ភ្នំពេញៈ ការបង្ហាញពីទម្រង់សិល្បៈខ្មែរចម្រុះដែលរៀបចំដោយអង្គការសិល្បៈខ្មែរអមតៈ ដែលមានរយៈពេល ៣ ខែ ក្រោមប្រធានបទ «ការស្វែងរកអត្តសញ្ញាណ» នឹងបញ្ចប់នៅចុងខែនេះហើយ ខណៈចាប់ពីថ្ងៃទី ១៣ ដល់ទី ២០ ខែកញ្ញា ខាងមុខនេះដែរ មានខ្សែភាពយន្តចំនួន ៥ រឿង នឹងត្រូវបញ្ចាំងដើម្បីចែកជូនមហាជនទស្សនា ដោយសេរីនៅឯវិទ្យាស្ថានបារាំង និងនៅមជ្ឈមណ្ឌលបុប្ផាណា ស្តីពីស្ថានភាពជីវិតរស់នៅរបស់ពលរដ្ឋខ្មែរ។
កញ្ញា ជឿន សុជាតា អ្នកសម្របសម្រួលព្រឹត្តិការណ៍ និងទំនាក់ទំនងនៃអង្គការសិល្បៈខ្មែរអមតៈ បង្ហើបឲ្យដឹងសាច់រឿងត្រួសៗនៃខ្សែភាពយន្តទាំងនោះថា៖ «ខ្សែភាពយន្តទាំង ៥ រឿងនោះ នឹងឆ្លុះបញ្ចាំងអំពីរឿងរ៉ាវនានារបស់ប្រជាជនខ្មែរ មានជីវិតរស់នៅទាំងក្រៅប្រទេស និងក្នុងប្រទេសកម្ពុជា ដោយមានលក្ខណៈស៊ីគ្នាទៅនឹងប្រធានបទរួមនៃកម្មវិធីខាងលើ។ តែក៏មិនមានន័យថា ជាហេតុការណ៍ដែលស្តីអំពីអត្តសញ្ញាណខ្មែរមួយមុខនោះទេគឺមាននិយាយពីការរស់នៅរបស់អ្នកកូនកាត់ជាជនជាតិចិន និងវៀតណាមផងដែរ»។
ខ្សែភាពយន្តទាំង ៥ នោះរួមមានដូចជារឿង «Une Minorite Visible Invisible» ផលិតដោយលោក Mathieu PHENG មានបង្ហាញពីកិច្ចពិភាក្សាអំពីប្រជាជនកម្ពុជារស់នៅក្រៅប្រទេស នារយៈពេល ៤០ ឆ្នាំបន្ទាប់ពីរបបប៉ុលពតបានបញ្ចប់ ជនអន្តោប្រវេសន៍កម្ពុជាជំនាន់ទី ២ ដែលស្ថិតក្នុងភាពមិនច្បាស់រវាងវប្បធម៌ ២ ផ្សេងគ្នា។
រឿងនេះនឹងចាក់បញ្ចាំងនៅវិទ្យាស្ថានបារាំង ម៉ោង ៦:៣០ ដល់ ៨:៣០យប់ថ្ងៃទី ១៣ ខែកញ្ញា។ ខ្សែភាពយន្តទី ២ រឿង «កុំស្មានបងភ្លេច ខ្មែរបាត់បង់តន្ត្រីរ៉ក់» ផលិតដោយ John PIROZZI បញ្ចាំងនៅមជ្ឈមណ្ឌលបុប្ផាណា ពីម៉ោង ៦:៣០ ដល់ ៨:៣០ យប់ថ្ងៃទី ១៧ ខែកញ្ញា។
ខ្សែភាពយន្តទី ៣ រឿង «ខ្ញុំទៅណា» របស់ផលិតករវ័យក្មេងលោក នាង កាវិច មានរយៈពេល ៥៥ នាទី និយាយភាសាខ្មែរ និងមានបកប្រែជាភាសាអង់គ្លេស ចាក់បញ្ចាំងនៅមជ្ឈមណ្ឌលបុប្ផាណា ពីម៉ោង ៦:៣០ ដល់ ៨:៣០ យប់ ថ្ងៃទី ១៨ ខែកញ្ញាឆ្នាំ ២០១៨។
ភាពយន្តទី ៤ រឿង «BGirl» ផលិតដោយ ងឿម ផល្លី និង ណាម រដ្ឋា ថូម៉ាស អមដោយសកម្មភាពសិក្ខាសាលាស្វែងរកអត្តសញ្ញាណកម្ពុជាយើង សម្របសម្រួលដោយអង្គការនារីដើម្បីសន្តិភាព បញ្ចាំងនៅមជ្ឈមណ្ឌលបុប្ផាណា ពីម៉ោង ២:៣០ ដល់ ៥:០០ ល្ងាច នៅថ្ងៃទី ១៩ ខែកញ្ញា។
ភាពយន្តទី ៥ រឿង «ស្រុកខ្មែរ! នេះហើយខ្ញុំ!» ផលិតដោយ ភូស្សង់ បាទីស្ត៍ មានរយៈពេល ៧៤ នាទី និយាយភាសាខ្មែរ និងមានបកប្រែភាសាអង់គ្លេស បញ្ចាំងនៅឯមជ្ឈមណ្ឌលបុប្ផាណា ចាប់ពីម៉ោង ៦:៣០ ដល់ ៨:៣០ យប់ នៅថ្ងៃទី ២០ ខែកញ្ញា ឆ្នាំ ២០១៨៕