ក្រុងប៉ារីស៖ ទឹកសូកូឡាខាប់ៗនៅក្នុងឆ្នាំងដែករមែងប្រទះឃើញជារឿយៗនៅក្នុងកម្មវិធីដុតនំ តែនេះជាកម្មវិធីម្ហូបដ៏គួរឱ្យទាក់ទាញ និងប្លែក ខណៈមេចុងភៅបារាំងថ្មីកំពុងតែល្បីជាមួយនឹងការចម្អិនម្ហូបពីក្នុងពន្ធនាគារ។
ស្វាគមន៍មកកាន់ DanyHellz Kitchen គណនីអ៊ីនស្ដាក្រាមអ្នកទោសបារាំងម្នាក់ដ៏មានប្រជាប្រិយ ដែលបានបង្កើតមុខម្ហូប tagines បង្អែម tiramisus និងភីហ្សា ជាមួយសម្ភារផ្ទះបាយតិចតួច ដែលលោកត្រូវបានអនុញ្ញាតឱ្យប្រើប្រាស់នៅក្នុងគុក។
«យើងអាចធ្វើអ្វីៗបានគ្រប់យ៉ាងពីបាតដៃទទេ» គឺជាពាក្យស្លោករបស់ចុងភៅ ដែលបានថតវីដេអូខ្លួនឯងតាមរយៈទូរស័ព្ទដៃផ្ទាល់ខ្លួន តែមិនបានបង្ហាញមុខលើកាមេរ៉ា ដើម្បីរក្សាភាពអនាមិក ដែលការប្រើប្រាស់ទូរស័ព្ទក្នុងគុកក៏ត្រូវបានហាមឃាត់ផងដែរ។
Dany (មិនមែនជាឈ្មោះពិត) បាននិងកំពុងជាប់ពន្ធនាគារ ៧ ឆ្នាំពីបទជួញដូរសារធាតុខុសច្បាប់។
លោកបានប្រាប់ AFP ក្នុងបទសម្ភាសតាមទូរស័ព្ទថា៖ «ក្រោយពីរយៈពេល ២ ទៅ ៣ ឆ្នាំមក អាហារក្នុងគុកពិតជារងាន់ណាស់ ហើយវាមានរសជាតិដដែល។ ដូច្នេះ ខ្ញុំក៏ព្យាយាមធ្វើម្ហូបប្លែក»។
វីដេអូរបស់លោកផ្ដល់នូវពន្លឺស្រស់បំព្រងក្នុងទិដ្ឋភាពនៃជីវិតអ្នកទោសជាមួយការប្រើពន្លឺភ្លើងចាំងចូលតាមបង្អួចគុក និងមានទូរទស្សន៍តូច ១ នៅលើជញ្ជាំង។
សម្រាប់ Dany ជាអ្នកបញ្ចប់ការសិក្សាមកពីតំបន់អាហ្វ្រិកខាងជើង ការចម្អិនម្ហូបគឺជាទម្រង់នៃការព្យាបាលផ្លូវចិត្ដម្យ៉ាង។
លោកត្រូវជ្រើសរើសថា តើលោកត្រូវកាន់ថាសបាយទៅដួសត្រីចំហុយ ឬបន្លែជាមួយប្រេងអូលីវ និងខ្ទឹមស ឬក៏លោកបង្កើតមុខម្ហូបខ្លួនឯង ដោយប្រើវត្ថុធាតុដើមផ្ទះបាយក្នុងគុក។
លោកក៏បានទទួលកញ្ចប់ម្ហូបពីមិត្ដភក្ដិ និងក្រុមគ្រួសារផងដែរ។
ដោយមិនអាចប្រើសម្ភារមុខស្រួច លោកបានហាន់ និងចិតសម្បកដោយប្រើកាំបិតមុខទាល។
អ្នកទោសមិនត្រូវបានអនុញ្ញាតឱ្យប្រើដំបែ ដែលអាចច្នៃផលិតជាអាល់កុល ជាហេតុដែលបង្កការលំបាកក្នុងការចម្អិនម្ហូបរបស់លោក Dany តែគ្មានអ្វីអាចរាំរាំងលោកឡើយ។
វីដេអូឃ្លីប ១ លើបណ្ដាញសង្គមអ៊ីនស្ដាក្រាម ដែលលោកមានអ្នកគាំទ្រជិត ៣ ម៉ឺននាក់បានបង្ហាញថា លោកផលិតនំខួបកំណើតថែមទៀត៕ HR
