ភ្នំពេញៈ ទន្ទឹមនឹងមានការបង្ហាញពីទម្រង់សិល្បៈចម្រុះរួមមានការសម្តែងរបាំ ល្ខោន សៀក ការបញ្ចាំងខ្សែភាពយន្ត កិច្ចពិភាក្សា និងសិក្ខាសាលាស្តីពីសិល្បៈនានាក្នុងការបើកព្រឹត្តិការណ៍សិល្បៈដ៏ធំដំបូងឈ្មោះរដូវវប្បធម៌ របស់អង្គការសិល្បៈខ្មែរអមតៈ (CLA) ក្រោមប្រធានបទថា «ស្វែងរកអត្តសញ្ញាណ» នោះ ក៏ប្រារព្ធធ្វើពិធីតាំងពិព័រណ៍រូបថតរបស់អ្នកថតរូបម្នាក់ ដែលកាត់ខ្មែរបរទេស ១ រូបដែរ នៅឯមជ្ឈមណ្ឌលបុប្ផាណា ក្រោមប្រធានបទ «ភាសាជាឧបសគ្គមួយ» ក្នុងអាជីព។
តាំងពិព័រណ៍រូបថតរបស់អ្នកថតរូបកាត់ខ្មែរបរទេស ឈ្មោះលោក ស៊ីវ សេរី ត្រូវបានបើកសម្ពោធ កាលពីល្ងាចថ្ងៃទី ១៥ ខែសីហា និងបន្តដាក់តាំងដើម្បីចែកជូនឲ្យភ្ញៀវទស្សនារហូតទៅដល់ថ្ងៃទី ២០ ខែកញ្ញា ឆ្នាំ ២០១៨។
លោក ឥន្ទ សម៉ាណាក់ អ្នកចាត់ចែងរដ្ឋបាលរៀបចំកម្មវិធីរដូវវប្បធម៌នៃអង្គការសិល្បៈខ្មែរអមតៈក៏ប្រាប់ពីគោលបំណងនៃការតាំងពិព័រណ៍របស់អ្នកថតរូបកូនកាត់លោក ស៊ីវ សេរី ដែលបានដាក់ប្រធានបទ «ភាសាជាឧបសគ្គមួយ» នោះថា៖ «ដោយសារតែលោក ស៊ីវ សេរី កូនកាត់ខ្មែរបរទេស ហើយនៅពេលលោកប្រកបរបរជាអ្នកថតរូប នៅតាមតំបន់នានា តែងតែបានជួបនូវបញ្ហាច្រើនជារឿយៗ ដែលទាក់ទងទៅនឹងការប្រើប្រាស់ភាសា ដើម្បីនិយាយទំនាក់ទំនង។ ដូច្នេះហើយទើបលោកបានសហការជាលើកដំបូងជាមួយអង្គការសិល្បៈខ្មែរអតមៈ ដើម្បីប្រមូលយករូបយ៉ាងច្រើន ដែលលោកបានជួបគឺជាបញ្ហាផ្នែកភាសានោះមកដាក់តាំងពិព័រណ៍តែម្តងនៅបុប្ផាណា។
លោក សេរី ជឿថា ភាសា និងអត្តសញ្ញាណមិនអាចផ្តាច់ចេញពីគ្នាបាន។ ហេតុនេះទើបគាត់បង្កើតគម្រោងរូបថតមួយដើម្បីជាការបង្ហាញពីរឿងរ៉ាវអត្តសញ្ញាណ ដែលមិនសូវជាមានគេនិយាយ។
ចំពោះរដូវវប្បធម៌ ផ្តោតលើការស្វែងរកអត្តសញ្ញាណ ដែលមានរយៈពេល ៣ ខែ ដោយរួមមាន ការសម្ដែង ការបញ្ចាំងខ្សែភាពយន្ត កិច្ចពិភាក្សា ពិព័រណ៍ និងសិក្ខាសាលាដែលត្រូវបានសម្រិតសម្រាំង និងនាំមកជូនដោយអង្គការសិល្បៈខ្មែរអមតៈ ជុំវិញប្រធានបទថា «ការស្វែងរកអត្តសញ្ញាណ» ដោយចាប់ផ្តើមតាំងពីថ្ងៃទី ១៩ ខែកក្កដា មកហើយបន្តដល់ថ្ងៃទី ២៣ ខែកញ្ញា ឆ្នាំ ២០១៨ ខាងមុខ។
ឯពិព័រណ៍រូបថតនេះ ចាប់ផ្តើមពីថ្ងៃទី ១៥ ខែសីហា ដល់ទី ២០ ខែកញ្ញា ឆ្នាំ ២០១៨៕