.jpg)
កញ្ញា ព្រីនសេឡា ទទួលបានសិស្សចម្រុះជាតិសាសន៍ និងគ្រប់វ័យនៅស្ទូឌីយោ និងតាមសាលាអន្តរជាតិ។ រូបថត សហការី
ភ្នំពេញ៖ ខ្សែភាពយន្តបូលីវូដ និងរឿងភាគឥណ្ឌាកម្ររំលងឈុតឆាកតួអង្គស្លៀកឈុតចម្រុះពណ៌ដ៏ស្រស់ឆើត ច្រៀងរាំយ៉ាងត្រសង សាសព្ទសន្ទនាសាច់រឿងតាមចង្វាក់តន្ត្រី។
ឧស្សាហកម្មខ្សែភាពយន្តដ៏ពេញនិយមរបស់ឥណ្ឌាដែលមានមូលដ្ឋាននៅទីក្រុងបុមបៃ បានសាយភាយប្រជាប្រិយភាព ដោយសូម្បីតែនៅប្រទេសកម្ពុជា ក៏ភាពយន្តបូលីវូដមានចាក់បញ្ចាំងតាមរោងភាពយន្ត និងកញ្ចក់ទូរទស្សន៍ផងដែរ។
ដោយឃើញសក្ដានុពលនៃទំនាក់ទំនងវប្បធម៌ទាំង ២ ក្នុងឆ្នាំ ២០១៧ កញ្ញា ព្រីនសេឡា អាណម ហ្គៀល (Princella Anum Gill) និងក្រុមគ្រួសារនាងបានធ្វើដំណើរពីទឹកដីប៉ាគីស្ថានមកកម្ពុជាក្នុងបំណងសិក្សាមើលពីស្ថានភាពអំណោយផលក្នុងការប្រកបអាជីវកម្ម។
ក្រោយមក ពួកគេក៏បានបើកអាហារដ្ឋានមួយដែលមានឈ្មោះថា ព្រីនសេឡា (Princella Flavors of- Saffron) បម្រើអាហារឥណ្ឌា និងប៉ាគីស្ថាន ក្រោមស្នាដៃចម្អិនរបស់ម្ដាយនាងផ្ទាល់។
ក្រៅពីម្ហូបអាហារ កញ្ញា ព្រីនសេឡា ក៏បានចែករំលែកវប្បធម៌តាមរយៈសាក់ហេណា និងក្បាច់រាំបូលីវូដ នៅលើហាងរបស់នាង ស្ទូឌីយោ រាំ និងសាលាអន្តរជាតិនានា។
កញ្ញាជនជាតិប៉ាគីស្ថាន សក់វែង សម្បុរស្រអែម ញញឹមស្រស់រូបនេះបានប្រាប់ ភ្នំពេញ ប៉ុស្តិ៍ ថា៖ «ខ្ញុំចាប់ផ្ដើមបង្រៀនក្បាច់រាំកាល ២-៣ ឆ្នាំមុននៅភ្នំពេញ។ ខ្ញុំបានទៅបង្រៀននៅសាលា Canadian International School (CIS) និងសាលា Grand Mount International School ដែលមានទាំងសិស្សខ្មែរ និងបរទេស។ ខ្ញុំទទួលបានលទ្ធផលយ៉ាងល្អ។ ពួកគេរីករាយនឹងរៀនជាមួយគ្នាណាស់»។
អ្នកគ្រូរាំបូលីវូដ កញ្ញា ព្រីនសេឡា អាយុ ២៥ឆ្នាំ មកពីប៉ាគីស្ថាន។ រូបថត សហការី
កញ្ញា ព្រីនសេឡា បានបន្តទៀតថា៖ «ចាប់ពីពេលនោះខ្ញុំក៏សាកល្បងធ្វើសិក្ខាសាលាសម្រាប់បង្រៀនគ្រប់វ័យ ហើយឃើញថាមានអ្នកចាប់អារម្មណ៍ច្រើន។ ខ្ញុំក៏ចាប់ផ្ដើមបើកថ្នាក់ផ្ទាល់ខ្លួនបង្រៀន»។
តម្លៃសិក្សាសម្រាប់ថ្នាក់ដំបូង គឺ ៨ ដុល្លារ ក្នុងម្នាក់កម្រិតបន្ទាប់គឺ ១០ ដុល្លារ និងកម្រិតចុងក្រោយគឺ ១២ ដុល្លារ។
នៅប្រទេសប៉ាគីស្ថាន ព្រីនសេឡា បានឱ្យដឹងថា ការរាំគឺបញ្ជាក់ពីភាពរីករាយក្នុងកម្មវិធីខួបកំណើត ពិធីរៀបអាពាហ៍ពិពាហ៍ ការជួបជុំគ្រួសារ និងកម្មវិធីសាសនាផងដែរ។
កញ្ញាប្រាប់ទៀតថា៖ «ជាពិសេសនៅពេលរៀបការ យើងមានការរាំប្រកួតគ្នារវាងខាងកូនក្រមុំ និងកូនកំលោះយ៉ាងរីករាយ»។
ការហាត់រាំជាមួយអ្នកគ្រូ ព្រីនសេឡា សិស្សមិនបារម្ភខ្លាចរាំមិនស្អាត ឬមិនសមនោះទេ។
កញ្ញាបានជំរុញថា៖ «វាមិនសំខាន់ថាអ្នកណារាំពូកែ ឬមិនពូកែទេ ឱ្យតែអ្នកអាចធ្វើចលនាដងខ្លួន និងក្បាលបាន គឺអ្នករាំបានហើយ»។
ចម្រៀងភាគច្រើនដែលយកមកចាក់រាំ ត្រូវបានដកស្រង់ពីភាពយន្ត។ ប៉ុន្តែបច្ចុប្បន្ន ក្បាច់រាំបូលីវូដ អាចរាំទៅតាមស្ទើរតែគ្រប់ប្រភេទបទភ្លេង ហើយអ្នករាំមិនចាំបាច់ទាល់តែស្លៀកសម្លៀកបំពាក់ឥណ្ឌាទេ លើកលែងតែពេលមានកម្មវិធីសំខាន់។
ថ្វីត្បិតថាក្បាច់រាំនេះជារបស់ឥណ្ឌា តែ កញ្ញា ព្រីនសេឡា បានរៀបរាប់ថា ដោយសារតែនាងជាអ្នកគាំទ្ររឿងឥណ្ឌាតាំងពីតូច ហើយនាងកើតក្នុងគ្រួសារកាន់ខាងសាសនា កាតូលិក ប៉ាន់ចាប៊ី ដូច្នេះវប្បធម៌ប៉ាន់ចាប៊ី បានដក់ជាប់ជាមួយនាងស្រាប់ ដែលធ្វើឱ្យនាងចាប់ផ្ដើមហាត់រាំតាំងពីចេះដើរ។
ការហាត់រាំបូលីវូដ ភាគច្រើនប្រើបទភ្លេងពីភាពយន្ត។ រូបថត សហការី
អ្វីដែល ព្រីនសេឡា ស្រលាញ់បំផុតពីក្បាច់បូលីវូដនេះគឺ វាមិនបែងចែកជាតិសាសន៍ ហើយវាអាចរាំតែម្នាក់ ឬរាំជាក្រុមក៏បាន។
ជំហានវាមួយៗពិតជាជាប់ចិត្តគួរឱ្យចង់មើលណាស់។ ជាពិសេសការរាំក្រុមធំ ដែលអាចមើលឃើញពីភាពស្រុះគ្នា និងស៊ីចង្វាក់ភ្លេង។
ក្បាច់រាំ ការបញ្ចេញទឹកមុខ និងជំហានវាមួយៗ គឺជាភាសាកាយវិការ ដែលអ្នករាំបានរៀបរាប់សាច់រឿង។
គ្រូបង្រៀនរាំដែលវិវឌ្ឍខ្លួនពីជំនាញពាណិជ្ជកម្មរូបនេះ បានលើកទឹកចិត្តដល់អ្នកនិយមកុនបូលីវូដ តែខ្មាសអៀននឹងរាំថា៖ «បើអ្នកសម្រេចចិត្តថារៀនអ្វីហើយ ចាប់ផ្ដើមធ្វើចលនា និងបង្ហាញសមត្ថភាពរបស់អ្នកឱ្យអស់។ អ្នកមិនចាំបាច់ទាល់តែមានបទពិសោធសម្រាប់រៀនវគ្គដំបូងទេ»។
កញ្ញា ព្រីនសេឡា បាននិយាយថា៖ «ថាមិនត្រូវអ្នកអាចនឹងរកឃើញចំណូលចិត្តថ្មីពេលបានរាំបូលីវូដ។ ប្រាកដណាស់បូលីវូដមានហេតុផលដែលនាំឱ្យវាល្បីល្បាញជុំវិញពិភពលោក។ ពេលនេះដល់វេនអ្នកស្វែងរកភាពរីករាយរបស់វាម្ដងហើយ»។
អ្នកចាប់អារម្មណ៍រាំបូលីវូដ ព័ត៌មានបន្ថែមមាននៅទំព័រហ្វេសប៊ុក @princellabollywooddance៕
