កណ្ដាល: សម័យកាលវិវត្ដន៍ មនុស្សបច្ចុប្បន្នខិតខំសម្អិតសម្អាងកាយក្រែមម្សៅ និងវះកាត់កែសម្ផស្សលើកសម្រស់ស្រស់ស្អាតបែបឃ្យូតៗ។ យ៉ាងណាមិញ ទីងមោងប្រពៃណីដែលធ្លាប់លងបន្លាចក្មេងៗតាមដងផ្លូវឲ្យរត់ធ្លាក់ប្រឡាយ និងលាក់កាយក្នុងពាងទឹកនាឱកាសបុណ្យទានម្ដងៗក៏បានអភិវឌ្ឍខ្លួនដោយប្រែមុខមាត់គួរឲ្យក្នាញ់មិនចាញ់តារាភាពយន្ដប៉ុន្មានទេ។
ព្រឹកព្រលឹមស្រាងៗ សមាជិកគ្រួសារកំពុងតែញាប់ដៃញាប់ជើងដោយខ្លះចងជាល ខ្លះឆ្លាក់រូប កាត់ខោអាវ និងផាត់ពណ៌លើផ្ទៃមុខទីងមោងក្រោមផ្ទះ ដោយការរចនាមុខមាត់ទីមោងដែលមិនមែនគួរឲ្យខ្លាច តែជាមុខមាត់បែបស្រស់ស្អាត ឃ្យូតៗ គួរឲ្យស្រឡាញ់ សឹងធ្វើឲ្យមនុស្សមួយចំនួនលួចច្រណែនទៀតផង។ អាជីពផលិតទីងមោងជិត ៣ ទសវត្សរ៍នេះទើបបាននិងកំពុងទាក់ទាញការចាប់អារម្មណ៍យ៉ាងខ្លាំង។
លោក ហាក់ ហេង អ្នកផលិតទីងមោង ឬ ក៏អុងឌឿ បែបប្រពៃណីបានប្រាប់ភ្នំពេញប៉ុស្តិ៍អំពីប្រវត្ដិនៃការផលិតទីមោងថា៖ «កាលពីមិនទាន់ចេះធ្វើខ្លួនឯង ពេលឃើញរបស់គេខ្លាចដែរហ្នឹង។ ចេះតែងាកមុខចេញ ព្រោះមុខទីងមោងអាក្រក់ៗ តែអត់ហ៊ានប្រាប់គេទេ ចេះតែលាក់ក្នុងចិត្តទៅ។ បន្ទាប់មកចង់ធ្វើទីងមោងហ្នឹង ចង់ដឹងថាវាយ៉ាងម៉េច ណាមួយចង់ធ្វើឲ្យកូនលេងផង។ ប៉ុន្ដែដល់ពេលចេះតែធ្វើទៅស្អាតអ៊ីចឹង យើងក៏ចេះតែធ្វើទៅរហូតដល់ឥឡូវមក»។
លោក ហាក់ ហេង បានផ្ទេរចំណេះដឹងផលិតស្រោមមនុស្សបម្រើជាប្រយោជន៍ក្នុងកម្មវិធីបុណ្យទានជិត ៣០ ឆ្នាំមកនេះទៅដល់កូនប្រុសទាំង ២ គឺលោក ហេង សុភ័ណ្ឌ និងលោក ហេង គីមផេង នៅអំឡុងឆ្នាំ ២០១០។ ដោយសារភាពជាយុវវ័យចូលចិត្តលេងស្ទីលខ្លួនបែបសម័យនិយម និងចូលចិត្តរបស់ថ្មីប្លែក យុវជនទាំង ២ បានច្នៃប្រឌិតពីការធ្វើមុខទីងមោងធម្មតា មកជាទីងមោងដែលមានមុខ ឃ្យូតៗ ស្រស់ស្អាតវិញម្តង។
យុវជន ហេង សុភ័ណ្ឌ បានឲ្យដឹងថា៖ «តាំងពីចាប់ផ្តើមធ្វើទីងមោងមកគឺធ្វើមុខអ៊ីចឹងតែម្តង ព្រោះខ្ញុំចូលចិត្តទីមោងបែបស្អាតៗអ៊ីចឹង។ មុខបែបស្ទាវៗ បែបទាន់សម័យ តែបើបុរាណ ខាងប៉ា ជាអ្នកធ្វើ»។
កំពុងអង្គុយតុបតែងមុខឲ្យក្រមុំទីងមោងលោក សុភ័ណ្ឌ បានបន្ថែមថា៖ «និយាយទៅគឺធ្វើភ្លាមទទួលបានការគាំទ្រភ្លាម មានការចាប់អារម្មណ៍ពីយុវវ័យ ហើយបើតាៗ យាយៗ ពេលគាត់មកកុម្ម៉ង់ម្តងៗ គាត់ប្រាប់ថាស្រឡាញ់ទម្រង់មុខបែបក្មេងៗ អាយុ ១៨ ឆ្នាំអ៊ីចឹង។ មើលទៅស្អាត កុំឲ្យចាស់ពេក។ និយាយទៅពេលនោះគឺខ្ញុំសប្បាយចិត្តណាស់ ហើយក៏ជំរុញទឹកចិត្តខ្ញុំឲ្យបន្តធ្វើទីងមោងហ្នឹងទៀត»។
លក្ខណៈគួរឲ្យកត់សម្គាល់នៃទីងមោងរបស់បងប្អូនប្រុសទាំង ២ គឺស្ថិតនៅត្រង់ទម្រង់មុខអក្សរវី ច្រមុះស្រួច បបូរមាត់ស្អាត ថ្ពាល់ខួច ភ្នែកធំ ធ្មេញច្រពើស មុខមាត់សរលោង ចិញ្ចើមខ្វង់ និងមានការលេងស្ទីលសក់ជាច្រើនម៉ូដរួមជាមួយគ្រឿងអលង្ការពិតៗដូចជា ក្រវិល និងខ្សែក ជាដើម។
អ្នករចនាទីងមោងតាមសម័យកាលបច្ចេកវិទ្យាថ្មីទាំង ២ បានបង្ហើបប្រាប់ថា ការធ្វើមុខទីងមោងនេះមាន ២ របៀបគឺការយកផ្ទៃមុខលំនាំតាមតារា និងការធ្វើមុខតាមការស្រមើស្រមៃ។ ពួកគេលើកឡើងថាសម្រាប់ការធ្វើមុខតាមតារាពួកគេអាចធ្វើបានមុខតារាខ្មែរ ថៃ ចិន និងកូរ៉េ ជាដើម។ ចំណែកការធ្វើតាមការស្រមើស្រមៃ គឺពួកគេផ្តោតអារម្មណ៍រកនឹកមុខមាត់ និងធ្វើអីទៅតាមគំនិត ឬការចង់បាន។
យុវជនទាំង ២ បានរៀបរាប់ដំណើរការនៃការផលិតទីងមោងនីមួយៗថា ដំបូងត្រូវពូនដីឥដ្ឋទុកចោលប្រមាណ ២ ឬ ៣ ថ្ងៃឲ្យរឹងសមល្មម រួចចាប់ផ្តើមធ្វើការឆ្លាក់ដីឲ្យចេញជាមុខមនុស្ស។ បន្ទាប់មកទុកដីឲ្យរឹងបន្តិច ទើបចាប់បិទក្រដាសសមល្មមលើដីដែលបានឆ្លាក់រួច ហើយយកពុម្ពមុខមនុស្សទៅហាលថ្ងៃឲ្យរឹងល្មម ទើបចាប់ជីកដីចេញមកក្រៅ។ ចុងក្រោយគឺការលាយពណ៌ថ្នាំសម្រាប់គូរលើមុខទីងមោង។
ទន្ទឹមនឹងនេះពួកគេក៏ត្រូវត្បាញជាល ឬហៅថាខ្លួនរបស់ទីងមោងដែលផលិតឡើងពីឫស្សី ដោយត្រូវការអ្នកដែលស្ទាត់ជំនាញក្នុងការចងរឹតឲ្យបានល្អ ដើម្បីងាយស្រួលសម្រាប់យកទៅពាក់រាំ។ ចំណែកផ្នែកពិសេសមួយទៀតគឺការកាត់ខោអាវសម្រាប់ទីងមោងដោយត្រូវឲ្យដឹងទំហំច្បាស់លាស់ចៀសវាងការតឹងណែនពិបាករាំ និងត្រូវរិះរកគំនិតច្នៃម៉ូដផ្សេងៗដែលមើលទៅស័ក្ដិសមនឹងទម្រង់មុខឃ្យូតៗផងដែរ។
យ៉ាងណាមិញ សុភ័ណ្ឌ បានប្រាប់ពីការលំបាកថា៖ «បើអត់មានថ្ងៃគ្រប់គ្រាន់យើងធ្វើវាអត់ល្អទេ។ ក្រដាសទាញអត់រលោង វាប្រទាញគ្នាហើយធ្វើឲ្យហើម។ មួយវិញទៀតបើយើងបិទក្រដាសស្តើងពេលជីកដីចេញមកវាអាចបាក់ក ខូចចោលតែម្តង។ ពិបាកខ្លាំងគឺការវ៉ៃថ្នាំ ការលាយពណ៌។ បើយើងលាយអត់ត្រូវ ឬដាក់ប្រេងច្រើនពេក វានឹងរលុបមកវិញ។ អ៊ីចឹងចាំទាល់តែប្រេងហ្នឹងស្ងួត ទើបអាចវ៉ៃថ្នាំបន្តទៀតបាន»។
សម្រាប់ការធ្វើទីងមោងមួយ ប្រសិនបើមេឃមានពន្លឺថ្ងៃល្អត្រូវចំណាយរយៈពេលចន្លោះពី ១០ ទៅ ១៥ ថ្ងៃ។ ប៉ុន្តែប្រសិនបើមិនមានពន្លឺគ្រប់គ្រាន់នោះទេ វានឹងត្រូវចំណាយពេលរហូតដល់ ១ ខែ។
សុភ័ណ្ឌ បានបន្ដថាទីងមោងមាន ៣ ប្រភេទរួមមាន ទំហំតូចសម្រាប់ក្មេងៗ ១ គូតម្លៃ ៦០ ម៉ឺនរៀល ទំហំកណ្តាលសម្រាប់មនុស្សធំ ១ គូតម្លៃ ១ លាន ១០ ម៉ឺនរៀល និងទំហំធំ ១ គូតម្លៃ ១ លាន ៤០ ម៉ឺនរៀល។
យុវជន វ័យ ២៩ ឆ្នាំរូបនេះបានបញ្ជាក់ថា៖ «របរផលិតទីងមោងហ្នឹងគឺធ្វើជាប់ជាប្រចាំ។ តែពេលសម្រុកធ្វើច្រើននៅពេលមុនចូលវស្សា ១-២ ខែរួមទាំងពេលមានបុណ្យកឋិនមួយទៀត។ ពេលខ្លះធ្វើអត់ទាន់ឲ្យគេផង ហើយចប់ពីបុណ្យហ្នឹងគឺធ្វើធម្មតាវិញ»។
ទៅថ្ងៃខាងមុខ សុភ័ណ្ឌ មានបំណងចង់ធ្វើរូបទីងមោងស្អាតៗនេះឲ្យបានច្រើនដើម្បីចែករំលែកដល់ប្រជាជនខ្មែរបានស្គាល់ និងខំប្រឹងដុសខាត់សមត្ថភាពរបស់ខ្លួនដើម្បីរចនាស្រោមមនុស្សនេះឲ្យកាន់តែដូចមុខមនុស្សពិតៗ។
ទីងមោងឃ្យូតៗមានទីតាំងជាប់ស្ពានឃុំខ្ពប ស្ថិតនៅភូមិឫស្សីស្រុក ឃុំខ្ពប ស្រុកស្អាង ខេត្តកណ្តាល ឬទាក់ទងតាមរយៈលេខទូរស័ព្ទ ០៩៨ ៤២៣ ៦៥៧ ឬតាមរយៈហ្វេសប៊ុក @Panha So៕
វីដេអូ៖