.jpg)
សិល្បៈសហសម័យដំឡើងមានឈ្មោះថា «មករបព៌ត» មានប្រវែង ៩០ ម៉ែត្ររបស់សិល្បករ លាង ស៊ីកន។ រូបថត សហការី
ភ្នំពេញ៖ នៅថ្ងៃទី ៧ ខែ មីនា ឆ្នាំ ២០២០ ខាងមុខនេះ ស្ថានទូតបារាំងប្រចាំនៅប្រទេស កម្ពុជា នឹងបើកទ្វារទទួលសាធារណជនឲ្យចូលទស្សនាដោយសេរី ក្នុងឱកាសតាំងពិព័រណ៍ស្នាដៃសិល្បៈដំឡើងនានាឈ្មោះថា «ដំណើរត្រាច់ចរសិល្បៈ» ក្នុងឧទ្យានស្ថានទូតបារាំងម្តុំគល់ស្ពានជ្រោយចង្វារ។
តាមសេចក្តីប្រកាសព័ត៌មានបានឲ្យដឹងថា សិល្បករល្បីៗទាំងខ្មែរ និងបារាំងចំនួន ៩ រូប ដោយក្នុងនោះមានខ្មែរ ៨ រូប និងបារាំងម្នាក់ ត្រូវស្ថានទូតអញ្ជើញឲ្យបង្កើតស្នាដៃសិល្ប:តាមការស្រមើស្រមៃរៀងៗខ្លួន ដើម្បីដាក់បង្ហាញជូនទៅដល់មហាជននូវបណ្តុំស្នាដៃពិព័រណ៍មានឈ្មោះ «ដំណើរត្រាច់ចរសិល្បៈ» នៅក្នុងឆ្នាំ ២០២០ នេះ មានលោក អ៊ុក ជឹមវិចិត្រ លោក ក្រេហ្កូរី ហ្គោសឡាំង លោក រៀម មុនីស៊ីឡុង លោក ម៉ក់ រ៉េមីស្សា លោក លាង ស៊ីកន លោក ស្រី បណ្តូល លោក មាស សុឃន លោក ពេជ្រ សុភាព និងលោក ទិត្យ វាសនា។
ជាមួយនឹងរុក្ខជាតិចម្រុះពណ៌មានដើមឈើធំៗ មានម្លប់ត្រឈឹងត្រឈៃ លាយឡំនឹងស្នាដៃសិល្ប:ទាំងនោះ នឹងដាក់តាំងនៅតាមទីកន្លែងផ្សេងៗគ្នាក្នុងឧទ្យានហាក់ដូចជាកំពុងបង្កើតបានកិច្ចសន្ទនាបែបមនោសញ្ចេតនាមួយយ៉ាងស្ងប់ស្ងាត់ជាមួយធម្មជាតិផងដែរ។ នៅទីនេះ ក៏ជាកន្លែងចងចាំនៃប្រវត្តិសាស្រ្តកម្ពុជា និងជាលំហបៃតងដ៏ធំជាងគេមួយ នៅរាជធានីភ្នំពេញដែលកំពុងអភិវឌ្ឍន៍ឥតឈប់ឈរ ខណៈឧទ្យានស្ថានទូតបារាំង តែងទាញចំណាប់អារម្មណ៍របស់សិល្បករនានាផងដែរ។
ស្នាដៃរបស់សិល្បករលោក ក្រេហ្កូរី ហ្គោសឡាំង។ រូបថត សហការី
ជាមួយនឹងទេពកោសល្យផ្សេងៗគ្នា របស់ក្រុមសិល្បករដែលភាគច្រើន បានជ្រើសរើសយកដើមឈើដើម្បីផ្សារភ្ជាប់នឹងស្នាដៃសិល្បៈនោះ ក៏ធ្វើឲ្យលោកស្រី អេវ៉ា ង្វៀនប៊ិញ ជាឯកអគ្គរដ្ឋទូតបារាំងប្រចាំកម្ពុជាយល់ឃើញថា ក្រៅពីលក្ខណ:លម្អ ដើមឈើទាំងនេះ ក៏ក្លាយទៅជាតួអង្គពិតៗ នៃពិព័រណ៍នេះផងដែរ។ លោកស្រីមានប្រសាសន៍ថា៖ «តាមរយៈការរចនារបស់សិល្បករ ដើមឈើទាំងនេះ ក្លាយជាសភាវៈម៉្យាង ប្រកបដោយរូបឆោមលោមពណ៌ល្អ ដែលយើងត្រូវថែរក្សាផងជាទីជម្រក និងសាក្សីនៃការចងចាំផង។ ដើមឈើទាំងនេះ ហាក់ដូចជាវត្ថុនឹងថ្កល់ដែលផ្តល់អត្ថន័យដល់ជីវិត»។
ព្រឹតិ្តការណ៍នេះ នឹងបើកឲ្យសាធារណជនចូលទស្សនាដោយសេរីពុំចាំបាច់ចុះឈ្មោះជាមុនទេ ប៉ុន្តែអាហារ ភេសជ្ជៈ (លើកលែងទឹក) និងកាបូបធំៗ មិនត្រូវបានអនុញ្ញាតឲ្យនាំយកចូលទៅតាមខ្លួនឡើយ។ សម្រាប់ម៉ោងទស្សនាស្នាដៃរបស់សិល្បករនៅក្នុងបរិស្ថានដ៏ស្រស់បំព្រង នៅថ្ងៃសៅរ៍ ទី ៧ ខែមីនា ចាប់ពីម៉ោង ៨ ព្រឹក ដល់ម៉ោង ៤ រសៀល៕
ស្នាដៃរបស់សិល្បករ រៀម មុនីស៊ីឡុង។ រូបថត សហការី
