.jpg)
រូបថត និងសារដែល ជី-ដេវីដ បង្ហោះក្នុងបណ្ដាញសង្គមកាលពីថ្មីៗកន្លងទៅនេះ។ រូបថត អីុនស្តាក្រាម
ភ្នំពេញ៖ គូស្នេហ៍តារាដែលធ្វើឲ្យអ្នកគាំទ្រ អន្ទះសាចង់ឃើញក្រាបផ្ទឹម តារាចម្រៀងពូកែក្បាច់រាំ កញ្ញា ទេព បូព្រឹក្ស និងកំពូលបេះដូងរាងខ្ពស់ស្រឡះម្ចាស់បទ «រាំញីកែងជើង» លោក ជី-ដេវីដ បានបំផុសការសង្ស័យជាថ្មី ពីកាលបរិច្ឆេទចូលរោងជ័យរបស់អ្នកទាំង ២។
ភ្ជាប់ជាមួយរូបថតកៀកកើយផ្អែមល្ហែមជាច្រើនសន្លឹក មានទាំងកាយវិការឱបថើបប៉ះបបូរមាត់យ៉ាងស្អិត នៅទឹកដីទេសចរណ៍ធម្មជាតិខេត្តមណ្ឌលគិរី តារាចម្រៀងលោក ងួន ចាន់ដេវីត ហៅ ជី-ដេវីដ បានភ្ជាប់នឹងសំណេរឲ្យតម្រុយថា៖ «ផ្ញើសេចក្ដីនឹករឭក និងសេចក្ដីស្រឡាញ់នៅមណ្ឌលគិរី សាងអនុស្សាវរីយ៍មុនពេលឃ្លាតពីពាក្យថាសង្សារ»។
ទោះជាសកម្មភាពនែបនិត្យរវាង តារាចម្រៀងស្រីនិយមលេងខ្លួនប្លែកៗ កញ្ញា ទេព បូព្រឹក្ស និងម្ចាស់ស្នេហ៍ខ្ពស់ស្រឡះ លោក ជី-ដេវីដ បានក្លាយជារឿងធម្មតា ប៉ុន្តែសំណេរសារថា «មុនឃ្លាតពីពាក្យថាសង្សារ» បានធ្វើឲ្យអ្នកគាំទ្រគូស្នេហ៍នេះលើកឡើងថា ចំណងស្នេហ៍របស់តារាល្បីវ័យក្មេងទាំង ២ ដួងបានឈានដល់ចំណុចកាន់តែរឹងមាំ និងអាចរំលេចជាពិធីផ្សារភ្ជាប់ចំណងស្នេហ៍ជាផ្លូវការក្រោមរូបភាពណាមួយពុំខាន។
នៅពីក្រោមការបង្ហោះរូបថត និងសំណេររបស់ ជី-ដេវីដ ប្រិយមិត្តជាច្រើនបានចូលបញ្ចេញមតិ ដោយខ្លះបានសរសេរថា «អបអរសាទរ idols ទាំងពីរ» ខ្លះទៀតលើកចំណោទសួរថា «បើពួកបងទាំងពីរលាពីពាក្យថាសង្សារ មានតែពួកបងភ្ជាប់ពាក្យ ឬរៀបការ»។
យ៉ាងណាក្ដី ជុំវិញចម្ងល់ថាតើ គូស្នេហ៍ចម្រៀង កញ្ញា ទេព បូព្រឹក្ស និងលោក ជី-ដេវីដ នឹងដឹកដៃគ្នាដល់វេលាមង្គលឆាប់ៗឬយ៉ាងណានោះ ពុំមានការបកស្រាយពីភាគីម្ខាងណាឡើយ។
គួររំឭកផងដែរថា ក្រៅពីភាសាប្រើពាក្យហៅគ្នាថា «បង និងអូន» ពេញៗមាត់ប្រៀបដូចប្តីប្រពន្ធរៀបការថ្មីថ្មោងទៅហើយនោះ តារាចម្រៀងស្រីកំពុងល្បីវីដេអូញ៉ាំអាហារធ្វើឲ្យទស្សនិកជនឃើញហើយកូរពោះនោះ ក៏បានបោះទុន ១៤ ម៉ឺនដុល្លារ ជាមួយម្ចាស់ស្នេហ៍ ជី-ដេវីដ លើជំនួញគ្រឿងសម្អាងកាលពីឆ្នាំ ២០១៨ ផងដែរ។ ចំណងស្នេហ៍របស់ពួកគេរឹតតែធ្វើឲ្យមហាជនជឿថា នឹងឈានដល់ថ្ងៃរៀបការឆាប់ៗ ខណៈស្រីស្រស់ ទេព បូព្រឹក្ស និងលោក ជី-ដេវីដ ក៏បានថតរូប Pre-Wedding នៅដែនកោះម៉ាល់ឌីវ កាលពីខែមីនា ឆ្នាំ ២០១៩ រួចមកហើយ។
កាលណោះ តារាចម្រៀង ទេព បូព្រឹក្ស បានប្រាប់ ភ្នំពេញ ប៉ុស្ដិ៍ ថា៖ «គ្រាន់តែជាគម្រោងថតទុក ខណៈពួកយើងជិតទៅដើរលេងក្រៅប្រទេស គឺប្រទេសម៉ាឌីវ ដែលត្រូវសម្រាកដើរលេងនៅទីនោះ ៣-៤ ថ្ងៃ។ គិតថា ឆ្លៀតពេលទៅដើរលេងក៏ថតរូប ឬវីដេអូ ដើម្បីសន្សំទុក Pre-Wedding តែម្តងទៅ ព្រោះថាជាវេលាល្អ ហើយក៏កម្រនឹងបានទៅទៀត»។
កាលណោះនាងក៏បានបញ្ជាក់ថា៖ «ក្រោយពីពួកយើងបានស្រឡាញ់គ្នានារយៈពេលប៉ុន្មានឆ្នាំនេះមានចាស់ទុំដឹងឮទាំងសងខាងហើយឈានមកក្លាយជាគូសង្សារយល់ចិត្តគ្នាមក យើងសុខចិត្តរក្សានៅត្រឹមជាគូស្នេហ៍សិន គឺមិនទាន់ចង់រហ័សទៅរៀបការនោះទេ»៕
