ភ្នំពេញ៖ ក្រោយពីមានចំណងស្នេហ៍ឆ្លងទ្វីបប្រមាណជាង ៤ ឆ្នាំ ជាមួយនឹងបុរសរូបសង្ហាជាតិអាមេរិកលោក ចូវ៉ានី អេនតូនីញ៉ូ ដែលជានាយកប្រតិបត្តិ និងជាស្ថាបនិកនៃក្រុមហ៊ុនអចលនទ្រព្យឈ្មោះ CMS នោះមក កញ្ញា ទឹម រដ្ឋា តារាសម្ដែងស្រី ដែលតែងតែល្បីរងពាក្យខ្សឹបខ្សៀវពីស្នេហានឹងបុរសខុសសញ្ជាតិជារឿយៗនោះ ហាក់នៅពុំទាន់មានការនឹកនារឿងដឹកដៃគូស្នេហ៍ចូលរោងមង្គលការនៅឡើយ។
ក្រៅពីគេឧស្សាហ៍ឃើញនាងបណ្តើរសង្សារអាមេរិក រូបសង្ហា ចូលរួមក្នុងកម្មវិធីផ្លូវការ ឬកម្មវិធីសង្គមនានាដោយការបើកចំហតារាសម្តែង និងម៉ូដែល កញ្ញា ទឹម រដ្ឋា ក៏តែងតែបង្ហោះរូប និងសារផ្អែមល្ហែមបង្ហាញពីភាពសិ្នទ្ធស្នាលជាគូស្នេហ៍ពេលដើរកម្សាន្តនៅទីនានាយ៉ាងរីករាយ រហូតធ្វើឲ្យមហាជនគាំទ្រជំរុញឲ្យនាងឆាប់រួសរាន់ដឹកដៃគ្នាចូលរោងការឆាប់ៗទៀតផង តែខាងសាមីខ្លួនមើលទៅហាក់មិនទាន់ខ្វល់។
ខណៈគូសេ្នហ៍នេះ កាន់តែបង្ហាញភាពផ្អែមល្ហែមខ្លាំងឡើងៗ ឯដំណឹងរៀបការនៅតែបន្ដភាពស្ងប់ស្ងាត់ដដែល ទើបធ្វើឲ្យក្រុមអ្នកសិល្បៈរួមអាជីពមួយចំនួន បានសម្ដែងការបារម្ភជំនួសនាងព្រោះខ្លាចដើរជាន់ដានផ្លូវចាស់ និងធ្វើឲ្យចំណងស្នេហ៍អាចបញ្ចប់កណ្ដាលទីដូចមុនទៀត។
ទោះជាយ៉ាងណាក្តីកញ្ញា ទឹម រដ្ឋា ហាក់គ្មានការគិតច្រើនទៅលើមង្គលការឆាប់ៗនោះទេ ដោយនាងធ្លាប់បង្ហើបប្រាប់ថា នាងនឹងមិនបណ្ដោយឲ្យលើសពីអាយុ ៣៥ ឆ្នាំនោះឡើយ ខណៈដែលឆ្នាំនេះ នាងទើបមានវ័យ ៣០ ឆ្នាំ ដូច្នេះមានន័យថា នាងត្រូវប្រើពេលបណ្តើរសង្សាររហូតដល់ឆ្នាំ ២០២៥ ទើបបាននាងសម្រេចចិត្តគិតរឿងថ្ងៃរៀបការ។
តារាសម្តែងស្រីបែបសិចស៊ី ឬស៊ីវិល័យកញ្ញា ទឹម រដ្ឋា បានបង្ហើបដែរថា៖ «រឿងរៀបការ គឺនាងខ្ញុំសុំមិនទាន់បរិយាយថាយ៉ាងណាទេ តែសុំទុកពេលវេលាមួយរយៈទៀតសិន ដើម្បីសិក្សាស្វែងយល់ចិត្តគ្នា។ នាងខ្ញុំក៏សុំមិនទាន់កំណត់ពេលវេលាយ៉ាងណាថា នឹងត្រូវដល់ពេលត្រូវចាត់ចែងរឿងនោះ ព្រោះថា ពេលទៅថ្ងៃខាងមុខនោះគឺ យើងពិតជាមើលមិនអាចឃើញដែរ»។
យ៉ាងណាក្តីបើតាមការតាមដានពីសម្ព័ន្ធភាពស្នេហារវាងតារាសម្តែងស្រី មានរាងស្ល៊ីម ដែលមហាជនឲ្យរហស្សនាមថា ជាតារាស្រីស្វាក់ស្នេហ៍ច្រើនតែកន្លង់បរទេស កញ្ញា ទឹម រដ្ឋា និងគូស្នេហ៍ថ្មីជាបុរសរូបសង្ហាជាជនជាតិអាមេរិក ដែលជានាយកប្រតិបត្តិ និងស្ថាបនិកនៃក្រុមហ៊ុនអចលនទ្រព្យមួយគឺលោក ចូវ៉ានី អេនតូនីញ៉ូ ពិតជាមានភាពស៊ីចង្វាក់គ្នា និងបានបង្កើតនូវភាពផ្អែមល្ហែមខ្លាំង ហើយរក្សាបាននូវចំណងស្នេហ៍ខ្លួនមានរយៈពេលរាងយូរក្រែលជាងគេ បើប្រៀបធៀបទៅនឹងចំណងស្នេហ៍របស់នាង ជាមួយនឹងអតីតសង្សារមុនៗដូចជាជនជាតិប៉ាគីស្ថាន និងប្រេស៊ីល ដែលមានសម្ព័ន្ធភាពរយៈពេលមិនយូរឡើយ៕