ភ្នំពេញ៖ ធុញថប់នឹងការងារប្រចាំថ្ងៃ ជាពិសេសថ្ងៃបន្ទាប់ដើមសប្ដាហ៍មែនទេ? ចង់ក្រេបភេសជ្ជៈត្រជាក់ៗ តែគិតដល់លំហាត់ប្រាណរាងកាយមែនទេ?
អ៊ីចឹង យោគៈស្រាបៀរ អាចជាលេសដ៏សមស្របដែលជំរុញចិត្ដឲ្យបញ្ជាដៃកាន់កែវស្រាបៀរ ស្របពេលហាត់រៀនយោគៈផង និងទទួលបានភាពរីករាយផង។
ចលនាយោគៈស្រាបៀរមិនខុសប្លែកឆ្ងាយពីចលនាយោគៈប្រពៃណីនោះទេ។
អ្នកហ្វឹកហាត់ក៏ត្រូវធ្វើកាយវិការមូលដ្ឋាន ដោយបញ្ចូលជាមួយការក្រេបស្រាបៀរ។
លោក ខូនន័រ ឈេនី ឃើស ជាអ្នកគ្រប់គ្រងទូទៅក្រុមហ៊ុនផលិតស្រាបៀរ TwoBirds Craft Beer ដែលបានរៀបចំកម្មវិធីសិក្សានេះ បាននិយាយថា៖ «ខ្ញុំជឿថា យោគៈប្រពៃណីគួរត្រូវបានចាត់ទុកជាប្រភេទកីឡា ខណៈយោគៈស្រាបៀរផ្ដល់នូវការកម្សាន្ដក្រោយពីបំពេញការងារនឿយហត់»។
លោក ខូនន័រ បានឱ្យដឹងថា គំនិតរបស់លោក គឺចង់ផ្ដល់ភាពស្រស់ស្រាយដល់អ្នកមានអារម្មណ៍នឿយណាយចំពោះការងារដោយការរៀបចំកម្មវិធីបង្រៀនយោគៈ ពិសេសនៅរៀងរាល់ថ្ងៃអង្គារ ជាថ្ងៃដែលត្រូវបានចាត់ទុកជាវេលាដ៏គួរឲ្យធុញទ្រាន់បំផុត។
អ្នកចូលរួមត្រូវបានលើកទឹកចិត្ដឲ្យធ្វើការកក់កន្លែងជាមុន ខណៈបរិវេណនៃទីកន្លែងហ្វឹកហាត់ និងការក្រេបស្រាបៀរមានកំណត់ត្រឹម ១២ កម្រាល តែប៉ុណ្ណោះ។
លោក ខូនន័រ បានប្រាប់ ភ្នំពេញ ប៉ុស្ដិ៍ ទៀតថា៖ «ច្បាស់ណាស់ មនុស្សភាគច្រើនយល់ថា ថ្ងៃអង្គារជាវេលាមិនស្រឡះចិត្ដឡើយ។ វាជាថ្ងៃទី ២ នៃសប្ដាហ៍ ហើយក៏ស្ថិតនៅឆ្ងាយពីថ្ងៃចុងសប្ដាហ៍»។
លោក ខូនន័រ ជាសហស្ថាបនិក TwoBirds Craft Beer បានបន្ដថា គោលបំណងគឺមិនសប្បាយដល់ថ្នាក់ស្រវឹង និងមិនបង្ខំអ្នកចូលរួមឲ្យខិតខំហ្វឹកហាត់ខ្លាំងនោះទេ។
គោលបំណងហាត់យោគៈស្រាបៀរ គឺផ្ដល់ការសម្រាកផ្លូវអារម្មណ៍ ឈប់គិតពីរឿងការងារ និងបញ្ហាផ្សេងៗមួយរយៈខ្លី ដោយបង្វែរមកជួបជុំគ្នាបញ្ចេញញើស និងការកម្សាន្តជាមុនសិន។
លោកបានលើកឡើងថា៖ «ដើម្បីឲ្យកាន់តែងាយស្រួល យើងផ្ដល់វេលាដល់អ្នកសកម្មនឹងការងារសម្រាកពីភាពស្មុគស្មាញ ១ ម៉ោង នៅថ្ងៃដ៏មមាញឹកខ្លាំង»។
ស្ថិតក្នុងចំណោមអ្នកហាត់ កញ្ញា ស្រីលីន វ៉ាន់ បាសា បានយកដបអាល់កុលបាញ់សម្លាប់មេរោគលើដៃទាំង ២ មុនពេលចូលបរិវេណបារ៍ និងកន្លែងផលិតស្រាបៀរខ្ចី TwoBirds Craft Beer ដែលមានទីតាំងនៅ Factory Phnom Penh។
មុនពេលយកដៃកាន់កែវស្រាបៀរ ស្រីលីន វ៉ាន់ បាសា អាយុ ២៥ ឆ្នាំ បានប្រាប់ ភ្នំពេញ ប៉ុស្ដិ៍ ថា៖ «ខ្ញុំមិនធ្លាប់ធ្វើយោគៈសោះ ហើយពេលមិត្ដភក្ដិប្រាប់ពីកម្មវិធីយោគៈស្រាបៀរនេះ ខ្ញុំសួរខ្លួនឯងថា តើហេតុអ្វីក៏មិនសាកល្បងលេងយោគៈស្រាបៀរ។ ខ្ញុំទើបចាប់ផ្ដើមធ្វើលំហាត់ប្រាណយោគៈនេះបាន ៣ ដង ហើយម្ដងជាយោគៈសមាធិធម្មតា និង ២ ដងជាប្រភេទ ស្រាបៀរនេះ»។
សកម្មភាពធ្វើចលនាយឺតៗបានធ្វើឱ្យរាងកាយ ស្រីលីន បែកញើសស្រោចខ្លួនពីក្បាលដល់ចុងជើង តែកញ្ញានៅអាចរំលេចស្នាមញញឹម ខណៈដៃកាន់កែវស្រាបៀរក្រេបប៉ុន្មានក្អឹក។
កញ្ញានិយាយថា៖ «យោគៈស្រាបៀរផ្ដល់ការសប្បាយជាងពីព្រោះវាធ្វើឲ្យយើងស្រស់ស្រាយ និងស្បើយអារម្មណ៍តានតឹង។ ចំពោះយោគៈធម្មតាខ្ញុំធ្វើចាប់ពី ២០ នាទី ទៅវាធ្វើឲ្យធុញទ្រាន់។ ប៉ុន្ដែពេលយើងធ្វើយោគៈបណ្ដើរក្រេបស្រាបៀរតិចៗបណ្ដើរវាធ្វើឲ្យបែកញើសស្រួលខ្លួន ហើយយើងបានសប្បាយជាមួយមិត្ដភក្ដិទៀត។
កញ្ញា អានណា បាចមេន ជាគ្រូបង្វឹកយោគៈដែលមានបទពិសោធហ្វឹកហាត់ ៦ ឆ្នាំ និងបង្រៀនជាង ១ ឆ្នាំ ហើយកញ្ញាមានបំណងចង់សាកល្បងបង្រៀនយោគៈស្រាបៀរ។ កញ្ញាធ្លាប់សិក្សានៅសាលាបារាំង Lycee Francais Rene Descartes (LFRD) ក្នុងរាជធានីភ្នំពេញតាំងពីឆ្នាំ ២០០៥ ដល់ឆ្នាំ ២០១០។
កញ្ញានិយាយថា៖ «ថ្នាក់នេះស័ក្ដិសមសម្រាប់លក្ខណៈមិត្ដភក្ដិ និងធ្វើលំហាត់ប្រាណរួមគ្នា។ នេះប្រហែលជាមធ្យោបាយហ្វឹកហាត់យោគៈបែបថ្មីសម្រាប់អ្នក។ ប៉ុន្ដែគោលបំណងចម្បងនៃវគ្គសិក្សានេះ គ្រាន់តែបង្កើតបរិយាកាសរីករាយ សប្បាយៗ និងមិនតានតឹង»។
លោក ខូនន័រ ទទួលស្គាល់ថា ការហាត់ហោគៈស្រាបៀរ ដំបូងស្ដាប់ទៅគួរឱ្យចង់សើចបន្ដិច អ្នកចូលរួមផ្ដល់តម្លៃខ្ពស់លើភាពរីករាយពេលពួកគេបញ្ចប់ការហាត់។
កញ្ញា ស្រីលីន មានចំណាប់អារម្មណ៍ដែរថា៖ «បើយើងចង់មានការសប្បាយជាមួយមិត្ដភក្ដិចង់បែកញើសខ្លាំង Beer Yoga ជាបទពិសោធមួយដ៏ល្អសម្រាប់លំហាត់ប្រាណបែបស្រស់ស្រាយ»។
យោគៈស្រាបៀរក្នុង ១ ម៉ោងតម្លៃ ៨ ដុល្លារ នៅម៉ោង ៦ ល្ងាចនាថ្ងៃអង្គារ ដោយមិនចាំបាច់ចុះឈ្មោះ និងទទួលបានស្រាបៀរ ១ កែវឥតគិតថ្លៃ។
សម្រាប់ព័ត៌មានបន្ថែមសុំចូលទៅកាន់ហ្វេសប៊ុក @TwoBirdsCraftBeer៕