.jpg)
របាំ «ពេលផ្សែងរត់ចេញពីរាងកាយ» សម្តែងនៅវិចិត្រសាល សស។ រូប Tony Nguyen
ភ្នំពេញៈ នាថ្ងៃទី ១៣ ខែមីនា ឆ្នាំ ២០១៩ ខាងមុខនេះនឹងមានការសម្តែងរបាំរឿងបែបជារបាំសហសម័យដោយអ្នកសម្តែងលោក ជូរី ហ៊ន នៅឯវិចិត្រសាលនៃគម្រោងសិល្បៈ សស មានរយៈពេលកន្លះម៉ោងគឺចាប់ពីម៉ោង ៦ និង ៣០ នាទីដល់ម៉ោង ៧ យប់រៀបរាប់ពីជីវិតម្តាយរបស់លោកដែលនៅសល់ជីវិត ក្រោយពីរបបប្រល័យពូជសាសន៍ ប៉ុល ពត ។
ការសម្តែងរបាំសហសម័យទោលដោយអ្នករបាំវ័យក្មេងគឺលោក ជូរី ហ៊ន ដែលបានប្រើប្រាស់បច្ចេកទេសច្នៃប្រឌិតជារបាំដែលមានលក្ខណៈច្របាច់បញ្ចូលគ្នាជាមួយនឹងវប្បធម៌ខ្មែរជាមធ្យោបាយដើម្បី ដោះស្រាយបញ្ហាដែលប្រឈម និងការលើកកម្ពស់ពីសហគមន៍ខ្មែរនៅអាមេរិកាំងក្រោមប្រធានបទរឿងមួយដែលមានចំណងជើងថា៖ «ពេលផ្សែងរត់ចេញពីរាងកាយ»។
បើតាមសេចក្តីប្រកាសព័ត៌មាននៃគម្រោងសិល្បៈ សស បានបង្ហើបឲ្យដឹងថា៖ «របាំនេះបានកកើតឡើងចេញពីការតំណាលនៃសម្តីរបស់លោកស្រី សារ៉ូ មួយដែលត្រូវជាម្តាយរបស់លោក ជូវី ហ៊ន ។ សម្តីនោះនិយាយថា៖ «វាហាក់ដូចជាខ្ញុំត្រូវបានកើតម្តងទៀត» ជាពាក្យមួយឃ្លាដែលបង្ហើបចេញពីមាត់ លោកស្រី សារ៉ូ មួយ។ សារមួយឃ្លានេះគឺចង់បង្ហាញពីប្រវត្តិនៃការរស់រានមានជីវិតពីរបបប្រល័យពូជសាសន៍ខ្មែរក្រហមកាលពីឆ្នាំ ១៩៧៥ ដល់ឆ្នាំ ១៩៧៩ និងនៅពេលគាត់បានមកដល់ទឹកដីសហរដ្ឋអាមេរិកនៅឆ្នាំ ១៩៩០»។
លោក ជូរី ហ៊ន នឹងសម្តែងរបាំរឿង «ពេលផ្សែងរត់ចេញពីរាងកាយ»។ រូបថត ហ្វេសប៊ុក
ប្រភពព័ត៌មានដដែលនេះបន្តឲ្យដឹងថា៖ «របាំនេះបង្ហាញពីរឿងរ៉ាវមួយ ឆ្លុះបញ្ចាំងពីភាពសោកសៅរបស់ម្តាយលោក ជូរី ហ៊ន ដែលធ្លាប់បានឆ្លងកាត់នូវអតីតកាល និងការកសាងជីវិតថ្មីដោយបានចឹញ្ចឹមគ្រួសារមួយមានសមាជិក ៨ នាក់នៅលើទឹកដីបរទេស។ ចំពោះធាតុផ្សំនៃការសម្តែងរបាំគឺមានពន្លឺដែលអាចព្យាបាលផ្លូវចិត្ត និងទឹកជានិមិត្តរូបសម្រាប់ការកកើតជាថ្មី។
ដោយឡែកគម្រោងនេះដែរក៏ត្រូវបានបង្កើតឡើងតាមរយៈការសិក្សាស្រាវជ្រាវនៅប្រទេសកម្ពុជាចាប់តាំងពីថ្ងៃទី ១៥ ខែមករានឹងបន្តមកដល់ថ្ងៃទី ១៥ ខែមីនាឆ្នាំ ២០១៩ ខាងមុខនេះដែរដោយសារមានការគាំទ្រជំនួយពីក្រុមអ្នករបាំសហសម័យ»។
ដោយឡែកសិល្បកររបាំសហសម័យលោក ជូរី ហ៊ន ដែលកែច្នៃ និងប្រើបច្ចេកទេសរបាំបែបច្របាច់បញ្ចូលគ្នាជាមួយវប្បធម៌ខ្មែរឲ្យទៅជាមធ្យោបាយដើម្បីដោះស្រាយបញ្ហាប្រឈម និងការលើកកម្ពស់ទៅដល់សហគមន៍ខ្មែរនៅអាមេរិកផងដែរ។ ម្យ៉ាងទម្រង់សិល្បៈខ្មែរក៏បានរស់រានមានជីវិតតាមរយៈគ្រូរបាំជាច្រើនផងដែរដូចជា ចរិយា ប៊ឺត , ជ័យ ច័ន្ទកិត្យា និង ឱក ព្រហ្មសុដន្ត្រ ដែលពួកគាត់គឺជាកម្លាំង និងភាពរឹងមាំដ៏ពិតប្រាកដរបស់ប្រជាជនកម្ពុជា។ លោក ជូរី ហ៊ន ក៏ជានិស្សិតម្នាក់ដែលទទួលបានសញ្ញាបត្របរិញ្ញារបាំពីសាកលវិទ្យាល័យ Sacramento University ដែលមានមូលដ្ឋាននៅរដ្ឋកាលីហ្វ័រនីញ៉ា សហរដ្ឋអាមេរិកផងដែរ ។
ការចូលទស្សនារបាំនេះនៅឯវិចិត្រសាល សស មានទីតាំងស្ថិតនៅផ្ទះលេខ ៤៧ ផ្លូវលេខ ៣៥០ (ជិតកែងផ្លូវ ៩៥)៕
