.jpg)
លោក ពេជ សារ៉ាត ប្រធានសហគមន៍ចាប៉ីអមតៈ និងដៃគូចម្រៀងចាប៉ីឆ្លើយឆ្លង។ រូបថត សហការី
ភ្នំពេញ៖ ក្រោយពីចាប៉ីដងវែងខ្មែរ ត្រូវបានចុះបញ្ជីជាសម្បត្តិបេតិកភណ្ឌអរូបីនៃមនុស្សជាតិរបស់អង្គការយូណេស្កូ កាលពីថ្ងៃទី ៣០ ខែ វិច្ឆិកា ឆ្នាំ ២០១៦ មកនោះសហគមន៍ចាប៉ីអមតៈ កំពុងដើរតួយ៉ាងសំខាន់ក្នុងការផ្សព្វផ្សាយបន្តដល់មហាជន ហើយនាពេលបច្ចុប្បន្ននេះ ទម្រង់សម្តែងចាប៉ីដងវែងហាក់ទទួលចំណាប់អារម្មណ៍ពីមជ្ឈដ្ឋានក្រៅគួរឲ្យកត់សម្គាល់ផងដែរ។
តាមធម្មតាទម្រង់សិល្បៈចាប៉ីដងវែង នៅសម័យកាលទំនើបនេះ រមែងឃើញសម្តែងនៅក្នុងកម្មវិធីធំៗ ឬកម្មវិធីមហោស្រពផ្សេងៗ កម្រមានវត្តមានការសម្តែងនៅក្នុងកម្មវិធីបុណ្យតូចតាចនៅជនបទ ឬភូមិណាស់។ តែរយៈពេល ២-៣ ឆ្នាំចុងក្រោយនេះ គេសង្កេតឃើញថា ទម្រង់សិល្បៈចាប៉ីដងវែង ហាក់មានភាពបត់បែនទៅតាមស្ថានភាពជាក់ស្តែងនៃការនិយមចូលចិត្តជាបណ្តើរពីមជ្ឈដ្ឋានខាងក្រៅ ដោយមានការយកទៅសម្តែងនៅក្នុងពិធីជ័យមង្គលកូនកំលោះកូនក្រមុំ (មង្គលការ) និងពិធីបុណ្យចម្រើនព្រះជន្មជាដើម។
យ៉ាងណាមិញនៅចុងសប្តាហ៍នេះ គឺថ្ងៃទី ៧ ខែ មីនា ឆ្នាំ ២០២០ ក៏មានបងប្អូនខ្មែររស់នៅក្នុងភូមិ និងឃុំព្រែកក្រឹស ស្រុកកំពង់ត្រាច ខេត្តកំពត បានជួលក្រុមសិល្បៈចាប៉ីដងវែងរបស់ក្រុមសហគមន៍ចាប៉ីអតមៈ ទៅសម្តែងក្នុងឱកាសបុណ្យចម្រើនព្រះជន្មផងដែរ។
លោក ពេជ្រ សារ៉ាត ប្រធានសហគមន៍ចាប៉ីអមតៈ បានឲ្យដឹងថា៖ «កម្មវិធីបុណចម្រើនព្រះជន្ម នៅខេត្តកំពត ដើម្បីបង្ហាញ និងសម្តែងសិល្បៈបុរាណ ៣ ទម្រង់។ ចម្រៀងចាប៉ីដងវែង ជាក្រុមច្រៀងឆ្លងឆ្លើយទម្រង់របាំ ចម្រៀងមហោរី និងប្រជាប្រិយ។ សូមពុកម៉ែ បងប្អូន ចូលរួមគាំទ្រ យុវជនជំនាន់ក្រោយ ដើម្បីរួមគ្នាធានានិរន្តរភាពសិល្បៈបុរាណខ្មែរយើង ខណៈក្រុមសិល្បករ-សិល្បការិនីសរុបមានចំនួនប្រមាណជិត ២០ នាក់ មាននារី ៧ នាក់»។
លោក ពេជ សារ៉ាត ប្រធានសហគមន៍ចាប៉ីអមតៈ និងដៃគូចម្រៀងចាប៉ីឆ្លើយឆ្លង។ រូបថត សហការី
ប្រធានសហគមន៍ចាប៉ីអមតៈរូបនេះបន្តថា៖ «ដោយសារជិតដល់ទិវាសិទ្ធិនារីផងនោះ យើងមានគម្រោងជ្រើសរើសយកប្រធានបទសំខាន់ៗទៅសម្តែងចាប៉ីដងវែងនេះផងដែរ ខណៈយើងនឹងលើកយកប្រធានបទសំខាន់មកសម្តែង និងច្រៀងរៀបរាប់ពីរឿងរ៉ាវរបស់ស្រ្តី។ ជាមួយគ្នានេះ យើងនឹងបកស្រាយពីប្រធាន «ស្រ្តីជាមាតាពិភពលោក និងតំណាលពីគុណមាតា» ផងដែរ នាឱកាសសម្តែងក្នុងពិធីបុណ្យនេះ»។
គួររំឭកដែរថា នៅក្នុងពិធីមង្គលការលោក ពេជ សារ៉ាត និងភរិយា ជាគ្រូបង្រៀននៅឯវិទ្យាល័យសុខអានដូងខ្ពស់ កាលពីថ្ងៃទី ២៤ ខែ កុម្ភៈ ឆ្នាំ ២០១៩ កន្លងមក នៅភូមិ និងឃុំដូងខ្ពស់ ស្រុកបុរីជលសាខេត្តតាកែវ លោក ពេជ សារ៉ាត ប្រាប់ថា៖ «ដោយសារតែចាប៉ីដងវែងខ្មែរ យើងជាសម្បត្តិវប្បធម៌នៃមនុស្សជាតិរបស់អង្គការយូណេស្កូ ដែលបានចុះបញ្ជីកាលឆ្នាំ ២០១៦ នោះហើយខ្ញុំចង់ឲ្យកេរ្តិ៍ឈ្មោះឧបករណ៍ភ្លេងបុរាណខ្មែរមួយនេះ កាន់តែទទួលបានការចាប់អារម្មណ៍ស្វែងយល់ និងស្គាល់បានច្រើនពីសំណាក់បងប្អូនខ្មែរគ្រប់វ័យ ជាពិសេសកុមារតូចៗតែម្តង ហើយក៏ចូលរួមជួយអភិរក្សថែរក្សានូវមរតកដូនតាយើង។ ដូច្នេះនៅក្នុងពិធីមង្គលការខ្ញុំ ក៏សម្រេចចិត្តយកចាប៉ីដងវែងដាក់តាំងបង្ហាញថ្ងៃសិរីសួស្តីនោះ ដោយយល់ស្របពីភរិយា និងចាស់ទុំទាំងសងខាងផងដែរ»៕
