The Phnom Penh Post Search

Search form




Logo of Phnom Penh Post newspaper Phnom Penh Post - ទាញព្រ័ត្រខ្មែរ ចូល​បញ្ជី​បេតិកភណ្ឌ​វប្បធម៌​ អរូបី​មនុស្សជាតិ​




ទាញព្រ័ត្រខ្មែរ ចូល​បញ្ជី​បេតិកភណ្ឌ​វប្បធម៌​ អរូបី​មនុស្សជាតិ​

Content image - Phnom Penh Post
ប្រជាជន​ខ្មែរនាពេល​លេង​ល្បែង​ទាញ​ព្រ័ត្រ នៅរដូវ​កាល​បុណ្យ​ចូល​ឆ្នាំខ្មែរ​។ ផា លីណា

ទាញព្រ័ត្រខ្មែរ ចូល​បញ្ជី​បេតិកភណ្ឌ​វប្បធម៌​ អរូបី​មនុស្សជាតិ​

ភ្នំពេញ:​ នៅ​ទី​បំផុត «​ល្បែងទាញព្រ័ត្រ​» ដែល​ជា​ល្បែង​ប្រជាប្រិយ​ខ្មែរ​មួយប្រភេទ​មាន​តាំង​ពី​ដូន​តា​មក​នោះ ត្រូវ​បានចុះ​ជាសម្បត្តិ​បេតិក​ភណ្ឌ​វប្បធម៌​អរូបី​នៃ​មនុស្ស​ជាតិ នាកិច្ចប្រជុំ​លើកទី ១០ នៃ​គណៈកម្មាធិការ​អន្ដររដ្ឋាភិបាល​ថែរក្សា​​បេតិកភណ្ឌ​វប្បធម៌​ប្រទេស​ណាមី​ប៊ី កាលពី​ថ្ងៃទី ២​ ខែធ្នូ ឆ្នាំ ២០១៥ ដោយអង្គការ​យូណេស្កូ។​ នេះ​បើ​យោង​តាមទំព័រហ្វេសប៊ុកជា​ផ្លូវ​ការ​លោក​ ស៊ី​យ៉ុន សុ​ភារិទ្ធ ប្រធាន​នាយក​ដ្ឋាន​ស្ថិតិ និង​​ផែន​ការ​សរុប​នៃ​ក្រសួង​វប្បធម៌​ និង​វិចិត្រ​សិល្បៈ។

ការចុះបញ្ជីនូវ​«​ល្បែង​ទាញព្រ័ត្រ​» ឲ្យចូលទៅ​​ក្នុង​បញ្ជីបេតិកភណ្ឌ​ពិភព​លោក​​នេះ កើតចេញពី​កា​រប្រឹងប្រែង​​រួមគ្នា​ចំនួន ៤ ប្រទេសគឺ​មាន​ដូចជា​កម្ពុជា ហ្វីលីពីន កូរ៉េខាងត្បូង និង​វៀត​ណាម​ ដោយ​សារប្រទេស​ទាំង​នេះ​ក៏​មាននូវ​​ល្បែង​​ទាញ​ព្រ័ត្រ​ដែរ។

លោក ថៃ នរៈ​សត្យា រដ្ឋ​លេខាធិការ​នៃ​ក្រសួង​វប្បធម៌ និង​វិចិត្រ​សិល្បៈ ​​មាន​ប្រសាសន៍​ថា៖ «យើង​ត្រូវ​តែ​រក្សានូវ​កេរ​ដំណែល​ល្បែង​ទាញ​ព្រ័ត្រ​នេះ​​ ឲ្យ​​បាន​គង់វង្ស​ ព្រោះ​ថា​ ប្រជាប្រិយភាព​រ​បស់​វា​កាន់​តែ​ធ្លាក់​ចុះនាសម័យ​កាល​ទំនើ​ប​ដោយ​សារ​តែ​បច្ចេក​វិទ្យាស៊ីវិល័យ។ ខ្ញុំ​ពិត​ជា​មាន​មោទន​ភាព​ណាស់​ចំពោះ​ការ​ចុះ​បញ្ជី​ជា​សម្បត្តិ​បេតិកភណ្ឌ​វប្ប​ធម៌​អរូបី​នៃមនុស្ស​ជាតិ​របស់​ល្បែង​ទាញ​ព្រ័ត្រ​នេះផង​ដែរ​សម្រាប់​កម្ពុជាយើង​»។

តាម​សៀវភៅ​ «ល្បែង​ប្រជាប្រិយ​ខ្មែរ» របស់​ក្រុម​​ជំនុំ​ទំនៀម​ទម្លាប់​ខ្មែរ ទាញព្រ័ត្រ គឺជា​ល្បែងលេង​កម្សាន្ដ​ដ៏​ពេញ​និយម​របស់​យុវជន​ខ្មែរ​ប្រុសស្រី​ ​នៅ​​រដូវ​ចូល​ឆ្នាំ​ខ្មែរ ឬ​កម្ម​វិធី​កម្សាន្ដ​នៅ​តាម​ភូមិនានា​ ​ចន្លោះ​​ខែ​ចែត្រ និង​ខែ​ពិសាខ​ ខណៈ​គេក៏ឃើញ​មានចម្លាក់​ចារឹក​ជាប់​នៅ​តាម​ជញ្ជាំង​ប្រាសាទ​នានា​រួម​ទាំង​យក្ស​​ទាញ​ព្រ័ត្រ​នៅ​ច្រក​ចូលទៅ​អង្គរ​ធំ​ផង​ដែរ។​

គេ​ច្រើន​លេង​ក្នុង​វត្ត​អារាម ក្នុង​ពិធីបុណ្យ​ចូល​ឆ្នាំ​ខ្មែរ ព្រោះ​វត្ត​មាន​ទី​វាល​ធំ​ទូលាយ​ ងាយ​ដល់​ការ​លេង​ល្បែង​ តែ​គេក៏​អាច​លេង​នៅ​តាមភូមិបានដែរ​ ប្រសិន​បើ​ជា​ភូមិ​នេះ​មាន​មនុស្ស ​នៅ​ផ្ដុំគ្នា​ច្រើន ហើយ​មាន​ទី​វាល​ល្មម​លេង​កើត។ ល្បែង​នេះគេ​ច្រើន​លេង​នៅ​ពេល​ថ្ងៃ តែ​ប្រសិនបើ​មានចង្កៀងបំភ្លឺ ​ឬ​ពន្លឺ​ព្រះចន្ទួ​ភ្លឺ​ថ្លា​ល្អគេ​អាច​លេង​នៅពេល​​យប់​ក៏​បាន។

Content image - Phnom Penh Post
កិច្ច​ប្រជុំ​ចុះបញ្ជី​ល្បែង​ទាញ​ព្រ័ត្រ​​ជាបេតិកភណ្ឌ​វប្បធម៌​អរូបី​នៃ​មនុស្សជាតិ​នៅណាមីប៊ី។ ហ្វេសប៊ុក

ចំពោះ​សមាស​ភាព​អ្នក​លេងល្បែង​​នេះ គេ​ចែក​មនុស្ស​អ្នក​លេង​ជា ២ ក្រុម​ ខណៈ​ម្ខាងៗយ៉ាង​តិច​ត្រឹម ៥ ឬ ១០​ នាក់​ឡើង​ទៅ​តាម​ដែលគេ​រក​គ្នា​បាន​ ក៏​​លេង​ប៉ុណ្ណោះ។ ​តែ​តាម​ទម្លាប់អ្នក ​ស្រុក​បើ​មាន ​មនុស្ស​ស្រី​ចូល​លេង​ផង គេ​ឲ្យ​ស្រីៗ​នៅ​ម្ខាង​ ហើយ​ប្រុសៗនៅ​ម្ខាង​ គេ​យល់​ថា​ ភេទស្រី​តែងតែ​​មាន​ កម្លាំង​ខ្សោយ​ជាង​បុរស ដូច្នេះ​គេតែង​តែ​ដាក់​ខាង​​ស្រី​ឲ្យមាន​ចំនួន​ច្រើន​លើស​ខាងប្រុសៗ​ យ៉ាង​តិចក៏​ត្រឹម ២ នាក់​ជាដរាប​ គឺ​បើ​ខាងប្រុស ៨​ នាក់ គេនឹង​ដាក់​ខាង​ស្រីមាន ១០ នាក់។​

ចំណែក​គ្រឿង​ប្រដាប់​សម្រាប់​លេង គេ​យក​ខ្សែ​ព្រ័ត្រ​ធ្វើពី​ស្បែក​គោ ស្បែក​ក្របី​ធ្វើ​ជា​ព្រ័ត្រឬ​គេ​យក​ពួរ​ធ្វើជាព្រ័ត្រ សម្រាប់​ទាញ ប្រវែង​យ៉ាង​ខ្លី​ពី ២០ ហត្ថ​ (ជាង ១០ ម៉ែត្រ) ឡើង​ទៅ ទំហំ​ប៉ុន​កដៃ​ក្មេង ហើយគេ​តែង​យក​សម្ភោរឬ​គងម៉ង​ ឬ​ក៏​រគាំង ១ សម្រាប់​ទះ ​ឬ​វាយ នៅ​ពេល​ទាញ​ដំបូង។​

រីឯ​របៀប​លេង ​មុន​ដំបូង​ គេ​រើស​រកប្រុស​ម្នាក់​ ស្រី​ម្នាក់​ ដែលមាន​មាឌ​ធំមាំ ​មាន​កម្លាំង​ខ្លាំង​​ ឲ្យ​ជា​អ្នក​ឈរ​កាន់ចុងព្រ័ត្រ​ គឺ​ប្រុស​កាន់​ចុង​ម្ខាង និង​ស្រី​កាន់​ចុងម្ខាងទៀត​​ ហើយ​ឲ្យ​ប្រុស​ម្នាក់​ស្រី​ម្នាក់​ទៀត​មានមាឌ​ធំ ​មាន​កម្លាំង​ខ្លាំង​ដែរ​​ ឈរនៅ​កណ្ដាល​ព្រ័ត្រត្រង់​កន្លែង​នៃ​ក្រុម​​ទាំងពីរ។​

ឯ​មនុស្ស​មាឌ​តូចៗ​ ស្គមៗ កម្លាំង​ខ្សោយៗ​ ឲ្យ​ឈរ​កណ្ដាល​។ លុះ​រៀបចំ​រួចហើយ គេ​ឲ្យមនុស្ស​ប្រុស​ម្នាក់​កាន់​សម្ភោរ ​ឬ​គងម៉ង​ ឬ​ក៏​រគាំង​ ឈរ​ត្រង់​កណ្ដាល​ទី​ជិត​អ្នកទាំង​ពីរ​​ដែល​កាន់ខ្សែឈរ​ប្រទល់​មុខ​គ្នា​នោះ ​ឲ្យ​មាន​ការ​ផ្ដើម​ស្រែកឡើង​ថា «​យក្ស​​អរ!!យ៉ាង​ខ្លាំងៗ​ ធ្វើ​សំឡេងវែងៗ​ រលាក់​យ៉ាង​គ្រលួច» ហើយ​អ្នក​ដែល​ប្រុងទាញព្រ័ត្រ​ទាំង​ប៉ុន្មាន​នាំ​គ្នា​ជួយ​ស្រែក​ព្រមៗ​គ្នាបន្ទរ​ឡើង​ថា ហ៊ោវ៉ឺៗ ៣ ​ដង​ ក៏​ទាញ​ដើម្បី​យកនូវជ័យ​ជម្នះតែ​រៀង​ៗខ្លួនទៅ​។

ពេល​កំពុង​តែ​ខំ​ប្រឹង​ទាញ​ អ្នក​កាន់​សម្ភោរ​ ឬ​គងម៉ង់​ គេចេះ​តែ​បញ្ជើច​សម្ភោរ ឬ​គងម៉ង់ ឬ​ក៏​រគាំង​រឿយៗ​ឮសូរ​តាក់​ទឹងៗ ឬម៉ូងៗ​ម៉ឺងៗ​ជាដរាប ទាល់​តែ​ឃើញចាញ់ និង​ឃើញ​ឈ្នះ​ម្ខាងៗ​ទើប​ឈប់​បញ្ជើច។ ចំពោះ​ថេរ​វេលាលេង​ពី ៥ ទៅ​ដល់ ១០ នាទី ឡើង​ទៅ ទើប​បាន​ឃើញ​អ្នកឈ្នះ ​និង​ឃើញ​ចាញ់​ម្ខាងៗ។

កាលណា​ដឹង​ថា ​ខាង​​ណា​​ឈ្នះ​ ឬ​ខាង​ណាចាញ់​​ហើយ គេ​ចាប់​ផ្ដើម​លេង​សាជា​ថ្មី​ត​ទៅ​ទៀត ​ដរាប​ដល់​ហត់តែរៀងៗ​ខ្លួន​ ទើបមាន​ការ​ឈប់។ ល្បែង​នេះក៏​ជាការ​ហាត់​កម្លាំង ហាត់​ប្រាណ ​ឲ្យ​រាង​កាយ​​មាន​កម្លាំងមាន​​សុខ​ភាព​ល្អ​ផង​ដែរ៕​​

អត្ថបទគួរចាប់អារម្មណ៍