.jpg)
លោក ជៀប ស៊ីបូរ៉ា ទើបស្រាវជ្រាវច្នៃបានម៉ូដសម្លៀកបំពាក់តុក្កតាបាប៊ីប្រុស។ រូប Bora Apsara Barbies
ក្រុងសៀមរាបៈ ក្រោយពីខិតខំចំណាយពេលអស់ប្រមាណជាង ៧ ខែ បង់ទាំងកម្លាំងកាយ និងចំណាយអស់ធនធានប្រាក់រាប់ពាន់ដុល្លារដើម្បីច្នៃម៉ូដសម្លៀកបំពាក់រចនាបែបខ្មែរ ដែលជាម៉ូដសម្លៀកបំពាក់តំណាងស្ត្រីទូទាំង ២៥ ខេត្ត-ក្រុង មានឈ្មោះល្បីមួយប្រាវមកនោះថ្មីៗនេះ ក៏ស្រាប់តែសិល្បករ ជៀប ស៊ីបូរ៉ា បញ្ចេញស្នាដៃច្នៃម៉ូដសម្លៀកបំពាក់សម្រាប់តុក្កតាបាប៊ីបុរសវិញម្តងដោយលោកច្នៃបានចំនួន ៦ ម៉ូដដែលជាដំណាក់កាលដំបូង។
ទោះបីពុំឆ្លងកាត់រៀនជំនាញសិល្បៈមែនក្តី តែថ្វីដៃកែច្នៃម៉ូដសម្លៀកបំពាក់បុរាណប្លែកៗដែលគ្រងឈុតតុក្កតារបស់សិល្បករខ្មែរមានវ័យ ២៧ ឆ្នាំរបស់កំលោះរៀនជំនាញព័ត៌មានវិទ្យា តែដុងសិល្បៈ ជៀប ស៊ីបូរ៉ា កំពុងតែទាក់ចំណាប់អារម្មណ៍ទេសចរបរទេស និងខ្មែរអាណិកជន ជាវទុកជាវត្ថុអនុស្សាវរីយ៍យ៉ាងផុសផុល។
សិល្បករសម្បូរនូវគំនិតច្នៃប្រឌិតលោក ជៀប ស៊ីបូរ៉ា ដែលមានទេពកោសល្យផ្នែកសិល្បៈ អតីតជានិស្សិតជំនាញផ្នែកព័ត៌មានវិទ្យាបានរៀបរាប់ពីការបង្កើតគំនិតច្នៃប្រឌិតជាម៉ូដឈុតសម្លៀកបំពាក់បុរាណសម្រាប់បុរសនេះថា៖ «ដោយសារតែពុំសូវមានពេល ទើបខ្ញុំឆ្លៀតពេលទំនេរពីការងារទៅច្នៃម៉ូដសម្លៀកបំពាក់បុរសនេះបានត្រឹម ៦ ម៉ូដតែប៉ុណ្ណោះដោយបានប្រើពេលជិត ១ ខែ ហើយនេះក៏ជាការសាកល្បងផងដែរ ខ្ញុំពុំទាន់កំណត់ថាជាតំណាងឲ្យខេត្តណាមួយនៅឡើយដែរទេ។
ម៉ូដសម្លៀកបំពាក់ដែលរចនាចេញពីគំនូរ។ រូប Bora Apsara Barbies
បើតាមគម្រោងក្នុងចិត្តគិតនោះគឺថាចង់ច្នៃម៉ូដសម្លៀកបំពាក់ឲ្យបានចំនួន ២៥ ម៉ូដសម្រាប់ជាតំណាងខេត្ត-ក្រុងរបស់ខ្មែរដូចជាឈុតរបស់បាប៊ីស្ត្រីដែរ តែពេលនេះគ្រាន់តែចាប់ផ្តើមច្នៃចំនួន ៦ ម៉ូដដែលដកស្រង់យកម៉ូដតាមសម័យកាលខ្មែរបុរាណចំនួន ២ សិនគឺសម័យអង្គរ និងសម័យចតុមុខ ព្រោះថាការច្នៃម៉ូដបាប៊ីសម្រាប់ស្ត្រី ២៥ ខេត្ត-ក្រុងរបស់ខ្ញុំនៅពុំទាន់បានចប់សព្វគ្រប់នៅឡើយដែរទេ ខណៈខ្ញុំមានគម្រាងបញ្ចប់វានៅខែតុលា ឆ្នាំ ២០១៩ នេះហើយចុងឆ្នាំក៏មានបំណងយកផលិតផលសម្រេចទាំងនេះទៅដាក់បង្ហាញផងដែរ»។
ខណៈឈុតសម្លៀកបំពាក់បាប៊ីសម្រាប់តំណាងស្ត្រីខ្មែរទាំងចំនួន ២៥ ខេត្ត-ក្រុងនោះរួមមាន ភ្នំពេញឈុត «រាជិនីទីក្រុងគជ់» បាត់ដំបងឈុត «ព្រះប្រពៃស្រព» កំពង់ស្ពឺឈុត «មន្តស្នេហ៍រកាសួគ៌» ប៉ៃលិន «មយូរ៉ា» មណ្ឌលគិរីឈុត «រុក្ខទេវី» សៀមរាបឈុត «នាងទេពអប្សរ» ឧត្តរមានជ័យឈុត «នាដស្ត្រី» ក្រចេះឈុត «ទេវវារី» កោះកុងឈុត «សុវណ្ណមច្ឆា» ត្បូងឃ្មុំឈុត- «នារីទសវត្សរ៍ ទី ៩០» រតនគិរីឈុត «ភូមិរីធីតា» ខេត្តកំពត «អភិជននិយមបារាំង» ខេត្តកណ្តាល «ធរណីមាតា» ស្ទឹងត្រែង «គង្គាទេវី» កំពង់ចាមឈុត «បទុមទេវី» កែបឈុត «ទេវីស្រីសមុទ្រ» ព្រៃវែងឈុត «កុលស្ត្រីខ្មែរ» កំពង់ឆ្នាំងឈុត «នារីកុលាភាជន៍» បន្ទាយមានជ័យ «សោភ័ណស្ត្រី» កំពង់ធំ «មហិង្សានារី» ពោធិ៍សាត់ «បុប្ផាផ្សងទៀន» ខេត្តស្វាយរៀងឈុត «វីរស្ត្រី» ព្រះសីហនុឈុត «សិង្ហអប្សរ» ខេត្តតាកែវ «សុវណ្ណហង្ស» និងព្រះវិហារឈុត «គិរីស្វរទេវី»។
យ៉ាងណាការខិតខំការច្នៃម៉ូដសម្លៀកបំពាក់ដែលរចនាបែបខ្មែរ ហើយក៏ធ្លាប់មានក្តីសង្ឃឹមថាអាចនាំយកតាំងបង្ហាញសាធារណជនទស្សនា និងស្វែងយល់ពីកម្រងស្នាដៃច្នៃម៉ូដសម្លៀកបំពាក់តំណាងស្ត្រីទូទាំង ២៥ ខេត្ត-ក្រុងរបស់លោក ជៀប ស៊ីបូរ៉ា នោះក៏គេឃើញថា លោកនៅតែពុំទាន់អាចមានឱកាសរកទីកន្លែងសម្រាប់ដាក់តាំងបង្ហាញនៅឡើយ ដោយខ្វះការគាំទ្រ និងដៃគូសហការ៕
