.jpg)
ក្រុមរបាំជនជាតិគ្រឹងមកពីខេត្តរតនគិរី នឹងសម្តែងនៅសារមន្ទីរជាតិចុងសប្តាហ៍នេះ។ អង្គការសិល្បៈខ្មែរអមតៈ
ភ្នំពេញៈ ការសម្តែងទម្រង់សិល្បៈបែបចម្រុះដ៏ប្លែកអារម្មណ៍ និងជាលើកទី ១ ដែលសម្តែងដោយក្រុមសិល្បៈមហាជនភូមិតងណងឡិះ មកពីខេត្តរតនគីរី ដែលអង្គការសិល្បៈខ្មែរអមតៈបាននាំយកមកសម្តែងចែកជូនទស្សនាក្នុងកម្មវិធីបញ្ចប់នៃរដូវកាលវប្បធម៌ ចាប់ផ្តើមពីម៉ោង ៧ ដល់ម៉ោង ៨ យប់ នាថ្ងៃអាទិត្យ ទី ២៣ ខែកញ្ញា ឆ្នាំ ២០១៨ ខាងមុខនេះ នៅឯសាលសិល្បៈសារមន្ទីរជាតិ។
លោក ជ្រើស សារុន ជាប្រធានក្រុមសិល្បៈមហាជនភូមិតងណងឡិះ មកពីខេត្តរតនគិរី បានបង្ហើបប្រាប់ភ្នំពេញប៉ុស្តិ៍ថា៖ «នេះការសម្តែងបញ្ចូលគ្នារវាងល្ខោន និងរបាំ ដែលរៀបរាប់អំពីប្រពៃណីទំនៀមទម្លាប់់នៃជនជាតិគ្រឹង។ វាជាផ្នែកមួយនៃជីវិតរបស់ពួកយើងហើយការសម្តែងរួមមានពិធីសែនព្រេនតាមបែបសហគមន៍គ្រឹង នេះ អមដោយរបាំដងទឹកដែលបង្ហាញពីទំនៀមទម្លាប់នៃការប្រើប្រាស់ទឹក ដែលបានដងពីអូរ និងអណ្តូង ហើយក៏ត្រូវបានអនុវត្តតាមរបៀបនេះមកជាយូរយារណាស់មកហើយ»។
លោក ជ្រើស សារុន ប្រធានក្រុមរបាំជាតិគ្រឹង។ ផា លីណា
លោកបន្តថា «ការសម្តែងមានការប្រើប្រាស់ឧបករណ៍ភ្លេងគងឫស្សី និងគង ៥ ផ្លែ ដែលក៏ជាអត្តសញ្ញាណមួយរបស់យើង ។ សម្រាប់ការសម្តែង ដែលមានរយៈពេលជិត ១ ម៉ោងនេះ យើងមានសមាជិកសម្តែងសរុប ១៤ នាក់ ដោយមានស្រី ៥ នាក់»។
លោក ជ្រើស សារុន បុរសជនជាតិគ្រឹង វ័យ ៣៥ ឆ្នាំ ដែលជាសិស្សទទួលបានអាហារូបករណ៍សិល្បៈអមតៈ អាន ចនផន ឆ្នាំ ២០១៨ ផ្នែកជំនាញកុំព្យូទ័ររូបនេះបន្តថា៖ «នេះជាស្នាដៃបង្កើតថ្មី ផ្សំដោយរបាំ និងល្ខោន ដែលខ្ញុំបានដាក់ចំណងជើងថា «ប្រពៃណី និងការរស់នៅ» ដែលជាការនិយាយអំពីជំនឿ និងវិទ្យាសាស្ត្រក្នុងការព្យាបាលរបស់ ជនជាតិគ្រឹងយើងផងដែរ»។
ការសម្ដែង ការបញ្ចាំងខ្សែភាពយន្ត កិច្ចពិភាក្សា ពិព័រណ៍ និងសិក្ខាសាលា ដែលត្រូវបានសម្រិតសម្រាំង និងនាំមកជូនដោយអង្គការសិល្បៈខ្មែរអមតៈ ជុំវិញប្រធានបទ «ការស្វែងរកអត្តសញ្ញាណ» មានរយៈពេល ៣ ខែ ចាប់ផ្តើមតាំងពីថ្ងៃទី ១៩ ខែ កក្កដា ឆ្នាំ ២០១៨ មកម្ល៉េះ ខណៈថ្ងៃបញ្ចប់គឺនៅថ្ងៃទី ២៣ ខែកញ្ញា ឆ្នាំ ២០១៨ នេះ។
ចំពោះការសម្តែងទម្រង់សិល្បៈបញ្ចូលគ្នារវាងល្ខោន និងរបាំ ប្រពៃណីទំនៀមទម្លាប់ របស់ជនជាតិគ្រឹង នេះ ក៏តម្រូវឲ្យទស្សនិកជន ទិញសំបុត្រ ១ សន្លឹក ដែលមានតម្លៃ ២ ម៉ឺន រៀលផងដែរ លក់នៅឯការិយាល័យអង្គការសិល្បៈខ្មែរអមតៈ និងនៅស្តង់លក់សំបុត្រនៃសារមន្ទីរជាតិ៕
