ចំណែកឯកទេសចម្រៀងអាយ៉ៃ ចម្រៀងជាពួក ចាប៉ីដងវែង ល្ខោននិយាយ និងសិល្បៈសូនរូប សម្រាប់សិស្សរៀនចប់ថ្នាក់ទី ៧ មានអាយុ ១៣ ឆ្នាំ ឬ ១៤ ឆ្នាំ។
បច្ចុប្បន្ននេះ ការរៀនជំនាញសិល្បៈអាចមានទីផ្សារខ្ពស់ ទាំងបុរាណ ឬសម័យ ក្រោយរៀនចប់អាចប្រកបអាជីពជាអ្នកសិល្បៈបាន និងមានឱកាសប្រឡងចូលក្របខ័ណ្ឌមន្ត្រី នៅក្រសួងវប្បធម៌ និងវិចិត្រសិល្ប:- ក្រសួងព័ត៌មាន និងធ្វើជាគ្រូនៅឯក្នុងសាលាមធ្យម និងរៀនបន្តនៅសាកលវិទ្យាល័យភូមិន្ទវិចិត្រសិល្បៈ ៕
