.jpg)
ឈុតសម្លៀកបំពាក់ច្នៃពីក្រណាត់សារុង របស់តារាចម្រៀងស្រី ទូច ស្រីលក្ខណ៍។ ហ្វេសប៊ុក
ភ្នំពេញៈ ក្រៅពីខំរិះរកបទចម្រៀងប្រភេទអូរីជីណល ឬការនិពន្ធដោយខ្លួនឯងមកបំពេអារម្មណ៍ទស្សនិកជន និងផុសផុលភាពខ្នះខ្នែងរកមូលនិធិដើម្បីជួយព្យាបាលជំងឺមិត្តអ្នកសិល្បៈរួមជំនាន់គឺលោក យូ ឌីស្កូ មានជំងឺខូចតម្រងនោម ឬខូចក្រលៀននាពេលថ្មីៗមកនេះ តារាចម្រៀងស្រីអ្នកនាងទូច ស្រីលក្ខណ៍ ក៏លេចចេញគំនិតច្នៃប្រឌិតថ្មីគួរឲ្យកោតសរសើរគឺច្នៃសម្លៀកបំពាក់ និងឈុតស្រោមខ្នើយ ទ្រនាប់ចាន កែវពីក្រណាត់សារុងដ៏ស្រស់ស្អាតថែមទៀត។
តារាចម្រៀងស្រីមានកូនមួយ ដែលទើបតែបានប្រកាសវិលចូលសិល្បៈក្នុងពេលថ្មីៗ ក្រោយពីនាងសម្រេចចិត្តចូលរោងការជាមួយស្វាមី មានសញ្ជាតិហូឡង់ ដើមកំណើត អង់គ្លេស លោក ម័រថេន ក្វាមេន តាំងពីឆ្នាំ ២០១១ មក និងបានសម្រេចចិត្តវិលចូលរកសិល្បៈ ដែលជាឆ្នាំងបាយចាស់វិញក្រោយពីបែកធ្លាយដំណឹងចចាមអារ៉ាមថា លែងលះស្វាមីនោះ ប្រាប់ភ្នំពេញប៉ុស្តិ៍ពីគំនិតច្នៃប្រឌិតថ្មីរបស់ខ្លួនថា៖ «ទើបតែពេលថ្មីៗប្រមាណជា ២- ៣ ខែនេះប៉ុណ្ណោះ ដែលនាងខ្ញុំលេចចេញគំនិតចង់យកសាច់ក្រណាត់សារុងមកកែច្នៃជាសម្លៀកបំពាក់ ជាស្រោមខ្នើយ ឬទ្រនាប់កែវ ចាន ជាដើមនោះគឺដោយសារតែការសាកល្បងពីផ្ទះខ្លួនឯងមុន។ នាងខ្ញុំបានកាត់ស្រោមខ្នើយ ទ្រនាប់ចាន និងកែវសម្រាប់ប្រើប្រាស់នៅផ្ទះផ្ទាល់ខ្លួន គឺមើលទៅឃើញប្លែក និងមានលក្ខណៈស្អាតម្យ៉ាង ហើយក្រោយមកក៏ថតរូបបង្ហោះចែកជូនដល់បងប្អូនយើងមើលកម្សាន្ត»។
អ្នកនាង ទូច ស្រីលក្ខណ៍ បានឲ្យដឹងពីចំណាប់អារម្មណ៍មហាជនមកលើការកែច្នៃរបស់ខ្លួនថា៖ «ក្រោយពីបង្ហោះរូប និងជូនដំណឹងពីការលក់ដូរនូវគ្រឿងច្នៃពីក្រណាត់សារុងនោះមក ឃើញថា បងប្អូនមានការចាប់អារម្មណ៍ខ្លាំងទៅលើផលិតផលជាស្រោមខ្នើយ ទ្រនាប់ចាន ឬទ្រនាប់កែវ ខ្លាំងជាងសម្លៀកបំពាក់។ ដោយឡែកការលក់ដូរវិញនោះ នាងខ្ញុំក៏មានការគិតពីតម្លៃផងដែរ សម្រាប់បងប្អូនយើងដោយយល់ឃើញថា ប្រសិនបើដាក់តម្លៃខ្ពស់ពេក ពិតជាមិនអាចលក់បានទៅតាមទីផ្សារបងប្អូនខ្មែរភាគច្រើននោះឡើយ សម្រាប់ផលិតផលកែច្នៃពីក្រណាត់សារុងនេះ»។
តារាចម្រៀងស្រី ដែលពូកែខាងសម្តែងលេងទឹកមុខ និងមានទេពកោសល្យដ៏ប៉ិនប្រសប់ ក្រមិចក្រមើម តែងតែបានធ្វើឲ្យមហាជនផ្ទុះសំណើចមិនដឹងខ្លួនអ្នកនាង ទូច ស្រីលក្ខណ៍ ក៏បញ្ជាក់ប្រាប់ ភ្នំពេញ ប៉ុស្តិ៍ពីដំណើរការបច្ចុប្បន្នលើផលិតផលកែច្នៃនេះទៀតដែរថា៖ «ឥឡូវនេះនិយាយឲ្យត្រង់ទៅចំពោះម៉ូដសម្លៀកបំពាក់នាងខ្ញុំមិនទាន់បានកាត់សម្រាប់ដាក់លក់នៅឡើយដែរទេ ដោយរង់ចាំមើលពីសម្ទុះនៃការពេញនិយម និងស្ទង់តម្លៃសិន ខណៈនាងខ្ញុំ គ្រាន់តែបានកាត់សម្រាប់ស្លៀកខ្លួនឯងដើម្បីបង្ហាញបងប្អូនសិន ហើយខ្ញុំក៏សង្ឃឹមថា បងប្អូនគាំទ្រវានៅពេលក្រោយជាមិនខាន។ ចំពោះស្រោមខ្នើយ នាងខ្ញុំ ក៏បានដាក់កំណត់លក់ហើយគឺ ១ តម្លៃ ៥ ដុល្លារ ហើយទ្រនាប់កែវ ឬចាន នោះមានតម្លៃ ៣ ឬ ៤ ដុល្លារ ដោយមានបងប្អូនមួយចំនួនបានកុម្ម៉ង់ជាបណ្តើរៗហើយដែរ»៕
