.jpg)
ជញ្ជាំងមាន ៣ ស្ថានភាពពីស្រួល មធ្យម ទៅលំបាក។ Phnom Penh Climb
ភ្នំពេញ: បើអ្នកប្រាថ្នាជម្នះភាពកំសាកញីចំពោះទីទួលខ្ពស់ ហើយមិនខ្លាចនឹងប្រើក្រញ៉ាំម្រាមដៃតោងឡើង អ៊ីចឹងកីឡាឡើងជញ្ជាំងប្រាកដជាស័ក្ដិសមចំពោះអ្នកចូលចិត្ដហាត់ប្រាណ ចម្រើនសុខភាពរាងកាយ និងកម្ចាត់ការភ័យខ្លាច។
ក្រោយពីបើកវគ្គបណ្ដុះបណ្ដាល និងសេវាកម្មប្រភេទកីឡាឡើងជញ្ជាំងក្នុងអគារ ស្ថិតនៅក្បែរផ្សារទួលទំពូង តាំងពីឆ្នាំ ២០១៥ Phnom Penh Climb Community Gym PhnomPenhClimb បានបើកវគ្គសិក្សាសម្រាប់ អ្នកថ្មីថ្មោងបំផុតចាប់ពីចុងខែកញ្ញា រហូតដល់ពាក់កណ្ដាលខែតុលា។
ក្រៅពីសុខុមាលភាពនៃការហាត់កីឡាទូទៅ ការឡើងជញ្ជាំង ត្រូវបានគ្រូបង្រៀនបន្ថែមពីសមត្ថភាពអង់អាចមិនខ្លាចខ្ពស់ និងចេះបត់បែនទៅតាមស្ថានភាពឧបសគ្គជាក់ស្ដែង។
លោក សរ សីហា អាយុ ២១ ឆ្នាំ ជាគ្រូបង្វឹកនៅ Phnom Penh Climb រយៈពេល ៣ ឆ្នាំ បាននិយាយប្រាប់ថា៖ «ទី១ វាមានអត្ថប្រយោជន៍ដូចកីឡាទូទៅដែរគឺសុខភាព។ ទី ២ យើងបង្កើនសមត្ថភាពកុំឲ្យខ្លាចទីខ្ពស់ និងមានភាពវៃឆ្លាត ពីព្រោះវាទាមទារឲ្យអ្នកឡើងត្រូវគិតច្រើនដើម្បីពុះពារឧបសគ្គនីមួយៗ មុនពេលឈានសម្រេចគោលដៅ»។
ឆ្លើយតបចំពោះក្ដីកង្វល់របស់អ្នកថ្មីបំផុត លោកឲ្យដឹងថា អ្នកអត់ចេះសោះក៏អាចរៀនឡើងបានដែរ ពីព្រោះស្ថានភាពជញ្ជាំង មាន ៣ ប្រភេទ គឺកន្លែងងាយស្រួល មធ្យម និងលំបាក ដែលមានកម្ពស់ពី ៤ ទៅ ១០ ម៉ែត្រ។
សកម្មភាពឡើងជញ្ជាំងជួយសំខាន់ដល់សរីរាង្គសាច់ដុំ។ Phnom Penh Climb
ដោយមិនចាំបាច់តម្រូវឲ្យអ្នកលេងកីឡាហ្វឹកហាត់សកម្មណាស់ណាមុននឹងផ្ដើមស្រវាតោងពកជញ្ជាំង លោក សីហា បានបន្ដថា៖ «ជាទូទៅ ចំពោះជញ្ជាំងទាប មុនពេលឡើង យើងមានគ្រូម្នាក់ គាត់ប្រាប់យើងមួយភ្លែត ពួកគាត់អាចឡើងដោយខ្លួនឯង និងចេះគិតពីការប្រើជំហាន និងដៃតោងឡើងខ្លួនឯង មុនពេលសួរគ្រូបន្ថែម»។
លោកបានបន្ថែមថា៖ «ប៉ុន្ដែចំពោះជញ្ជាំងខ្ពស់ យើងត្រូវរៀនប្រហែល ជា ១ ម៉ោងសិន មុនចាប់ផ្ដើមឡើងជញ្ជាំង។ ឧទាហរណ៍ថា ខ្ញុំជាអ្នកឡើងដំបូង តែខ្ញុំមានសមត្ថភាពខ្លាំង ពេលឡើងជញ្ជាំងទាបហើយ ខ្ញុំចង់ឡើងជញ្ជាំងខ្ពស់ទៀត។ អ៊ីចឹង គាត់អាចរៀនរយៈពេល ១ ម៉ោង ទើបគាត់អាចបន្ដឡើងអាខ្ពស់»។
ជាគ្រូបង្វឹករយៈពេល ៣ ឆ្នាំ នៅ Phnom Penh Climb រូបនេះ បានប្រាប់អំពីអត្ថប្រយោជន៍សុខភាពថា វាជួយសំខាន់ទៅលើសរីរាង្គសាច់ដុំចាប់ពីចង្កេះឡើងលើ ជាពិសេស ដៃចង្កេះ និងដើមទ្រូង។
Phnom Penh Climb មានតម្លៃ ១៤០០០ រៀល សម្រាប់ភ្ញៀវដំបូង ជាខ្មែរក្នុងរយៈពេល ១ ថ្ងៃ បន្ថែម ១ ម៉ឺនរៀល សម្រាប់ការបង្ហាត់បង្រៀនពីគ្រូជំនាញនៅរៀងរាល់ថ្ងៃពុធ។ ចំពោះវគ្គបណ្ដុះបណ្ដាលជញ្ជាំងទាប ១ វគ្គមានចំនួន ៦ នាក់ និង ១២ នាក់ សម្រាប់ថ្នាក់ជញ្ជាំងខ្ពស់ ខណៈវគ្គសម្រាប់បរទេសមាន ៨ នាក់។
Phnom Penh Climb ស្ថិតនៅផ្ទះលេខ ១១ បេ ផ្លូវ ២៩ ជិតផ្សារទួលទំពូង រាជធានីភ្នំពេញ៕
