ភ្នំពេញៈ ថ្មីៗនេះស្រាប់តែ អ្នកនាង ទូច ស្រីល័ក្ខណ៍ តារាចម្រៀងស្រីយេយេ ដែលទើបបានវិលត្រឡប់មកប្រឡូកសិល្បៈវិញក្រោយពីបាត់មុខមួយរយៈដោយសារបានសម្រេចចិត្តទៅរៀបការជាមួយស្វាមីបរទេសនោះ បង្ហោះសារបែបរំឭកពីទុក្ខលំបាករបស់អ្នកសិល្បៈដែលត្រូវបានជនមានអំណាចដោយប្រាក់មាក់ងាយ និងមិនឲ្យតម្លៃដល់អ្នកសិល្បៈ បង្កការងឿងឆ្ងល់ពីមហាជន។
ក្រោយពីបានឃើញសារដ៏វែងអន្លាយគួរសមរបស់តារាចម្រៀងស្រីដែលកំពុងតែស្រូបបាននូវប្រជាប្រិយភាពលើវិថីសិល្បៈឡើងវិញអ្នកនាង ទូច ស្រីល័ក្ខណ៍ មកក៏មានការលើកយកមកជជែកគ្នាមួយរំពេចដែរថា៖ «បើយើងពិនិត្យតាមដានមើលនូវសាររបស់នាងនោះអាចនិយាយបានថាអ្នកនាង ទូច ស្រីល័ក្ខណ៍ ក៏ធ្លាប់ទទួលរងការមាក់ងាយ ឬមិនឲ្យតម្លៃពីជនមានអំណាចដោយទឹកប្រាក់ដែរ មែនទេទើបបានជានាងហ៊ានទម្លាយសារពីក្នុងចិត្តមកក្រៅអ៊ីចឹង?»។
តារាចម្រៀងស្រីដែលមានផុសផុលទាំងការខំផលិតបទចម្រៀងអូរីជីណលផ្ទាល់ខ្លួន និងចូលរួមកិច្ចការសប្បុរសធម៌ជួយសង្គម អ្នកនាង ទូច ស្រីល័ក្ខណ៍ បង្ហើបប្រាប់ពីអត្ថន័យសារខ្លួនដល់ភ្នំពេញ-ប៉ុស្តិ៍ថា៖ «តាមពិតទៅសាររបស់នាងខ្ញុំមានន័យ ២-៣ យ៉ាងឯណោះ។ ទី ១ ចង់ប្រាប់ថាតាមរយៈបណ្តាញសង្គមសម័យបច្ចុប្បន្ននេះគឺវាជាកញ្ចក់ឆ្លុះបញ្ចាំងពីតថភាពសង្គមទាំងឡាយ ជាពិសេសសម្រាប់អ្នកសិល្បៈតែម្តង ប្រសិនបើយើងប្រៀបធៀបកាលពីសម័យ ១០ ឆ្នាំមុននោះគឺខុសគ្នាខ្លាំងណាស់។ កាលពី ១០ ឆ្នាំប្រសិនបើអ្នកសិល្បៈរងការមាក់ងាយដោយអំណាចអ្នកមានប្រាក់មួយចំនួនតូច មិនត្រូវបានគេដឹងឮ ឬមើលឃើញអំពើមិនល្អនេះឡើយ តែឥឡូវនេះទោះបីជាអ្នកមានអំណាច ឬឋានៈដល់ណាក្តីក៏ត្រូវបានបណ្តាញសង្គមជួយចែករំលែកបន្តឲ្យមហាជនបានដឹងឮយ៉ាងឆាប់រហ័សតែម្តង។ ទី ២ នាងខ្ញុំចង់ប្រាប់ថាអ្នកសិល្បៈនីមួយៗគឺសុទ្ធតែមានតម្លៃសិល្បៈផ្ទាល់ខ្លួនរបស់ពួកគាត់ ដូច្នេះសុំមេត្តាកុំមានការរិះគន់ ឬដៀលបែបណាមួយ ដែលមើលរំលងពីតម្លៃពិតពួកគាត់អីគឺគាត់ក៏បានចូលរួមក្នុងសិល្បៈដែរ។ ទី ៣ នាងខ្ញុំចង់ផ្តាំផ្ញើសារផ្ទាល់ខ្លួនដែរថានឹងខិតខំរិះរកនិពន្ធបទចម្រៀងដែលមានន័យលើកស្ទួយតម្លៃវប្បធម៌ជាតិ និងផ្តល់តម្លៃអប់រំទៅដល់យុវជនជំនាន់ក្រោយ»។
ចំពោះបទពិសោធផ្ទាល់ខ្លួនដ៏អាប់អួនៅក្នុងពិភពនៃសិល្បៈកាលពី ១០ ឆ្នាំមុននោះ ទូច ស្រីល័ក្ខណ៍ ក៏បង្ហើបឲ្យបានដឹងបន្តទៀតផងដែរថា៖ «សម្រាប់រូបនាងខ្ញុំក៏ធ្លាប់ប៉ះដែរ។ តែវាមិនមែនជារឿងធ្ងន់ធ្ងរនោះឡើយ ដោយគ្រាន់តែជាការទទួលរងនូវពាក្យពេចន៍មាក់ងាយដូចជាអ្នកសិល្បៈទូទៅអ៊ីចឹង!»៕