ក្រុងវីយែន៖ សាលរៀបចំបុណ្យសពក្រុងវីយែន បានឲ្យដឹងកាលពីថ្ងៃទី ២៥ ខែមីនា ថា ពេលនេះ ពួកគេផ្ដល់សេវាកម្មបុណ្យសពតាមអនឡាញ ក្រោយពីរដ្ឋាភិបាលរឹតបន្ដឹងការប្រមូលផ្ដុំ និងធ្វើដំណើរ ដើម្បីទប់ស្កាត់ការរីករាលនៃជំងឺកូវីដ ១៩។
មនុស្សតែ ៥ នាក់ប៉ុណ្ណោះ ដែលត្រូវបានអនុញ្ញាតឲ្យជុំជួបគ្នា ហើយការបំផ្លាសទីត្រូវបានកំហិតយ៉ាងខ្លាំងនៅអូទ្រីសពីសប្ដាហ៍មុន ខណៈប្រទេសនានានៅជុំវិញពិភពលោកប្រកាសប្រយុទ្ធប្រឆាំងនឹងវីរុសកូរ៉ូណាថ្មី។
យោងតាមនាយកគ្រប់គ្រងឈ្មោះ ចាកុប ហូមេន បានឲ្យដឹងថា Himmelblau ជាសាលរៀបចំពិធីបុណ្យសពធំបំផុតនៅក្រុងវីយែន បានចាប់ផ្ដើមផ្ដល់សេវាកម្មបុណ្យសពតាមអនឡាញតាំងពីខែកុម្ភៈ។
លោក ហូមេន បាននិយាយថា ពិធីបុណ្យចំនួន ៦ ត្រូវបានរៀបចំឡើងក្នុងគ្រានេះ ហើយអតិថិជនកាន់តែច្រើនចាប់អារម្មណ៍ចំពោះសេវាកម្មឥតគិតថ្លៃនេះ។
លោកប្រាប់ AFP ថា៖ «វាលំបាកសម្រាប់សាច់ញាតិដែលមិនអាចចូលរួមពិធីបុណ្យសពដោយផ្ទាល់បាន»។
ពិធីបុណ្យសពត្រូវបានថតសកម្មភាពតាមរយៈទូរស័ព្ទដៃ និងបង្ហោះលើបណ្ដាញអនឡាញ Zoom ដែលការពារដោយការដាក់លេខសម្ងាត់ផងដែរ។ អតិថិជនក៏អាចចែករំលែកវីដេអូបុណ្យសពជាមួយអ្នកដទៃតាមចិត្ដចង់ថែមទៀត។
អ្នកស្រី នីណា លែមែរម៉ាយ័រ ជាអ្នកនាំឲ្យ Bestattung und Friedhoefe Wien ដែលផ្ដល់សេវាកម្មបុណ្យសពតាមអនឡាញនិយាយថា៖ «បម្រាមធ្វើដំណើរ និងវិធានការរឹតបន្ដឹងផ្សេងៗទៀត ធ្វើឲ្យប៉ះពាល់ដល់ឱកាសជូនដំណើរមនុស្សជាទីស្រឡាញ់ជាលើកចុងក្រោយ»។
ប្រទេសមានប្រជាជន ៩ លាននាក់ មានអ្នកឆ្លងវីរុសកូរ៉ូណាជាង ៥ ៥០០ ករណី និងស្លាប់ ៣១ នាក់៕ AFP