The Phnom Penh Post Search

Search form




Logo of Phnom Penh Post newspaper Phnom Penh Post - ទស្សនា​គំនូរ​សិល្បៈ​លើ​ជញ្ជាំង​ក្នុង​ក្រុង​ ​ភ្នំពេញ ​តាម​ក្បួន​រ៉ឺម៉ក​




ទស្សនា​គំនូរ​សិល្បៈ​លើ​ជញ្ជាំង​ក្នុង​ក្រុង​ ​ភ្នំពេញ ​តាម​ក្បួន​រ៉ឺម៉ក​

Content image - Phnom Penh Post
រូប​អសុរ ជា​គំនូរ​ក្រាហ្វី​ធី​ដែល​ប្រើថ្នាំ​ពណ៌​បាញ់​នៅ​លើ​ជញ្ជាំង​។ វិទ្យាស្ថានបារាំង​

ទស្សនា​គំនូរ​សិល្បៈ​លើ​ជញ្ជាំង​ក្នុង​ក្រុង​ ​ភ្នំពេញ ​តាម​ក្បួន​រ៉ឺម៉ក​

ភ្នំពេញៈ វិទ្យាស្ថាន​បារាំង​នឹង​រៀបចំ​នូវ​កម្មវិធី​មហោ​ស្រពសិល្បៈ​ទីក្រុង​កម្ពុជា​លើកទី ២ ដោយ​កម្ម​វិធីបាន​បើកសម្ពោធ​ចាប់​តាំងពី​ថ្ងៃទី ៣១ ខែមីនា​កន្លង​មក និង​បន្ត​រហូត​ទៅដល់​ថ្ងៃទី ២៣ ខែមេសា​ ឆ្នាំ ២០១៦ ខាងមុខ ខណៈ​ដំណើរកម្សាន្ត​ទស្សនា​នូវគំនូរ​តាម​ជញ្ជាំង​ជាមួយ​នឹង​ក្បួន​រ៉ឺម៉ក​ម៉ូតូ​ចំនួន ៥០ គ្រឿង​នឹងចាប់​ផ្តើម​ចេញដំណើរ​នៅថ្ងៃ​សៅរ៏ទី ២ ខែ​មេសា។

ព្រឹតិ្តការណ៍​មហោ​ស្រពនេះ​ធ្វើ​ឡើង​ក្នុង​គោលបំណង​មួយគឺ​ដើម្បី​ចែក​រំលែក​ចំណេះដឹង​អំពី​ទម្រង់​សិល្បៈ វប្បធម៌​ តន្ត្រី​ ខ្សែភាពយន្ត​ និង​ទម្រង់​ស្នាដៃ​វិចិត្រ​កម្មខ្មែរ​ និង​ទម្រង់​សិល្បៈ​របស់​បរទេស​ជាច្រើន​ទៀតដែរ​ ជាពិសេស​ការទស្សនា​នូវគំនូរ​ប្រភេទ​ជាក្រាហ្វីធី (Graffiti) ដែល​ស្ថិតនៅលើ​របង​នៃ​ដង​វិថី​នានា​ក្នុង​រាជធានី​ភ្នំពេញ​ ដែល​ប្រើក្បួន​យាន​ជំនិះ​ជារ៉ឺម៉ក​ម៉ូតូ​មាន​ចំនួន​ប្រមាណ ៥០ គ្រឿង​សម្រាប់​ដឹកអ្នក​ទស្សនា។

​អ្នកស្រី សុផាន់ លក្ខិណា បុគ្គលិកផ្នែក​ទំនាក់​ទំនង​នៅ​វិទ្យាស្ថាន​បារាំង​ បាន​ឲ្យដឹងថា៖ «សម្រាប់ការ​ប្រារព្ធ​ធ្វើជា​លើកទី ២ នាឆ្នាំ ២០១៦ នេះ​លោក ជីហ៊្វូមី នាយក​សិល្បៈ​នៃ​កម្មវិធីនេះ អញ្ជើញ​វិចិត្រករ​ទាំងខ្មែរ និង​បរទេស​មានចំនួន ១៤​ រូប ដើម្បី​ធ្វើ​ការគូរ​គំនូរលើ​ជញ្ជាំង​នៅឯ​វិទ្យាស្ថាន និងគូរ​នៅ​កន្លែង​ផ្សេងៗ​ទៀត​ក្នុងរាជធានី​ភ្នំពេញ ចំនួន ៨ កន្លែងឯណោះ»។

Content image - Phnom Penh Post
រូប​គំនូរ​ស្រ្តី​ស្គមម្នាក់​ប្រើ​ម្រាម​ដៃ​ទាំង​ពីរ​របស់​ខ្លួនហៀប​ និង​ច្របាច់​អ្វីមួយ។ វិទ្យាស្ថានបារាំង​

ក្រុមវិចិត្រករ​ទាំង​ ១៤ រូបដែល​ចូលរួម​បង្ហាញ​ស្នាដៃខ្លួន​នៅឆ្នាំ ២០១៦ នេះ​រួមមាន លោក ជីហ៊្វូមី ថេអូ វ៉ាលីយើ ជនជាតិ​បារាំង​ជានាយក និង​ជាប្រធាន​ក្រុម​វិចិត្រករ ​លោក កុយ គីមឈាន ជា​វិចិត្រករ​ខ្មែរ​ លោក ម៉ៃក៍ លោក ហ្គុតដ័ក លោក សេស ណ័រប្រេ លោក អេរីក ហ្គុងសាឡេ លោក ដាវីត​ដូ លោក មីអូសេ លោក​ ស៊ីយ៉ារូហ្វីគ្រី សាឡេស វិចិត្រករ​ជាតិអង់គ្លេស លោក វេនគ៍ និងក្រុម​វិចិត្រករ Alias 2.0។

អ្នកស្រី សុផាន់ លក្ខិណា បន្តថា៖ «ក្រៅពី​កម្មវិធី​ទស្សនា​គំនូរ​ក្រាហ្វីធី​ យើងក៏​មានការ​រៀបចំការ​សម្តែងគំនូរ​ពន្លឺ​របស់​ក្រុម​វិចិត្រករ Alias 2.0 ការសម្តែង​តន្រ្តី​របស់​ក្រុម​ Klapyahands និង​ 12ME ការ​សម្តែងរបាំ និង​ក្បាច់យុទ្ធ​គុន​របស់ក្រុម​សិល្បករ​មក​សាលាហ្វា​ពន្លឺ​សិល្បៈ​ទៀតផង»។

ក្បួនរ៉ឺម៉ក​ម៉ូតូចេញ​ដំណើរ​ពី​វិទ្យាស្ថាន​បារាំងចាប់​ពីម៉ោង ២ រសៀល​ និង​ទៅបញ្ចប់​នៅឯ​ភោជនីយដ្ឋាន The Mansion លើដង​វិថី​ព្រះសុធារស ដែល​ជាទី​កន្លែងមាន​គំនូរ​របស់ ថេអូ វ៉ាលីយើរ និង​ដាវីដូ។

សម្រាប់អ្នកចាប់​អារម្មណ៍​ចូលរួម​ទស្សនា​នូវគំនូរ​ជញ្ជាំងនានា​នៅ​តាម​ដង​វិថី​ដោយ​ក្បួនរ៉ឺម៉ក​ម៉ូតូនោះ​គឺត្រូវ​ជាវ​សំបុត្រមួយ​តម្លៃ ១០ ដុល្លារ ដោយ​តម្រូវ​ឲ្យមាន​ការ​ចុះឈ្មោះ​ជាមុន​នៅ​វិទ្យាស្ថាន​បារាំងព្រោះ​ថា​កន្លែង​មានចំនួន​កំណត់​ត្រឹមតែ​ ១៧០ កៅអី​ប៉ុណ្ណោះ៕​

អត្ថបទគួរចាប់អារម្មណ៍