.jpg)
កញ្ញា ឌួង ហ្សូរីដា និងសត្វដំរីឈ្មោះ បាក់ម៉ៃ កាលពីនៅរស់ ក្នុងការងារជាទូតសុច្ឆន្ទៈ។ រូបថត ហ្វេសប៊ុក, តារាស្រីកញ្ញា ឌួង ហ្សូរីដា ជាទូតសុច្ឆន្ទៈនៃសមាគមអភិរក្សដំរីអៃរាវត្តា នៅខេត្តរតនគិរី។ រូបថត ហុង មិនា
ភ្នំពេញ៖ ចាប់តាំងពីក្លាយជាទូតសុច្ឆន្ទៈនៃសមាគមអភិរក្សដំរីអៃរ៉ាវត្តា ដែលមានមូលដ្ឋាននៅខេត្តរតនគិរីមកនោះ មានរយៈពេល ១ ឆ្នាំហើយ ខណៈតារាសម្តែង និងពិធីការិនីរូបស្រស់កញ្ញា ឌួង ហ្សូរីដា កើតសេចក្តីរន្ធត់ចិត្តខ្លាំងនៅពេលឮដំណឹងសត្វដំរីឈ្មោះ Bakmai បានបាត់បង់ជីវិតនាពេលថ្មីៗនេះ។
ដោយសារមើលឃើញពីគុណសម្បត្តិតាមរយៈសកម្មភាពចូលរួម និងឆន្ទៈល្អ ចង់ជួយធ្វើកិច្ចការផ្នែកកិច្ចការអភិរក្សសត្វដំរីនៅកម្ពុជានោះ តារាសម្តែងស្រី និងពិធីការិនី និងជាថៅកែអាជីវកម្មលក់ផលិតផលរក្សាសម្រស់ កញ្ញា ឌួង ហ្សូរីដា និងលោក ហេរ៉ូ ត្រូវបានសមាគមអភិរក្សដំរីអៃរ៉ាវត្តា តែងតាំងជាអគ្គរដ្ឋទូតសុច្ឆន្ទៈកាលពីឆ្នាំ ២០១៩ កន្លងមក។
សម្រាប់កិច្ចការងារសង្គមវិញតារាសម្តែង និងពិធីការិនីរូបនេះ ក៏មានសកម្មភាពជាហូរហែមិនសូវលស់ពេលនោះទេ ខណៈកញ្ញា ឌួង ហ្សូរីដា ក៏បានទទួលលិខិតសរសើរ ក្រោយពីចូលរួមជួយក្នុងសកម្មភាពរៃអង្គាសប្រាក់សម្រាប់មូលនិធិសមាគមអភិរក្សដំរីអៃរ៉ាវត្តា កាលពីចុងខែមីនា ឆ្នាំ ២០១៩ កន្លងមក នៅឯសណ្ឋាគាររ៉ាហ្វល់ឡឺរ៉ូយាល់។
ទោះបីជាខាងភ្នំពេញប៉ុស្តិ៍ មិនអាចទទួលបាននូវការបញ្ជាក់ផ្ទាល់ពីអារម្មណ៍របស់តារាស្រី ជាទូតសុច្ឆន្ទៈសមាគមអភិរក្សដំរីអៃរ៉ាវត្តា ពីកញ្ញា ឌួង ហ្សូរីដា យ៉ាងណាក្តី តែតារាស្រីដែលជាទូតសុច្ឆន្ទៈរូបនេះ បង្ហាញសារយ៉ាងស្លុតចិត្តខ្លាំង ចំពោះដំណឹងបាត់បង់ជីវិតរបស់ដំរីឈ្មោលមានអាយុ ៣៧ ឆ្នាំ ឈ្មោះ បាក់ម៉ៃ នោះដែរ តាមបណ្តាញសង្គមហ្វេសប៊ុករបស់ខ្លួន។
កញ្ញា ឌួង ហ្សូរីដា បង្ហោះសារថា៖ «RIP To Bakmai ជាដំណឹងគួរឲ្យសោកសង្រេងបំផុត! បាក់ម៉ៃ ជាដំរីដ៏សែនឆ្លាត រហ័សរហួន និងមានប្រជាប្រិយភាពគួរឲ្យស្រឡាញ់ចូលចិត្ត ហេតុអ្វីឯងទៅចោលពួកយើងលឿនម្ល៉េះ? ខេត្តរតនគិរី មានតែពួកឯង ៤ នាក់ (ក្បាល) ទេ ហើយពួកយើង សង្ឃឹមថា ពួកឯងជាអ្នកបន្តពូជ និងបង្កាត់ពូជបង្កើតហ្វូងដំរី ជាច្រើននៅទីនេះ។ សូមឯងទៅកាន់សុគតិភពចុះ ពួកយើងនឹងនៅតែចងចាំបុរសសង្ហា Bakmai ក្នុងដួងចិត្ត និងបេះដូងរហូត គាត់(វា)ជាដំរីដំបូងបង្អស់ ដែលខ្ញុំហ៊ានលេង និងស្និទ្ធស្នាលជាមួយវា ហើយខ្ញុំក៏ដឹងដែរថា គាត់ចូលចិត្តខ្ញុំ និងគាត់ចេះសម្របជាមួយមនុស្សផ្សេងៗបានដោយងាយ ទោះបីធ្លាប់ឆ្លងកាត់ជីវិតដ៏សែនកម្សត់រហូតមកដល់សមាគមអៃរ៉ាវត្តា របស់យើង បាក់ម៉ៃ អើយ ខ្ញុំពិតជាមិនដឹងនិយាយថាម៉េចទេ!»។
ដំរីឈ្មោះ បាក់ម៉ៃ ជាសត្វដំរី ១ ក្បាល ក្នុងចំណោមដំរីទាំង ៤ ក្រោមការគ្រប់គ្រងសមាគមអភិរក្សដំរីអៃរ៉ាវត្តា នៅក្នុងខេត្តរតនគិរី មានអ្នកស្រី ខៃ ចិន្តា ជាប្រធានសមាគម ខណៈមូលហេតុនៃការស្លាប់ក៏ពុំទាន់មានការបញ្ជាក់ពិតប្រាកដនៅឡើយទេ ខណៈដំរី បាក់ម៉ៃ បានស្លាប់កាលពីថ្ងៃទី ២១ ខែ ឧសភា ឆ្នាំ ២០២០៕
