ភ្នំពេញ: នៅលើ​ក្ដារ​ជ្រញ់ ចំណិត​មើម​ការ៉ុត ផ្លែ​ប៉ោម​ក្រហម ប៉ោម​បៃតង ផ្លែ​សារី​លឿង ត្រូវបាន​ត្រៀម​រួច​ជា​ស្រេច​មុន​នឹង​បញ្ចូល​ម៉ាស៊ីន​ទំនើប​កិន​ផលិត​ជា​ទឹក​ផ្លែ​ឈើ​ស្រស់ៗ ច្រក​ដប​រាង​មូល​កន្តុប ដែល​មាន​បិទ​ភ្ជាប់​ស្លាក​ឈ្មោះ So Fresh Juice អម​ដោយ​មុខងារ​ខុស​ៗគ្នា រាប់​ចាប់​តាំង​ពី​គុណ​ប្រយោជន៍​ថែ​សម្រស់ ជំនួយ​អារម្មណ៍ រក្សា​ទម្ងន់ ផ្ដល់​ថាមពល​ហាត់​កីឡា និង​ប៉ូវ​សុខភាព​ផ្លូវ​ភេទ​ជាដើម។

ផ្ទុក​នូវ​ជីវជាតិ​ទាំងស្រុង​ពី​ផ្លែឈើស្រស់ ១០០ ភាគរយ មិនមាន​ស្ករ ឬ​ទឹក​សូម្បី​បន្តិច So Fresh Juice ជា​ស្នាដៃ​របស់​លោក អៀ វាសនា ដែល​បាន​ប្រមែ​ប្រមូល​រូបមន្ត​ទឹក​ផ្លែឈើ​ពី​បណ្ដា​ប្រទេស​នានា ផ្អែក​លើ​ជីវជាតិ និង​វីតាមីន​ខុសៗ​គ្នា​នៃ​រុក្ខជាតិ​នីមួយៗ។

ម្ចាស់​ហាង​វ័យ២៩ឆ្នាំ​រូបនេះ​បាន​និយាយថា៖ «កាលដែល​ខ្ញុំ​បើកហាង​នេះ​ឡើងមក ព្រោះ​ខ្ញុំ​ជា​មនុស្ស​ចូលចិត្ត​ហាត់​ប្រាណ តែ​ឆាប់​ហត់​ខ្ញុំ​ត្រូវការ​ញ៉ាំ​ទឹក​ណា​ដែលមាន​រស​ជាតិ​ផ្អែម ប៉ុន្តែ​ក៏​មិន​ធ្វើ​ឲ្យ​ឡើង​គីឡូ ទើប​ខ្ញុំ​ស្រាវជ្រាវ​រូបមន្ត​នេះ​ឡើង»។

រូបមន្ត​ផ្សំ​ផ្លែឈើ​ត្រូវបាន លោក អៀ វាសនា ឲ្យ​ដឹងថា៖ «ជាការ​ប្រើ​ចំណេះ​ខ្លួនឯង​ខ្លះ ស្វែងរក​ពី​ប្រភព​អ៊ីនធឺណិត និង​មើល​តាម​រស​ជាតិ ដែល​ខ្ញុំ​ធ្លាប់​បាន​ញ៉ាំ​នៅ​បរទេស»។

ចាប់តាំងពី​បើក​ដំណើរការ​តាំងពី​ចុងខែ​កញ្ញា​មក ទឹក​ផ្លែឈើ​ស្រស់​តម្លៃ ៣ ដុល្លារ​ក្នុង​មួយ​ដប​នេះ​មាន ២១ មុខ​ខុសៗ​គ្នា ដូចជា​ទឹក៖ ១. ផ្លែ​ប៉ោម ( Apple of mind) ២. Sexy Men (Light Pink) ៣. Sex Me Up ៤. កាត់​ស្ត្រេស (Stress Down) ៥. កីឡា (Sport) ៦. បេះដូង (Heart Red) ៧. ថាមពល (Power) ៨. បន្សាប​ស្រវឹង (Hangover) ៩. ស្នាម​ញញឹម​នៃ​សម្រស់ (Beauty Smile) ១០. ថែរក្សា​ស្បែក (Skin Care) ១១. សម្រក​ទម្ងន់ (Weight Lost) ១២. ផ្លែ​ប៉ោម​កម្ចាត់​ជាតិពុល (Apple Detox) ១៣. រំសាយ​ស្ត្រេស (Stress Detox) ១៤. ស្ត្រ​ប៊ើរី (Strawberry Detox) ១៥. សម្អាត​ជាតិពុល (Detox) ១៦. New ១៧. Fight Detox ១៨. ជីវិត​សិច (Sex Life) ១៩. Relax Juice ២០. Easy Juice និង So Fresh Juice។

ក្នុងចំណោម​នោះ ម្ចាស់​ហាង​ក៏បាន​ឲ្យ​ដឹង​ដែរ​ថា៖ «ទឹក​ផ្លែឈើ ភ្ញៀវ​ចូលចិត្ត​កុម្ម៉ង់​ញ៉ាំ​ជាង​គេ​មាន​លេខ ៥. Sport អត្ថប្រយោជន៍​របស់​វា ហាត់​ប្រាណ​បាន​យូរ យើង​អាច​ញ៉ាំ​បាន​មុន​ពេល​ហាត់​ប្រាណ និង​ពេល​ហាត់​រួច ដោយ​មិន​ធ្វើ​ឲ្យ​មាន​ការ​ឡើង​គីឡូ​ឡើយ។ រីឯ​មួយ​មុខ​ទៀត​គឺ​លេខ ១០. Skin Care អត្ថប្រយោជន៍ជំនួយ​ដល់​ស្បែក ធ្វើ​ឲ្យ​ស្បែក​ភ្លឺ និង​ម៉ដ្ដ​រលោង»។

ដោយ​មិន​ផ្ទុក​សារធាតុ​អ្វី​ផ្សេង​ក្រៅតែពី​ផ្លែឈើ​ធម្មជាតិ​នោះ ភេសជ្ជៈ​នេះ​អាច​រក្សាទុក​ក្នុង​ទូទឹក​កក​ត្រឹម​រយៈពេល ១ ថ្ងៃ​ទៅ ២ ថ្ងៃ​ប៉ុណ្ណោះ។

លោក អៀ វាសនា បាន​បន្តទៀតថា៖ «នៅ​ក្នុង ១ ថ្ងៃ​ខាងយើង​លក់បាន​ចាប់ពី ៤០-៥០ ដប និង​នៅ​ពេល​ខាង​មុខ​នេះ ខ្ញុំ​នឹង​បន្ថែម​ខលីជេន (Collagen) ជំនួយ​ដល់​សម្រស់​កាន់​តែ​ខ្លាំង​ឡើង ហើយ​ខ្ញុំ​កំពុង​តែ​មាន​គម្រោង​បើក​សាខា​ថ្មី​នៅ Aeon Mall និង​បឹងកេងកង ១ ទៀត​ផង​ដែរ»។

So Fresh Juice នៅ​ផ្លូវលេខ ៣១៣ ក្រោយ​ផ្សារ​មាន់អាំង ទាក់ទង​តាម​អ៊ីនស្តាក្រាម sofreshjuicekh និង​ទូរស័ព្ទ ០៩៦ ៥៦ ៦៦ ៧២០៕

ស៊ុ​ង សុវណ្ណនី