.jpg)
ទម្រង់របាំសហសម័យឈ្មោះថា «រាត្រីនៃការផ្លាស់ប្តូរ ឬការលេចឡើង» នឹងសម្តែងក្នុងកម្មវិធី ៣ ថ្ងៃនៃរបាំ។ រូបថត វិទ្យាស្ថានបារាំង
ភ្នំពេញៈ ចំនួន ៣ រាត្រីជាប់គ្នាគឺចាប់ផ្តើមពីល្ងាចថ្ងៃទី ១៤ ខែកុម្ភៈនៅចំថ្ងៃប្រារព្ធទិវានៃក្តីស្រឡាញ់ដល់ថ្ងៃទី ១៦ ខែកុម្ភៈ ឆ្នាំ ២០១៩ នឹងមានការសម្តែងទម្រង់របាំសហសម័យដោយក្រុមនាដកានៃក្រុមសិល្បករកម្ពុជាជំនាន់ថ្មី ដើម្បីបង្ហាញនូវទម្រង់សិល្បៈរបាំសហសម័យកែច្នៃ និងទេពកោសល្យរបស់ពួកគេនៅវិទ្យាស្ថានបារាំងចូលរួមទស្សនាដោយសេរី។
លោក ឆន ប៊ុនឈឿន បុគ្គលិកផ្នែកទំនាក់ទំនងព័ត៌មាននៃវិទ្យាសា្ថនបារាំង បានឲ្យដឹងថា៖ «នៅក្នុងរយៈពេលសម្តែងចំនួន ៣ ថ្ងៃនេះឈុតឆាកនៃរបាំសហសម័យដែលសម្តែងតាមរយៈកម្មវិធីរបស់វិទ្យាស្ថានបារាំងបានអញ្ជើញអ្នកនាដកា កញ្ញា ជុំវណ្ណ សូដាជីវី ហៅ ប៊ែល និងអ្នកនាង ហ៊ុន ប៉ែន មកពីក្រុមសិល្បករកម្ពុជាជំនាន់ថ្មីដែលមកពីខេត្តសៀមរាប ខណៈការសម្តែងធ្វើនៅខាងក្រៅអគារនៃទីចំណតរថយន្តរបស់វិទ្យាស្ថាន»។
លោក ឆន ប៊ុនឈឿន បានបន្តឲ្យដឹងពីកម្មវិធីសំខាន់ៗទាំង ៣ ថ្ងៃនៃការសម្តែងរបាំសហសម័យនោះទៀតថា៖ «សម្រាប់ល្ងាចថ្ងៃទី ១៤ ខែកុម្ភៈ នេះក្រុមនាដកានឹងសម្តែងរបាំដំបូងមានឈ្មោះថា «រាត្រីនៃការផ្លាស់ប្តូរ ឬការលេចឡើង» ដែលជាឈុតឆាកផ្លាស់ប្តូរយ៉ាងរហ័ស។ ការសម្តែងនេះមានឈុតនៃតួអង្គអប្សរាដែលមានមុខពណ៌ប្រែទៅជាមនុស្សមានសាច់ស្រស់ឈាមស្រស់តាមចង្វាក់ភ្លេងប៉ាស់ (Bach) ដែលទទួលឥទ្ធិពលពីសិល្បករ ភីណា (Pina) ជាការសម្តែងទោល ខណៈការប្រែក្លាយនោះត្រូវមានការចូលរួមពីសិល្បការិនី ២ រូបផ្សេងទៀតឲ្យទៅជាការសម្តែងរួមគ្នាជាត្រីភាគី។ សម្រាប់ផ្នែកទី ១ ហៅថារាត្រីនៃការផ្លាស់ប្តូរដោយបង្ហាញពីបទពិសោធនៃការបាត់បង់ ឈឺចាប់ និងសម្រស់នៃភាពចាស់ទុំ។
ទម្រង់របាំសហសម័យមួយមានឈ្មោះថា «BirdGirls»។ រូបថត វិទ្យាស្ថានបារាំង
ចំណែកផ្នែកទី ២ ការលេចឡើងបង្ហាញពីពហុប្រព័ន្ធផ្សព្វផ្សាយនានាតាមរយៈតន្ត្រី សំឡេង និងរបាំ»។
ចំពោះការសម្តែងនៅថ្ងៃទី ១៥ ខែកុម្ភៈ ឆ្នាំ ២០១៩ នឹងសម្តែងដោយនាដកា ហ៊ុន ប៉ែន នៅវេលាម៉ោង ៧ យប់ ក្រោមប្រធានបទមានឈ្មោះថា «បង្អួចខ្មៅ» និងយប់ម៉ោងដដែលនាថ្ងៃទី ១៦ ខែកុម្ភៈ ឆ្នាំ ២០១៩ នឹងមានការសម្តែងដោយនាដកា ជុំវណ្ណ សូដាជីវី ហៅ ប៊ែល ក្រោមប្រធានបទ «បំណងប្រាថ្នាដ៏ល្អបំផុត»។
លោក ឆន ប៊ុនឈឿន បន្ថែមឲ្យដឹងពីអត្ថន័យនៃការសម្តែងនៅ ២ រាត្រី ចុងក្រោយដែរថា៖ «បង្អួចខ្មៅ គឺជាការសម្តែងពីស្ត្រីម្នាក់ដែលបានជួបប្រទះនូវដំណើរជីវិតដ៏ខ្មៅងងឹតនឹកស្មានមិនដល់ក្រោយពេលរៀបការ។ ភាពខ្មៅងងឹតនេះជាអំពើហិង្សា ការគាបសង្កត់ទាំងផ្លូវកាយ និងចិត្ត។ ខណៈការសម្តែងបំណងប្រាថ្នាដ៏ល្អបំផុតវិញថ្លែងពីដំណើរ ឬពេលវេលាត្រឡប់ទៅក្រោយវិញនៅក្នុងការចងចាំដ៏មានតម្លៃរបស់កញ្ញា ប៊ែល។ ប៉ុន្តែវាក៏ជាការនិយាយបង្ហាញអំពីកំណើតនៃជីវិត និងការស្លាប់ផងដែរ»៕
