ភ្នំពេញៈ ព្រោះតែមានគោលបំណងចង់លើកទឹកចិត្តអ្នកនិពន្ធជំនាន់ក្រោយ និងផ្សព្វផ្សាយពីទម្រង់ល្ខោននិយាយឲ្យមហាជនគ្រប់ស្រទាប់ កាន់តែជ្រាបច្បាស់ពីវិស័យសិល្បៈមួយនេះ អង្គការសិល្បៈខ្មែរអមតៈនឹងនាំយកផ្ទាំងទស្សនីយភាពល្ខោននិយាយរឿង «ម្នាក់ឯងជាថ្មី» ដែលសម្តែងនៅឯឆាកនៃសារមន្ទីរជាតិនៅល្ងាចថ្ងៃអាទិត្យទី ២៣ ខែមិថុនានាថ្ងៃចុងសប្តាហ៍នេះ។
លោក គាត សុគីម ជាបុគ្គលិកផ្នែកទំនាក់ទំនងព័ត៌មាននៃអង្គការសិល្បៈខ្មែរអមតៈបានបង្ហើបឲ្យដឹងពីគោលបំណងរៀបចំឲ្យមានការសម្តែងល្ខោននិយាយនេះដែរថា៖ «ដោយចង់ផ្តល់ឱកាសដល់សិល្បករជំនាន់ក្រោយ ជាពិសេសផ្នែកនិពន្ធតែម្តងឲ្យពួកគាត់អាចបង្ហាញពីសមត្ថភាពនៃការតែងនិពន្ធថ្មី សាច់រឿងថ្មីប្រភេទរឿងល្ខោននិយាយ ខណៈកន្លងមកនោះ យើងតែងជ្រើសយករឿងចាស់មកសម្តែងជាល្ខោននិយាយនោះ។ ដូច្នេះការសម្តែងលើកនេះគឺជាការបង្កើតទម្រង់ថ្មី និងជាការផ្ស៊ាំរបស់ក្រុមសិល្បករ-សិល្បការិនី ផ្នែកល្ខោននិយាយសម្រាប់ការត្រៀមខ្លួនសម្តែងជាផ្លូវការនាឱកាសប្រារព្ធកម្មវិធីធំគឺមហោស្រពសិល្បៈដើម្បីសន្តិភាពនាពេលខាងមុខនោះផងដែរ។
ចំណែកគោលបំណងមួយទៀតចង់ផ្សព្វផ្សាយដល់មហាជនទាំងអស់ឲ្យបានជ្រាបអំពីទម្រង់សិល្បៈនេះឲ្យកាន់តែច្បាស់ ដោយសារតែនាពេលកន្លងមកច្រើនតែមានការលើកឡើងថា ទម្រង់សិល្បៈនេះជាការសម្តែងតែតាមវិទ្យុនោះ និងចង់ឲ្យបងប្អូនគាំទ្រទាំងអស់គ្នាផងដែរ»។
លោក គាត សុគីម បន្តទៀតថា៖ «ទម្រង់ល្ខោននិយាយសម្រាប់ត្រៀមក្នុងមហោស្រពធំខាងមុខនោះ យើងមានការនិពន្ធល្ខោនរឿងថ្មីចំនួន ៣ រឿងដែលនឹងយកមកសម្តែងចែកជូនមហាជនទស្សនាជាបន្តបន្ទាប់ផងដែរ ខណៈរឿងទី ១ គឺរឿង «ម្នាក់ឯងជាថ្មី» ត្រូវសម្តែងនៅថ្ងៃអាទិត្យទី ២៣ ខែមិថុនា ឆ្នាំ ២០១៩ នេះនៅម៉ោង ៤-៥ ល្ងាចនៅឯឆាកសម្ដែងសិល្បៈខ្មែរអមតៈក្នុងសារមន្ទីរជាតិ។ ចំពោះការសម្តែងបន្ទាប់គឺរឿង «គ្រូទាយ» ដែលនឹងសម្តែងនៅថ្ងៃទី ២៦ ខែមិថុនា ឆ្នាំ ២០១៩ នៅវេលាម៉ោង ៣.៣០ នាទីដល់ម៉ោង ៤.៣០ នាទីរសៀល។ ចំណែករឿងទី ៣ មានចំណងជើងថា «ចាប៉ី» ដែលនឹងសម្តែងនៅចុងក្រោយគេនាពេលឆាប់ៗនៅលើឆាកសម្តែងដដែល»។
ចំពោះល្ខោននិយាយរឿង «ម្នាក់ឯងជាថ្មី» នេះគឺជាស្នាដៃនិពន្ធរបស់អ្នកគ្រូ ឆុន ស៊ីណា និងដឹកនាំសម្ដែងដោយអ្នកគ្រូ ឆុន ស៊ីណា និង អ្នកគ្រូ ប៉ុក វណ្ណា ហើយបាននាំមកជូនដោយអង្គការសិល្បៈខ្មែរអមតៈ។
លោក គាត សុគីម ក៏បានបង្ហើបពីសាច់រឿង «ម្នាក់ឯងជាថ្មី» ផងដែរថា៖ «សាច់រឿងពីនារីម្នាក់ដែលមានជីវិតអាពាហ៍ពិពាហ៍មិនសមដូចបំណង ហើយធ្វើការសម្រេចចិត្តដ៏លំបាកមួយនៅក្នុងជីវិតរបស់នាង។ ចំពោះតួអង្គសម្តែងវិញមាន ៥ រូបគឺតួសម្តែងសំខាន់ ឬតួឯកមាន ៣ រូប និងតួរងមាន ២ រូប»។
សូមកុំភ្លេចមកចូលរួមទាំងអស់គ្នាណា! ល្ខោននិយាយដំឡើង និងមានការនិពន្ធថ្មីនៅថ្ងៃអាទិត្យទី ២៣ មិថុនា ២០-១៩ ម៉ោង ៤-៥ ល្ងាចនៅឆាកសម្ដែងសិល្បៈខ្មែរអមតៈនៃសារមន្ទីរជាតិនឹងមានការសម្ដែងល្ខោននិយាយរឿង «ម្នាក់ឯងជាថ្មី»។ សំបុត្រចូលទស្សនាឥតគិតថ្លៃ ឬអាចទាក់ទងតាមលេខ 086 895 556 / 023 986 032 ខណៈទីកន្លែងសម្រាប់ការចូលរួមមានកំណត់៕