ភ្នំពេញៈ ខណៈមហាជនទើបតែសរសើរពីការចេះសម្របខ្លួន និងការយល់កាលៈទេសៈរបស់តារាសម្ដែង និងម៉ូដែលស្រីរាងស្ល៊ីមកញ្ញា ទឹម រដ្ឋា មានចំណងស្នេហ៍ដ៏ផ្អែមល្ហែមនឹងបុរសជាតិអាមេរិក ជាអ្នកជំនួញអចលនទ្រព្យល្បី ១ រូបនៅស្រុកខ្មែរ ដែលបង្កាត់ភ្លើងស្នេហ៍ជាង ២ ឆ្នាំ មក ឃើញសកម្មទៅរៀនភាសាចិនសោះនោះ ក៏ស្រាប់តែថ្មីៗនេះ នាងបង្ហោះសារចម្លែកដូចជាមានរឿងរកាំរកូសនឹងគូស្នេហ៍ទៅវិញ។
សារនោះ តារាស្រីដែលហ៊ានសម្រេចចិត្តរួមរស់នៅក្រោមទ្រនំថ្មីតែមួយ ជាមួយនឹងសង្សារថ្មីទ្រព្យស្តុកជាតិអាមេរិកឈ្មោះ ចូវ៉ានី អេនតូនីញ៉ូគឺជានាយកប្រតិបត្តិ និងស្ថាបនិកនៃក្រុមហ៊ុនអចលនទ្រព្យ CMS នោះ សរសេរថា៖ «ស្ថានភាពជីវិតរបស់ខ្ញុំ មានភាពផ្សេងគ្នាពីជីវិតអ្នក ដោយនាងខ្ញុំខំប្រឹងរកប្រាក់ដើម្បីជួយផ្គត់ផ្គង់គ្រួសារទាំងស្រុង។ អ្នកឯងវិញចំណាយប្រាក់ជួយទៅគ្រួសារតែ ១០ ភាគរយប៉ុណ្ណោះ តែខ្ញុំវិញគឺចំណាយ ១០០ ភាគរយតែម្តង។ អ៊ីចឹងអ្នកឯងសាកស្រមៃគិតមើលទៅ កុំយកខ្លួនមកប្រៀបធៀបជាមួយនឹងខ្ញុំឲ្យសោះ!»។
មិនយូរប៉ុន្មានក្រុមអ្នកនិយមតាមដានជីវិតឯកជនរបស់តារាសម្ដែង និងម៉ូដែលស្រីរាងសិចស៊ី កញ្ញាទឹម រដ្ឋា ក៏លាន់មាត់ថា៖ «អីយ៉ា!កញ្ញាបុប្ផាស្វាក់ស្នេហ៍កន្លង់បរទេស ដែលកំពុងតែមានភាពផ្អែមល្ហែមនៃចំណងស្នេហ៍ច្រើនឆ្នាំហើយ ជាមួយនឹងបុរសជាតិអាមេរិកសោះ ម៉េចឥឡូវ ក៏ហាក់ដូចជាកើតមានរឿងរកាំរកូសនឹងគ្នាព្រោះការចំណាយប្រាក់ទៅវិញអ៊ីចឹង?»។
ខុសស្រឡះពីការស្មាន ខណៈកញ្ញា ទឹម រដ្ឋា បានបំភ្លឺប្រាប់ពីសារនោះឲ្យភ្នំពេញប៉ុស្តិ៍បានដឹងថា៖ «នោះមិនមែនជាសារនិយាយពីរឿងនាងខ្ញុំ និង អេនតូនីញ៉ូ ទេ!តាមពិតទៅវាជាសារមួយដែលនាងខ្ញុំ ចង់មានន័យចំអកទៅឲ្យក្រុមអ្នកមានអាជីពសិល្បៈដូចគ្នាមួយចំនួន ដែលមានចិត្តទើសទែងគេ និងតែងរិះគន់មើលពីទង្វើរបស់គេប៉ុណ្ណោះ។ ព្រោះថាខ្ញុំពេលថ្មីៗនេះ មានបញ្ហាទាស់ត្រចៀកខ្លាំងណាស់ជាមួយនឹងក្រុមមនុស្សចូលចិត្តរិះគន់គេ ដែលទំនងជាមានភាពច្រណែនគេផងនោះ។ ហើយខ្ញុំ ក៏ចង់ផ្តាំដែរថា ខ្ញុំជាកូនកតញ្ញូ ត្រូវចិញ្ចឹមគ្រួសារទាំងស្រុងអ៊ីចឹងហើយ បើអ្នកជាកូនអកតញ្ញូនោះ សុំបន្តធ្វើទៀតទៅចុះ សុំកុំយកខ្ញុំទៅប្រៀបនឹងអ្នកឲ្យសោះ»។
កញ្ញា ទឹម រដ្ឋា ដែលសាងជីវិតស្នេហាយ៉ាងផ្អែមល្ហែមជាមួយនឹងគូសង្សារជាជនជាតិអាមេរិកម្នាក់នេះបានជាង ២ ឆ្នាំ មកហើយ ហើយក៏ថែមទាំងឧស្សាហ៍បណ្តើរគ្នា ដោយការបើកចំហបង្ហាញពីការយល់ចិត្តថ្លើមគ្នា ក៏ធ្វើឲ្យអ្នកសិល្បៈរួមអាជីពខ្លះច្រណែននាងផងនោះ ក៏បង្ហើបការពិតរឿងរៀនភាសាចិនដែរថា៖ «អាចពិតខ្លះទៅតាមការសន្និដ្ឋានរបស់បងប្អូនផងដែរ ចំពោះរឿងដែលនាងខ្ញុំងាកមករៀនភាសាចិនថ្មីនេះ ដោយសារថ្ងៃមុខនាងខ្ញុំទំនងជាត្រូវមានការងាររកស៊ីជាមួយនឹងជនជាតិចិនមែនដែរហ្នឹង»៕