.jpg)
ច្បាប់មិនឲ្យប្រើទូរស័ព្ទពេលដើរ មិនកំណត់ពីទោសទណ្ឌនោះទេ។ រូបថត AFP
ក្រុងតូក្យូ៖ នៅតែដដែលៗ! អ្នកថ្មើរជើងដៃស្អិតនឹងទូរស័ព្ទពេលដើរ ធ្វើឲ្យប៉ះពារនេះនោះ និងជួនកាលជួបគ្រោះថ្នាក់ចរាចរណ៍ថែមទៀត។ យ៉ាងណាមិញ ទីក្រុងមួយរបស់ជប៉ុនអះអាងថា លែងមានទៀតហើយ។
មន្ដ្រីនៅទីក្រុងយ៉ាម៉ាតុ ក្បែរក្រុងតូក្យូ កាលពីថ្ងៃចន្ទ បានអនុម័តច្បាប់បញ្ឈប់ពលរដ្ឋពីការប្រើប្រាស់ទូរស័ព្ទអំឡុងពេលដើរ។
មន្ដ្រីក្រុង ម៉ាសាអាគិ យ៉ាស៊ូមិ បានថ្លែងថា៖ «ចំនួនមនុស្សប្រើទូរស័ព្ទបានកើនឡើងខ្លាំង ដូច្នេះអត្រាគ្រោះថ្នាក់ក៏មានខ្ពស់ដែរ។ យើងចង់ទប់ស្កាត់បញ្ហានេះ។ បើអនុម័តរួច នេះជាបម្រាមដំបូងបំផុតនៅជប៉ុន»។
ប៉ុន្ដែលោក យ៉ាស៊ូមិ បាននិយាយថា វានឹងមិនមានទោសទណ្ឌអ្វីសម្រាប់អ្នកមិនអាចដកភ្នែកពីអេក្រង់ទូរស័ព្ទនោះឡើយ។
ចំនួនអ្នកប្រើទូរស័ព្ទពេលដើរកើនឡើង ស្របនឹងកំណើនគ្រោះថ្នាក់។ រូបថត AFP
លោកបានបន្ដថា៖ «យើងរំពឹងថា បម្រាមនេះនឹងជួយផ្សព្វផ្សាយអំពីចំណេះដឹងអំពីគ្រោះថ្នាក់នានា។ បដា និងសារនានានឹងត្រូវបានដាក់បង្ហាញប្រាប់ពលរដ្ឋអំពីច្បាប់ ដោយសង្ឃឹមថា នឹងចូលជាធរមានខែក្រោយ»។
ក្នុងឆ្នាំ ២០១៤ ការស្រាវជ្រាវមួយពីសំណាក់ក្រុមហ៊ុនទូរស័ព្ទយក្សជប៉ុន NTT Docomo បានប៉ាន់ប្រមាណថា ជាមធ្យមអ្នកដើរចុចទូរស័ព្ទបានអាចមើលឃើញបរិវេណជុំវិញត្រឹមតែ ៥ ភាគរយប៉ុណ្ណោះ។
ក្រុមហ៊ុនបានដំណើរការនូវការភ្ញោចតាមប្រព័ន្ធកុំព្យូទ័រពីអ្វីដែលបានកើតឡើង បើមនុស្ស ១ ៥០០ នាក់ បានដើរនៅទីប្រជុំជនផ្លូវប្រសព្វ ស៊ីបូយ៉ា ក្នុងក្រុងតូក្យូ ខណៈមើលទូរស័ព្ទដៃ។
លទ្ធផលបានបង្ហាញថា ២ ភាគ ៣ មិនបង្កគ្រោះថ្នាក់ធ្ងន់ធ្ងរ ហើយ ៤៤៦ ករណីប៉ះទង្គិច ១០៣ នាក់ដួល និង ២១ ករណីធ្លាក់ទូរស័ព្ទពីដៃ។
ចំនួនឧប្បត្ដិហេតុរវាងមនុស្ស និងការប្រើប្រាស់ទូរស័ព្ទពេលជិះកង់ និងដើរ បានកើនឡើងគួរឲ្យកត់សម្គាល់នៅជប៉ុនផងដែរ។ ករណីខ្លះ ក្រុមគ្រួសារជនរងគ្រោះទាមទារសំណងដល់ ១០០ លានយ៉េន (១ លានដុល្លារ) ក៏មាន៕ AFP/HR
