ភ្នំពេញៈ មិនត្រឹមតែមានការថយចុះជាលំដាប់នៃសិស្សានុសិស្សខ្មែរចូលរៀនសិល្បៈសៀកទេ សូម្បីតែចំនួនអ្នកទស្សនាក៏មិនសម្បូរដែរ ទើប សាលាមធ្យមវិចិត្រសិល្បៈ បានរៀបចំឲ្យមានការសម្តែងសៀកចែកជូនមហាជនចូលទស្សនាដោយឥតគិតថ្លៃនា ព្រឹកថ្ងៃសៅរ៍ចុងសប្តាហ៍នេះ។
ស្ថិតក្នុងរោងសៀក ទល់មុខរដ្ឋសភាជាតិ ដែលអាចផ្ទុកនូវអ្នកទស្សនាបាន ១ ពាន់នាក់ ការសម្តែងសៀកខ្មែរ ជាការសម្តែងនៃក្រុមសិល្បករ-សិល្ប-ការិនី ជាសិស្សានុសិស្ស និងនិស្សិតនៃសាលាមធ្យមវិចិត្រសិល្បៈ នៅថ្ងៃសៅរ៍ ទី ១៤ ខែ កក្កដា ឆ្នាំ ២០១៨ វេលាម៉ោង ៩ ព្រឹក។
លោកស្រី ភោគ ណារិន ជាប្រធានក្រុមនៃសាលាសៀកបង្ហើបឲ្យដឹងថា៖ «ក្រុមអ្នកសម្តែងទាំងសិស្សប្រុសស្រី និងមានវ័យចម្រុះ ហើយក៏មានការសម្តែងចំនួន ១៧ នាក់ ហើយពួកគាត់សម្តែងចំនួន ១០ ឈុតឆាក (Show) »។
ប្រធានក្រុមសាលាសៀក ក៏បន្តឲ្យដឹងពីគោលបំណងនៃការរៀបចំសម្តែងសៀកឲ្យចូលទស្សនាដោយសេរីនេះថា៖ «គោលបំណងគឺចង់ផ្សព្វផ្សាយ ពីទម្រង់វប្បធម៌ខ្មែរមួយនេះ ដែលកំពុងតែបង្ហាញដល់អ្នកទស្សនាជំនាន់ក្រោយមិនសូវបានស្គាល់ និងមិនសម្បូរសិស្សចូលរៀនជំនាញនេះឡើយ ហើយក៏ចង់ពញ្ញាក់ ការចាប់អារម្មណ៍ដល់សិស្ស សម្រាប់ឆ្នាំសិក្សាថ្មី នឹងចូលរៀននៅខែកញ្ញា ខាងមុខនេះ ក៏មានការបារម្ភពីចំនួនសិស្សចុះឈ្មោះចូលរៀនផងដែរ»។
ទាក់ទិននឹងភាពមិនសូវផុសផុលទស្សនាការសម្ដែងសៀក និងខ្សត់សិស្សចូលរៀនជំនាញសៀក នាយិកាក្រុមសម្ដែងសៀករូបនេះក៏បានបញ្ជាក់ថា៖ «ទំនោរចិត្តកម្សាន្តអារម្មណ៍ប្រជាជនខ្មែរភាគច្រើនហាក់ដូចជាពុំសូវបានចាប់អារម្មណ៍មើលសិល្បៈសម្តែងសៀកនេះឡើយគឺការយល់ដឹងពួកគាត់នៅមានកម្រិត ឬពុំសូវជ្រួតជ្រាបថា ការរួមចំណែកលើកទឹកចិត្តមួយដល់អ្នកសម្តែងក៏ដូចជាលើកតម្កើងនូវសិល្បៈវប្បធម៌ជាតិខ្លួនផងដែរ»។
លោកស្រី ភោគ ណារិន លើកបន្តថា៖ «មានប្រជាជនខ្មែរយើងខ្លះគាត់ហាក់ដូចជានៅមានភាពស្រពេចស្រពិលនៅឡើយចំពោះសិល្បៈសៀកនេះ ដោយពួកគាត់ចោទសួរថា សិល្បៈសៀកខ្មែរយើងមានដែរ?
ខណៈក្រុមយុវវ័យខ្មែរសម័យឥឡូវវិញមិនសូវជាចូលចិត្តសិល្បៈបែបនេះទេ តែបើសិល្បៈបរទេសមានកូរ៉េជាដើមនោះពួកគេចូលចិត្តច្រើនជាង។ដោយឡែកសិល្បៈសៀកនេះជារបស់ខ្មែរពិតៗមិនមែនរបស់បរទេសឡើយ ព្រោះយើងមានភ័ស្តុតាងស្រាប់នៅលើផ្ទាំងជញ្ជាំងប្រាសាទបាយ័ន ខណៈសិល្បៈសៀកមានលក្ខណៈបច្ចេកទេសសកល»៕