.jpg)
ក្មេងប្រុស ១៦ឆ្នាំ អ៊ូន ធីម អ្នកម្ដាយ នេត វណ្ណ អាយុ ៤៤ ឆ្នាំ និងព្រះសង្ឃចិត្តធម៌។ ហ្វេសប៊ុក
កំពង់ឆ្នាំង: ក្មេងប្រុសដៃជើងខ្វេរខ្វង់ មាត់វៀច ហាស្ដីមិនបាន ដែលអង្គុយលើរទេះរុញកំបាក់កំពុក ចងក្រមា ចងខ្សែទប់ការបាក់រហែក ស្រាប់តែលើកដៃឡើង និងបង្ហាញអាកប្បកិរិយាត្រេកអរ ពេលព្រះសង្ឃមួយអង្គសួរថា «ប្អូនប្រុសត្រូវការរទេះរុញថ្មីដែរឬទេ?»។
ព្រមនឹងភាពរីករាយរបស់ក្មេងប្រុស អ៊ូន ធីម អាយុ ១៦ ឆ្នាំ ដែលធ្លាក់ខ្លួនពិការអង្គុយផ្ដេកផ្តួលតែលើរទេះរុញតាំងពីកុមារភាព ស្ដ្រីពាក់អាវយឺតពណ៌លឿង ដិតតាមស្នាមក្អែលតោងកាន់ស្ទើរប្រែជាពណ៌ត្នោត អ្នកស្រី នេត វណ្ណ អាយុ ៤៤ ឆ្នាំដែលអ្នកទាំង ២ រស់នៅក្នុងភូមិជ្រៃកោងលិច ឃុំខ្នារឆ្មារ ស្រុកសាមគ្គីមានជ័យ ខេត្ដកំពង់ឆ្នាំង បានឆ្លើយជំនួសកូនថា៖ «ខ្ញុំចង់បានរបស់របរ ថវិកា និងអង្ករចិញ្ចឹមកូន។ ករុណា សុំតែប៉ុណ្ណឹងទេ ព្រោះខ្ញុំករុណាខ្វះខាត»។
បន្ទរពីការសុំគ្រឿងបរិភោគរបស់ស្ដ្រីជាម្ដាយសម្រាប់កូន ព្រះភិក្ខុ ស បញ្ញាឫទិ្ធ ព្រះជន្ម ២៣ វស្សា ដែលរមែងនិមន្ដធ្វើសកម្មភាពមនុស្សធម៌ បានបន្ដសង្ឃដីកាក្នុងវីដេអូឃ្លីបថា៖ «ជាពិសេស សុំចម្រើនពរដល់បងប្អូន មេត្ដាចូលរួមជួយឧបត្ថម្ភរទេះរបស់ប្អូនប្រុស និងសម្ភារប្រើប្រាស់ ពីព្រោះរទេះនេះត្រូវចងក្រមា ចងខ្សែបាក់បែកអស់ហើយ»។
ពេលប្រសូតមកជាកុមារមានសុខភាពល្អប្រក្រតី តែទើបអាយុបាន ៣ ខែ កុមារា ធីម បានធ្លាក់ខ្លួនឈឺដែលត្រូវសម្រាកក្នុងមន្ទីរពេទ្យគន្ធបុប្ផារហូតដល់ជាង ១ ឆ្នាំ។
អនិច្ចាព្រហ្មលិខិតកំហិតឲ្យស្ដ្រីទទួលអំរែកនូវបន្ទុករែកពុនជីវភាពគ្រួសារ និងបីបាច់កូនពិការរូបនេះ បានបាត់បង់ស្វាមីអំឡុងពេលកូនសម្រាកនៅពេទ្យជាង ១ ឆ្នាំ ដោយសារតែសុខភាពទ្រុឌទ្រោម ខណៈកូនស្រីវ័យជាង ២០ ឆ្នាំ ពិការពីកំណើតក៏ចាកចោលផ្ទះបាត់ដំណឹងសូន្យឈឹង។
ដោយមិនបានលើកដៃសំពះសុំជំនួយជួយខ្លួនឯង ដែលជើងចេញដំបៅរលេះរលួយពីការរលាកភ្លើងរ៉ាំរ៉ៃ អ្នកស្រី នេត វណ្ណ ថែមទាំងបានបដិសេធមិនទៅធ្វើការព្យាបាលជាដាច់ខាត ទោះការព្យាបាលមិនអស់ប្រាក់ក៏ដោយ។
ជើងដំបៅរលួយរបស់អ្នកម្ដាយ ដែលមិនឃ្លាតពីកូន។ ហ្វេសប៊ុក
ព្រះតេជគុណគង់នៅវត្ដកាសេមរតនារាម ក្នុងក្រុងកំពង់ឆ្នាំងអង្គនេះ បានពន្យល់មូលហេតុថា៖ «អាត្មាព្យាយាមបញ្ចុះបញ្ចូលគាត់គ្រប់វិធីសាស្ដ្រដើម្បីឲ្យគាត់ទៅព្យាបាលជើងអស់ហើយ តែគាត់មិនព្រមដាច់ខាត។ គាត់ថា បើគាត់ទៅព្យាបាលជំងឺខ្លួនឯង តើនរណាថែទាំកូនពិការលើរទេះ?»។
មិនចង់បានអ្វីក្រៅពីរបស់របរ ថវិកា និងអង្ករចិញ្ចឹមកូន ជាពិសេស រទេះរុញថ្មីឲ្យកូនអ្នកស្រី នេត វណ្ណ បានប្រាប់ថា អ្នកស្រីងាយស្រួលក្នុងការដើរស៊ីឈ្នួលរកចំណូលបន្ដិចបន្ដួចផ្គត់ផ្គង់ជីវភាពចិញ្ចឹមកូន៕
