ក្រុងសៀមរាបៈ គ្រាន់តែដាក់ដៃចូលក្នុងទឹកគឺអាចនឹងត្រងបានត្រីតែម្តង នេះគឺជាចក្ខុវិស័យរបស់សហគមន៍តំបន់អភិរក្សជីវចម្រុះបឹងពារាំង ខេត្តសៀមរាប។ គ្រាន់តែបីឆ្នាំប៉ុណ្ណោះបន្ទាប់សហគមន៍នៅតំបន់នេះស្រុះដៃគ្នាបំបាត់ការនេសាទខុសច្បាប់ ត្រីក៏ចាប់ផ្តើមកើនឡើងគួរឲ្យកត់សម្គាល់ហើយសត្វស្លាបជាច្រើនម៉ឺនក្បាលបានមករស់នៅបង្ករជាជំរកកាន់តែច្រើនឡើង។ «ប្រជាជននៅទីនេះមានឆន្ទៈក្នុងការអភិរក្ស ព្រោះពួកគាត់យល់អំពីគុណតំលៃអេកូទេសចរណ៍» នេះបើតាមការឲ្យដឹងពីលោកផាត បុរី ប្រធានគ្រប់គ្រង៣តំបន់កម្ពុជាឡាវនិងភូមារបស់ក្រុមហ៊ុន Booking.com ថ្លែងក្នុងឪកាសដែលលោករៀបចំកម្មវិធីថ្លែងអំណរគុណដល់បណ្តាអាជីវកម្មផ្ទះសំណាក់សណ្ឋាគារ ក្នុងវិស័យបដិសណ្ឋារកិច្ចនៅខេត្តសៀមរាប។
ថ្លែងមកកាន់ភ្នំពេញប៉ុស្តិ៍នៅប្របមាត់បឹង លោកបានចង្អុលទៅកាន់ម្ហូបជាច្រើនតម្រៀបគ្នារៀបចំទទួលអ្នកចូលរួមថា៖ «ជាធម្មតាយើងធ្វើកម្មវិធីនេះនៅក្នុងសណ្ឋាគារធំៗ លើកកែវស្រាឡើងជាការអបអរ តែឆ្នាំនេះយើងចង់បង្ហាញសហគមន៍ថាយើងបានលឺពួកគេ ហើយការដែលយើងអញ្ជើញមនុស្សរាប់រយអ្នកមកកាន់ទីនេះ ព្រោះយើងចង់ចូលរួមចំនែកគាំទ្រដល់ការខិតខំប្រឹងប្រែងនេះ។» ថ្លែងស្របគ្នានេះដែរ លោកសាន វឌ្ឍនា អគ្គនាយក សណ្ឋាគារ Hillocks ដែលបានចូលរួមចំនែកក្នុងការជួយជ្រុមជ្រែងឲ្យកម្មវិធីនេះឲ្យកើតមានឡើងដែលនោះ បានលើកឡើងពោពេញទៅដោយការលុងនឹងសម្រស់នៅទីនេះថា៖ «ជិះតែ២០នាទីប៉ុណ្ណោះពីក្រុង សៀមរាប ហើយការធ្វើតំណើមកកាន់ទីនេះយើងនឹងឃើញជីវភាពរបស់ប្រជាជនយ៉ាងរស់រវើក វាលស្រែដ៏ធំល្វឹងល្វើយ ហើយអ្នកក៏បានចូលមកដល់តំបន់នេះដោយមិនដឹងខ្លួនថាវានៅជិតក្រុងដល់ម្លឹង វាពិតជាស្អាតណាស់។» បឹងពារាំងជាតំបន់ព្រៃលិចទឹកទំហំ៣០០០ហិចតា ត្បិតវាសំបូរដើមឈើប៉ុន្តែសហគមន៍យល់ឃើញថាពួកគេត្រូវការដាំឈើបន្ថែមទៀត ហើយការដែល Booking.com នាំយកមនុស្សជាង២០០នាក់មកកាន់ទីនេះ ដើម្បីដាំដើមឈើ វាអាចនឹងក្លាយជាគំនិតផ្តួចផ្តើមមួយជាប្រពៃណីទៅអនាគត។ «មនុស្សគ្រប់គ្នាគួរមកដាំដើមឈើនៅទីនេះ ហើយឈ្មោះរបស់ពួកគេនឹងត្រូវចងចាំ» នេះគឺជាការលើកឡើងដោយលោកគង់ មង្គល ប្រធានសហគមន៍បឹងពារាំង។
ទោះជាយ៉ាងណាលោកវឌ្ឍនា បានលើកឡើងបន្ថែមទៀតថា៖ «នៅថ្ងៃនេះយើងឃើញមានម្ចាស់សណ្ឋាគារជាច្រើនមានវត្តមាននៅទីនេះ តើយើងគួរត្រូវធ្វើអ្វីខ្លះទៀតដើម្បីជួយបំពេញការខ្វះចន្លោះដើម្បីឲ្យយើងអាចរៀបចំទទួលភ្ញៀវមកកំសាន្តនៅទីនេះបានងាយស្រួល។» លោកបានលើកឡើងបន្ថែមទៀតថា៖ «នៅទីនេះមានកូនកោះតូចៗជាច្រើនអាចឲ្យយើងរៀបចំជាការបោះតង់ប្រណិតអីជាដើម តែតំបូងយើងត្រូវគិតថាពេលភ្ញៀវមកដល់តើពួកគាត់នឹងត្រូវការអ្វីខ្លះ ហើយអ្វីខ្លះនោះឯងដែលយើងជាអ្នកដែលមានធនធានត្រូវជួយគ្នាតិចឫច្រើនផ្តល់ជូនដល់សហគមន៍ដោយផ្ទាល់។»
ទាំងសហគមន៍ និងវិស័យឯកជនបានលើកឡើងពីសារៈសំខាន់នៃការអភិវឌ្ឍន៍ប្រកបដោយចីរភាពនៅតំបន់អភិរក្សជីវចម្រុះបឹងពារាំងនេះ ពួកគេមានជំនឿថាភាពជោគជ័យនៃគម្រោងនៅទីនេះនឹងមានជំហ៊ានទៅមុខកាន់តែលឿនប្រសិនបើមានការចូលរួមរួមគ្នាទាំងវិស័យឯកជន និងការគាំទ្រពីមន្ត្រីថ្នាក់ជាតិរួមគ្នាបំពេញចន្លោះផ្សេងគ្នាពីលើឆន្ទៈរបស់សហគមន៍ និងមន្ត្រីថ្នាក់ក្រោមជាតិដែលមានស្រាប់។