ភ្នំពេញ៖ អង្ករ ស្រូវ ស្រែ មានតួនាទីមូលដ្ឋានគ្រឹះដ៏សំខាន់សម្រាប់វប្បធម៌ខ្មែរតាំងពីយូរលង់ណាស់មកហើយ ខណៈការដាំដុះ ដំណាំស្រូវ ជាការងាររវល់ដ៏ចម្បងរបស់ប្រជាកសិករ ដើម្បីចិញ្ចឹមបីបាច់ដល់ជីវិតយើងទាំងអស់គ្នារហូតសព្វថ្ងៃនេះ វាលស្រែនៅតែគ្របដណ្តប់ច្រើននៅលើដីកសិកម្ម។
នៅល្ងាចថ្ងៃសុក្រ ទី ១១ ខែ តុលា ឆ្នាំ ២០១៩ ស្អែកនេះនឹងមានការបង្ហាញបាឋកថារយៈពេលកន្លះម៉ោងរបស់វិចិត្រករ លោក ជា សេរីរដ្ឋ ដែលម្ចាស់ពិព័រណ៍ទោលក្រោមចំណងជើងថា «ស្រែប្រតិដ្ឋ» នៅវិចិត្រសាលស-ស ក្នុងរាជធានីភ្នំពេញ ខណៈលោកអ្នកទស្សនាអាចទៅចូលរួមស្តាប់ និងទស្សនាស្នាដៃពិព័រណ៍ដោយសេរី។
លោក ជា សេរីរដ្ឋ ដែលកើតនៅឆ្នាំ ១៩៩០ នៅបាត់ដំបង ចាប់ផ្តើមសិក្សាផ្នែកគំនូរនៅអង្គការហ្វារពន្លឺសិល្បៈ នៅឆ្នាំ ២០០៥ ហើយនៅឆ្នាំ ២០០៨ លោកបានទៅចូលរួមសិក្ខាសាលាមួយជាមួយនឹងសិល្បករអន្តរជាតិ Sera Ing និងសិល្បករ វ៉ាន់ ណាត ក្រោមប្រធានបទ «ការចងចាំរបបខ្មែរក្រហមនៅកម្ពុជា» ដឹកនាំដោយលោកស្រី Soko PhayVakalis នៅមជ្ឈមណ្ឌលបុប្ផាណា។
បន្ទាប់ពីបានបញ្ចប់ការសិក្សានៅវិទ្យាស្ថានបច្ចេកវិទ្យា ក្រុងបាត់ដំបងនៅឆ្នាំ ២០១២ លោកបានចាប់ផ្តើមធ្វើការជាអ្នករចនាក្រាហ្វិក និងវិចិត្រករនៅស្ទូឌីយោសន្លឹកថ្មី នៃអង្គការហ្វារពន្លឺសិល្បៈ និងនៅឆ្នាំ ២០១៣ លោកក៏បានក្លាយជាគ្រូបង្រៀនផ្នែករចនាក្រាហ្វិកនៅអង្គការហ្វារពន្លឺសិល្បៈ និងធ្លាប់ចូលរួមការពិព័រណ៍សិល្បៈជាច្រើន។
ដូចជានៅឆ្នាំ ២០១៤ លោកបានចូលរួមកម្មពិធីសិល្បៈអន្ដរជាតិតែមួយគត់ សម្រាប់សិល្បករដែលមានអាយុក្រោម ៣០ ឆ្នាំ នៅអាស៊ីអាគ្នេយ៍ មានឈ្មោះថា «SPOT ART» នៅប្រទេស សិង្ហបុរី។ នៅក្នុងឆ្នាំ ២០១៤ លោកបានធ្វើពិព័រណ៍សិល្បៈទោលមួយ ដែលមានចំណងជើងថា «គ្រោះមហន្តរាយ» នៅវិចិត្រសាលរមៀត នៅទីក្រុងភ្នំពេញ ហើយនៅឆ្នាំ ២០១៩ ថ្មីៗនេះ លោកបានបង្ហាញពិព័រណ៍ទោល នៅវិចិត្រសាលសង្កែ ក្នុងខេត្តបាត់ដំបង ជាមួយស្នាដៃឈ្មោះថា «ស្រែប្រតិដ្ឋ» នេះ។
ដោយឡែកសម្រាប់វិចិត្រករលោក ជា សេរីរដ្ឋ ក៏បានមករៀបចំនៅក្នុងទីក្រុងភ្នំពេញផងដែរ នៅវិចិត្រសាល ស-ស ស្ថិតនៅផ្ទះលេខ ៤៧ ផ្លូវលេខ ៣៥០ (កែងផ្លូវ ៩៥) បឹងកេងកង ៣ រាជធានីភ្នំពេញ ខណៈពិព័រណ៍នេះ សហការជាមួយនឹងវិចិត្រសាលសង្កែ និងគាំទ្រពីមូលនិធិ Rei Foundation និងបន្តតាំងរហូតដល់ថ្ងៃទី ២៧ ខែ វិច្ឆិកា ឆ្នាំ ២០១៩។
បើតាមសេចក្តីបង្ហាញពីគេហទំព័រគម្រោងវិចិត្រសាល ស-ស ក៏បានឲ្យដឹងពីអត្ថន័យពិព័រណ៍គំនូរទោលលោក ជា សេរីរដ្ឋ ថា៖ «ក្នុងពិព័រណ៍នេះលោកបង្ហាញជូននូវស្នាដៃចំនួន ៨ ផ្ទាំង។ តាមរយៈទស្សនៈរបស់ក្មេងម្នាក់ ដែលគាត់បានធំធាត់នៅស្រុកស្រែ មុននឹងចាកចេញមកសិក្សា និងរស់នៅក្នុងទីក្រុង។
ស្នាដៃរបស់លោក សេរីរដ្ឋ បានផ្តល់ជាពន្លឺ និងរូបភាពដ៏មានកម្លាំង មានភាពដិតដាមនៅលើកន្ទេល ដែលយើងនៅតែអាចឃើញមិនទាន់រលុបបាត់នោះឡើយ ហាក់ដូចជាការប្រាប់ពីការផ្លាស់ប្តូរមួយកំពុងតែកើតមានឡើងនៅតាមទីជនបទ ស្រុកស្រែចម្ការនៅកម្ពុជាសព្វថ្ងៃដូច្នោះដែរ។
ទំនាក់ទំនងពួកគាត់ ច្រើនតែជាភាពចម្រូងចម្រាសព្រោះវាលស្រែជាទីកន្លែងនៃជម្លោះ អំណាច និងអ្វីជាបំណងប្រាថ្នាទៅថ្ងៃអនាគត»៕