The Phnom Penh Post Search

Search form




Logo of Phnom Penh Post newspaper Phnom Penh Post - តោះ! នាំគ្នា​ដាំ​ដើមឈើ និង​បោះតង់​លេង​នៅ​មណ្ឌលគិរី




តោះ! នាំគ្នា​ដាំ​ដើមឈើ និង​បោះតង់​លេង​នៅ​មណ្ឌលគិរី

Content image - Phnom Penh Post
តំណាង​ក្រុមហ៊ុន​តូយ៉ូតា ខេមបូឌា គាំទ្រ​យុទ្ធនាការ តោះ​! យើង​នាំគ្នា​ដាំ​ដើមឈើ​​។ ឈឹម ស្រីនាង

តោះ! នាំគ្នា​ដាំ​ដើមឈើ និង​បោះតង់​លេង​នៅ​មណ្ឌលគិរី

ភ្នំពេញ: សម្រាប់​អ្នកដែល​ស្នេហា​ធម្មជាតិ និង​ចង់​រួម​ចំណែក​លើក​ស្ទួយ​បរិស្ថាន យុទ្ធនាការ «តោះ​យើង​នាំគ្នា​ដាំ​ដើម​ឈើ» ឆ្នាំ ២០១៧ នឹង​នាំ​អ្នកធ្វើ​ដំណើរ បោះតង់ ញ៉ាំ​អាហារ ដើរ​កម្សាន្ត​ថតរូប​លេង និង​ក្រេប​ជញ្ជក់​ចំណេះដឹង​ពី​បរិស្ថាន ដែល​បង្រៀន​ដោយ​អ្នកជំនាញ​ពី​របៀប​ដាំំ​ដើម​ឈើ ក្នុង​ដំណើរ​រយៈពេល ៤ យប់ ៥ ថ្ងៃ ទៅ​កាន់​ទឹកដី​ស្រុក​កែវសីមា ខេត្ត​មណ្ឌលគិរី។

កម្មវិធី​នេះ ត្រូវបាន​រៀបចំ​ដោយ​សភាយុវ​ពាណិជ្ជករ​អន្តរជាតិ (JCI) កម្ពុជា​សាខា​ចតុមុខ ដែល​ទទួល​បាន​ការគាំទ្រ​ពី​ក្រសួង​បរិស្ថាន សាលា​រាជធានី អង្គការ​អភិរក្ស​សត្វព្រៃ (WCS) និង​សហការ​ជាមួយ​ក្រុមហ៊ុន តូយ៉ូតា​កម្ពុជា ក្នុង​គោល​បំណង​បង្កើនការ​យល់ដឹង​អំពី​សារៈសំខាន់​នៃ​ព្រៃឈើ និង​ដើម​ឈើ ដែល​អាច​ទប់ស្កាត់​បាតុភូត​បម្រែ​បម្រួល​អាកាសធាតុ និង​ការ​ឡើង​កម្តៅ​នៅ​លើ​ភពផែនដី។

មិន​ត្រឹមតែ​ប៉ុណ្ណោះ​យុទ្ធនាការ​នេះ​នឹង​ផ្តល់នូវ​ឱកាស​ដ៏ល្អ​សម្រាប់​ប្រជាពលរដ្ឋ យុវជន​ព្រមទាំង​ក្រុមហ៊ុន​ឯកជន​នានា ចូលរួម​ចំណែក​បំពេញ​កាតព្វកិច្ច និង ការងារ​អភិវឌ្ឍន៍​ប្រកបដោយ​ចីរភាព។

លោក លី ឧត្តម ប្រធាន​គម្រោង​រៀបចំ​យុទ្ធនាការ​នេះ បាន​និយាយ​ថា៖ «នៅ​ក្នុង​ឆ្នាំ​នេះ យុទ្ធនាការ​បាន​ផ្តោត​ជា​សំខាន់​លើ​ប្រធាន​បទ មនុស្ស​គ្រប់គ្នា​សំខាន់ ដើម​ឈើ​គ្រប់ៗ​ដើម សុទ្ធតែ​សំខាន់​ដូចគ្នា។ មិន​ត្រឹមតែ​ប៉ុណ្ណោះ យើង​ក៏ត្រូវ​តែ​ទទួល​ស្គាល់​ផងដែរ​ថា យើង​មិន​អាច​រស់នៅ​ដោយ​គ្មាន​ដើម​ឈើ​បា​នឡើយ តែ​ដើម​ឈើ​ពិតជា​អាច​រស់​បាន​ទោះ​គ្មាន​វត្តមាន​មនុស្ស»។

អ្នក​ស្នេហា​បរិស្ថាន និង​ចង់​រួម​ចំណែក​ក្នុង​យុទ្ធនាការ «តោះ​យើង​នាំគ្នា​ដាំ​ដើម​ឈើ» នេះ​អាច​ជាវ​សំបុត្រ​តម្លៃ ១៥០ ដុល្លារ ដោយ​មួយ​ផ្នែក​សម្រាប់​បរិច្ចាគ​ទៅលើ​ការដាំ​ដើម​ឈើ ការធ្វើ​ដំណើរ ហូបចុក និង​ការសិក្សា​ពី​បរិស្ថាន នឹង​ត្រូវ​បាន​ផ្ដល់​ជូន​អំឡុង​ពេល ៥ ថ្ងៃ។

Content image - Phnom Penh Post
សកម្មភាព​អ្នកចូលរួម​ដាំដើមឈើ​នាពេល​កន្លង​មក​។ JCI

ការដាំ​ដើមឈើ​នេះ​មាន ២ ដំណាក់កាល​គឺ ទី ១ ធ្វើ​នៅ​រាជធានី​ភ្នំពេញ​កាល​ពី​ចុង​ខែ​កញ្ញា និង​ដំណាក់កាល​ទី ២ ជា​កម្មវិធី​បោះ​ជំរំ នៅ​ថ្ងៃ​ទី ២៣ ដល់ ២៧ ខែ​តុលា ឆ្នាំ ២០១៧ ខាងមុខ​នេះ ក្នុង​តំបន់​អភិរក្ស​កែវសីមា ខេត្ត​មណ្ឌលគិរី។

កូនឈើ​ប្រមាណ ៥ ម៉ឺន​ដើម រួមមាន​ឈើ​ហូប​ផ្លែ និង​ឈើ​ប្រណីត​ដូចជា ធ្នង់ បេង គគីរ គ្រញូង ដែល​រង​នូវ​ហានិភ័យ​ពីការ​បាត់បង់​នោះ​នឹង​ត្រូវ​ប្រគល់​ជូន​ដល់​ប្រជាពលរដ្ឋ​មូលដ្ឋាន​ក្នុង​តំបន់​កែវ​សីមា​ក្នុងការ​ដាំដុះ​ក្នុង​ភូមិ និង​ព្រៃ​ជុំវិញ​មូលដ្ឋាន​រស់នៅ​របស់​ពួកគាត់ ក្រោម​ការគាំទ្រ ពិនិត្យ​តាម​ដាន​របស់​គម្រោង រហូត​អាច​ជឿជាក់​ថា​ដើម​ឈើ​ទាំង​នោះ​រស់រាន និង​លូតលាស់​ល្អ។

ជាអ្នក​សហការ​ក្នុង​យុទ្ធនាការ​នេះ លោក ហ៊ីរ៉ូយូគី អ៊ីតូស អគ្គនាយក​ក្រុមហ៊ុន តូយ៉ូតា ខេមបូឌា បាន​បញ្ជាក់​ឲ្យដឹង​ថា៖ «នេះ​ជា​លើក​ទី ២ ដែល​ក្រុមហ៊ុន តូយ៉ូតា បាន​សហការ​ជាមួយ​អង្គការ​សភាយុវ​ពាណិជ្ជករ​អន្តរជាតិ​ចូលរួម​ថែរក្សា និង​មាន​ការ​ទទួល​ខុសត្រូវ នៅ​ក្នុង​ប្រទេស​កម្ពុជា ពិសេស ការដាំ​ដើម​ឈើ​នេះ បាន​ធ្វើ​ឡើង​នៅ​ក្នុង​ខេត្ត​មណ្ឌលគីរី និង​ខេត្ត​បន្ទាយមានជ័យ»។

លោក​បាន​បន្ថែម​ថា៖ «ជា​រៀងរាល់​ឆ្នាំ ក្រុមហ៊ុន​តែង​តែ​ប្រារព្ធ​ឡើង​នូវ Toyota Global Enviroment Month ដើម្បី​ចែក​រំលែក​នូវ​ទំនួល​ខុសត្រូវ​ចំពោះ​បរិស្ថាន និង​ធ្វើការ​វិនិយោគ​លើ​ការផលិត​រថយន្ត ដែល​ប្រសើរ​ជាង​មុន ក្នុងការ​ថែទាំ​បរិស្ថាន ដើម្បី​ឲ្យ​ពិភពលោក ដែល​យើង​រស់​នៅ​មាន​ភាព​ប្រសើរ​ឡើង»៕

អត្ថបទគួរចាប់អារម្មណ៍