.jpg)
ភ្នំពេញ: ក្រោយពីផ្ទុះរឿងយ៉ាងក្តៅគគុក ដោយសារមានបុរសម្នាក់ប្រើហិង្សា ជះស្រាបៀរទៅលើតារាចម្រៀងស្រីល្បីនៅហង្សមាសរបស់ក្រុមយុវវ័យកញ្ញា ទេព បូព្រឹក្ស កាលពីយប់ម្សិលមិញនៅហាងបៀរហ្គាឌិនឈ្មោះ «សមុទ្រ» ក្បែរមន្ទីរពេទុកុមារជាតិមក នៅត្រឹមរសៀលថ្ងៃនេះ នាងបានដាក់ពាក្យប្តឹងជនដៃដល់ទារសំណង ១០ ម៉ឺន ដុល្លារ ហើយក៏គ្រោងនឹងយកប្រាក់ទាំងនោះទៅជួយដល់មន្ទីរពេទ្យគន្ធបុប្ផា និងធ្វើសប្បុរសធម៌ជួយដល់សិល្បករចាស់ជួបការលំបាក។
នេះបើតាមការអះអាងរបស់លោក ហេង ឡុង ជាគូស្នេហ៍របស់អ្នកនាង ចន ច័ន្ធលក្ខិណា ដែលប្រធានសមាគមអ្នកសិល្បៈកម្ពុជា បានបង្ហើបប្រាប់ភ្នំពេញប៉ុស្តិ៍ នារសៀលថ្ងៃនេះថា៖ «រឿងរ៉ាវប្រើហិង្សាលើកញ្ញា ទេព បូព្រឹក្ស នៅពេលនេះ យើងកំពុងតែដោះស្រាយគ្នាតាមផ្លូវច្បាប់ ដោយយើងមេធាវីតំណាងជនរងគ្រោះកញ្ញា ទេព ប្រឹក្ស និងមេធាវីខាងម្ចាស់ហាង។ ហើយនៅម៉ោង២-៣ រសៀលថ្ងៃនេះ មេធាវីទាំងសងខាង នឹងជួបគ្នាដោះស្រាយរឿងនេះ។ លោក ហេង ឡុង បន្តថា៖ «ជាបឋមនោះ កញ្ញា ទេព បូព្រឹក្ស បានដាក់ពាក្យប្តឹងរួចហើយកាលពីព្រឹកមិញ ដោយទារសំណងជាប្រាក់ចំនួន ១០ ម៉ឺន ដុល្លារ និងលក្ខខណ្ឌនានាទៀត។ កញ្ញា ថា ចំពោះប្រាក់ជំងឺចិត្តនេះ នឹងប្រើជាមូលនិធិជួយមន្ទីរពេទ្យគន្ធបុប្ផា និងជួយដល់ក្រុមសិល្បករចាស់ៗ ដែលជួបការលំបាក»។
ខណៈកញ្ញា ទេព បូព្រឹក្ស ក៏បង្ហើបប្រាប់ថា៖ «សុំទោសផងបង!ពេលនេះនាងខ្ញុំអធ្យាស្រ័យមិនទាន់អាចបកស្រាយបងបន្ថែមបានទេ និងរង់ចាំបន្តិចសិនព្រោះថា មេធាវីយើងកំពុងតែដោះស្រាយរឿងនេះជាមួយខាងជនដៃដល់»។
គួរបញ្ជាកថា ករណីកើតហិង្សាជះស្រាបៀរដាក់តារាចម្រៀងស្រីនៅហង្សមាស កញ្ញា ទេព បូព្រឹក្ស បានកើតឡើងនៅយប់ថ្ងៃទី ២៥ ខែធ្នូ ឆ្នាំ២០១៨ នៅក្នុងបរិវេណភោជនីយដ្ឋានឈ្មោះ«សមុទ្រ» ដែលមានអសយដ្ឋាននៅក្បែរមន្ទីរកុមារជាតិ ក្នុងសង្កាត់ទឹកល្អក់ទី១ ខណ្ឌទួលគោក។ ករណីនេះ ក៏មានការទាមទាររកយុត្តិធម៌សំណាក់ក្រុមសិល្បករ-សិល្បការិនីរួមអាជីព និងប្រិយមិត្តអ្នកគាំទ្រនាងផងដែរ ក្នុងការជម្រុញជួយឲ្យសមត្ថកិច្ចស្វែងរកយុត្តិធម៌ដល់កញ្ញា ទេព បូព្រឹក្ស៕
.jpg)
