.jpg)
លោក Kenny Matthews ជាមួយពានរង្វាន់ និងវិញ្ញាបនបត្រចិញ្ចឹមគោ។ ហុង មិនា
កណ្ដាល: គោសម្បុរខ្លាឃ្លោកខ្លះពណ៌ស-ខ្មៅ និងខ្លះទៀតពណ៌ត្នោតលាយស ដែលសុទ្ធសឹងតែជាគោបរទេសរាប់រយក្បាលឈរពេញក្រោលបំពាក់ប្រព័ន្ធកង្ហារធំៗបក់ផ្លុំខ្យល់រក្សាសីតុណ្ហភាពត្រជាក់ ត្រូវបានចិញ្ចឹមយកទឹកដោះនៅក្នុងឃុំអរិយក្សត្រ ក្បែរទីក្រុងភ្នំពេញជិតបង្កើយ។
ទឹកដោះគោស្រស់ ដែលត្រូវបានច្របាច់ចេញពីមេគោចំនួន ៣០០ ក្បាល ឆ្លងកាត់ម៉ាស៊ីនត្រជាក់ ៤ អង្សាសេ មុននឹងយកបញ្ចូលក្នុងម៉ាស៊ីនសម្លាប់មេរោគជាច្រើនដំណាក់កាលទម្រាំតែបានច្រកចូលទៅក្នុងដបជ័ររាងជ្រុង ស្លាកយីហោកសិដ្ឋាន (MOO MOO FARM) ដោយម្ចាស់កសិដ្ឋានអះអាងថា វាមានអនាម័យខ្ពស់ និងរសជាតិឆ្ងាញ់ជាប់មាត់ផលិតតាមស្តង់ដារអាមេរិក។
លោក KENNY MATTHEWS អាយុ ២៩ ឆ្នាំជនជាតិអាមេរិក ដែលអាចនិយាយភាសាខ្មែរបានយ៉ាងច្បាស់ ប្រាប់អំពីអត្ថប្រយោជន៍ទឹកដោះគោស្រស់ថា វាពោរពេញទៅដោយសារធាតុជំនួយជាច្រើន ដូចជា កាល់ស្យូមធ្វើឲ្យឆ្អឹងរឹងមាំ ស្បែកភ្លឺរលោង ផ្ទុកសារជាតិខ្លាញ់មិនធ្វើឲ្យធាត់តែផ្ដល់កម្លាំង និងវីតាមីនជាច្រើនទៀត ជាពិសេសជួយទប់ស្កាត់ដល់ជំងឺមនុស្សចាស់។
គោ ៣០០ ក្បាលក្នុងកសិដ្ឋានអរិយក្សត្រជាពូជគោមកពីនូវែលសេឡង់។ហុង មិនា
ដោយមានទីតាំងនៅក្នុងភូមិអរិយក្សត្រ ឃុំអរិយក្សត្រ ស្រុកល្វាឯម ខេត្តកណ្តាល ជាប់ព្រំប្រទល់រាជធានីភ្នំពេញ លោក KENNY MATTHEWS ជាអ្នកគ្រប់គ្រងកសិដ្ឋាន ប្រាប់អំពីគោលបំណងដែលធ្វើអាជីវកម្មយកទឹកដោះគោស្រស់នៅកម្ពុជាថា៖ «ខ្ញុំចង់ជួយឲ្យប្រជាជនខ្មែរមានទឹកដោះគោស្រស់ហូប ដែលផលិតនៅក្នុងស្រុក និងមានគុណភាពស្មើនឹងស្រុកខ្ញុំ [សហរដ្ឋអាមេរិក]»។
ម្ចាស់កសិដ្ឋានចិញ្ចឹមគោ និងទឹកដោះគោស្រស់ ម៉ូម៉ូហ្វាម វ័យ ២៩ ឆ្នាំ រូបនេះ បានបន្ដថា៖ «ដោយសារតែខ្ញុំចាប់អារម្មណ៍ទៅលើស្រុកខ្មែរ ខ្ញុំបានគិតនូវអ្វីដែលខ្ញុំអាចជួយប្រជាជនខ្មែរយូរអង្វែង»។
លោក KENNY បន្ថែមថា៖ «ខ្ញុំចាប់អារម្មណ៍ទៅលើទឹកដោះគោ ខ្ញុំឃើញថា នៅក្នុងស្រុកខ្មែរមានទឹកដោះគោស្រស់ច្រើនហើយ តែសុទ្ធជាផលិតផលក្រៅស្រុក មិនទាន់មានផលិតក្នុងស្រុកដែលមានគុណភាពដូចនៅក្នុងសហរដ្ឋអាមេរិកទេ»។
ម៉ូម៉ូហ្វាម បានអភិវឌ្ឍខ្លួនចាប់ពីមេគោចំនួន ១៥ ក្បាលដល់ ៣០០ ក្បាល ដែលមេគោទាំងអស់នាំចូលពីប្រទេសនូវែលសេឡង់។ នៅដើមឆ្នាំ ២០១៩ ក្នុងខែកុម្ភៈ ខាងមុខនេះ លោក KENNY MATTHEWS បានបង្ហើបប្រាប់ថា កសិដ្ឋានរបស់លោកនឹងបន្ថែមមេគោចំនួន ១០០០ ក្បាលទៀត។
ទិដ្ឋភាពកសិដ្ឋានចិញ្ចឹមគោយកទឹកដោះនៅអរិយក្សត្រ។ ហុង មិនា
លោក KENNY បានរៀបរាប់ប្រាប់អំពីប្រជាប្រិយភាពទឹកដោះគោស្រស់របស់ខ្លួនថា ម៉ូម៉ូហ្វាម មានលក់នៅលើទីផ្សារក្នុងរាជធានីភ្នំពេញ ចំនួន ៧០ កន្លែង និងមានការកុម្ម៉ង់តាមរយៈទូរស័ព្ទ និងទំព័រហ្វេសប៊ុក (MOO MOO-FARM) ដោយដឹកជញ្ជូនដល់ទីកន្លែងចាប់ពី ២ កំប៉ុងឡើង ក្នុងមួយកំប៉ុងចំណុះ ២ លីត្រ តម្លៃ ៤ ដុល្លារ អាចទុកនៅក្នុងទូទឹកកកបានរយៈពេល ៧ ថ្ងៃ។
លោក KENNY បញ្ជាក់ថា៖ «ទឹកដោះគោយើងមានលក្ខណៈប្លែកពីទឹកដោះគោផ្សេង។ បើសិនជាយើងទុកទឹកដោះគោនៅក្នុងទូទឹកកកសីតុណ្ហភាពកម្រិត ៤ អង្សាសេ វាអាចរក្សាគុណភាពរហូតដល់ ១២ ថ្ងៃ តែបើលើសពី ៧ អង្សាសេឡើងទៅអាចរក្សាបានតែ ៧ ថ្ងៃ»។
ម្ចាស់កសិដ្ឋានជាជនជាតិ អាមេរិករូបនេះ បានផ្តាំផ្ញើដល់ប្រជាជនកម្ពុជាថា៖ «សូមជួយគាំទ្រចំពោះផលិតផលនៅក្នុងស្រុកទាំងអស់គ្នា ដែលនៅពេលបច្ចុប្បន្ននេះ ម៉ូម៉ូហ្វាមមានចែកចាយត្រឹមតែនៅភ្នំពេញ។ ប៉ុន្តែនៅដើមឆ្នាំ ២០១៩ នេះ នឹងមានយកទៅលក់នៅខេត្តសៀមរាប និងបន្តលក់គ្រប់ខេត្តក្រុងទូទៅប្រទេស»៕
