.jpg)
ក្មេងស្រីនៅកោះហ្គោរ៉ាម៉ារ៉ា ដែលបាត់បង់នៅឆ្នាំ ១៩៨០។ Daesung Lee
ភ្នំពេញៈ បណ្តុំរូបថតស្តីពីតំបន់កោះមួយ ដែលរងគ្រោះដោយបម្រែបម្រួលនៃអាកាសធាតុ ជាស្នាដៃរបស់សិល្បករថតរូបដ៏ចំណាន ជនជាតិកូរ៉េខាងត្បូង គឺលោក លី ដាសុង នឹងបង្ហាញជាសាធារណៈ នៅតាមរបងវិទ្យាល័យព្រះស៊ីសុវត្ថិ នៅថ្ងៃបើកសម្ពោធមហោស្រពរូបថតភ្នំពេញលើកទី ៩ នៅថ្ងៃទី ៥ ខែតុលា ឆ្នាំ ២០១៨ ខាងមុខនេះហើយ។
រូបថតដែលមានរូបក្មេងប្រុសស្រីឈរនៅលើដុំដីច្រាំង និងកំណាត់ដើមដូងមានថ្លុកទឹកដក់សល់តិចៗនោះត្រូវបានសិល្បករកូរ៉េខាងត្បូង លោក លី ដាសុង ដាក់ចំណងជើងថា «នៅលើច្រាំងនៃកោះដែលបាត់បង់» មានឈ្មោះថា កោះហ្គោរ៉ាម៉ារ៉ា មានទីតាំងស្ថិតនៅដែនដីសណ្តនៃតំបន់ខេត្តវេសបេងហ្គាល់ នៃប្រទេសឥណ្ឌា។
ក្មេងប្រុសនៅកោះហ្គោរ៉ាម៉ារ៉ា ដែលបាត់បង់នៅឆ្នាំ ១៩៨០។ Daesung Lee
លោក លី ដាសុង បានឲ្យដឹងថា៖ «ដោយសារតែបម្រែបម្រួលអាកាសធាតុបានធ្វើឲ្យកោះ ១ រងផលប៉ះពាល់យ៉ាងខ្លាំងដែលបណ្ដាលឲ្យកម្រិតទឹកសមុទ្រកើនឡើង។ ចាប់តាំងពីឆ្នាំ ១៩៨០ ជាងពាក់កណ្តាលនៃផ្ទៃកោះនេះ ត្រូវបានបាត់បង់ដោយការធ្លាក់ចូលទៅក្នុងសមុទ្រ។ ខ្ញុំនៅជាមួយអ្នកភូមិនៅលើឆ្នេរសមុទ្រ និងបានថតរូបរបស់ពួកគេជាមួយ នឹងសម្រស់នៃកោះដែលបានបាត់បង់ហើយធ្វើឲ្យរូបទាំងនោះមើលទៅមិនគួរឲ្យជឿ។ តែវាជាស្ថានភាពពិត ដែលមនុស្សធ្លាប់រស់នៅ។ ថ្ងៃមួយពេលដែលមនុស្សទាំងនោះមិនមានជម្រើសពួកគេក៏ធ្វើដំណើរចាកចេញពីស្រុកកំណើតហើយកោះដែលជាទីកំណើតពួកគេនេះនឹងមានតែក្នុងការចងចាំប៉ុណ្ណោះ។
លោក លី ដាសុង កើតនៅក្នុងទីក្រុងប៊ូសាន ប្រទេសកូរ៉េខាងត្បូង ហើយលោករស់នៅ និងធ្វើការនៅទីក្រុងប៉ារីស ប្រទេសបារាំង។ បន្ទាប់ពីបញ្ចប់ការសិក្សាផ្នែកថតរូបពីទីក្រុងសេអ៊ូល លោកបានចាប់ផ្តើមមានគំនិតផ្តួចផ្តើមធ្វើការជាអ្នកថតរូបពាណិជ្ជកម្ម។ ការងាររបស់លោកគឺធ្វើការវិភាគពីផលប៉ះពាល់នៃសកលភាវូបនីយកម្មទៅលើមនុស្ស និងទៅលើធម្មជាតិ៕
