ក្រុងប៉េកាំង: អាហារប្រណីតបែបថ្មីនៅក្នុងប្រទេសចិនមានកាន់តែខ្ពស់ទៅៗខណៈត្រូវបានគេប្រើក្នុងពិធីជប់លៀងលើវេហាស៍ដ៏ស្រស់ត្រកាល មួយនៅលើគែមកំពូលភ្នំថ្មចោតខ្ពស់ នៅភ្នំឡាវជុន ក្នុងក្រុងលូយ៉ាង ខេត្ដហេណាន់ភាគកណ្ដាលប្រទេសចិន។
ភ្ញៀវទេសចររាប់រយនាក់ ត្រូវបានបម្រើអាហារគ្រឿងសមុទ្រ និងស្រាទំពាំងបាយជូរ លើរានហាលជាប់គែមជ្រលងភ្នំកម្ពស់ជាង ២ គីឡូម៉ែត្រ ជាផ្នែកមួយនៃពិធីបុណ្យរដូវក្ដៅនៅភ្នំឡាវជុន ខេត្ដហេណាន់។
ពិធីជប់លៀងដែលរៀបចំឡើងនៅលើរានហានប្រវែង ១៨២ សង់ទីម៉ែត្រ សង់ភ្ជាប់នឹងគែមជ្រលងភ្នំ។ តុអាហារដ៏វែងត្រូវបានដំឡើងតាមរានហាលតាំងពីដើមទីរហូតដល់ចុងបញ្ចប់។
បទពិសោធទទួលទានអាហារលើអាកាសដ៏ស្រៀវស្រើប បានបង្ហាញពីរូបភាពភ្ញៀវអង្គុយលើគែមមរណៈកម្ពស់ប្រមាណ ២២១៧ ម៉ែត្រលើនីវ៉ូទឹកសមុទ្រ ខណៈពួកគេភ្លក្សអាហារគ្រឿងសមុទ្រ បន្លែ និងផ្លែឈើក្រោមបរិយាកាសស្រៀវឆ្អឹងខ្នង។
បុគ្គលិករត់តុអំឡុងពិធីនេះ ខ្លះដៃកាន់បង្កងក្រហមឆ្អិនឆ្អៅ ផ្សិតចៀន និងផ្លែឈើស្រស់។ បង្កងស្ងោររាប់សិបក្បាលត្រូវបានដាក់ជូនភ្ញៀវ ដែលអង្គុយរង់ចាំដោយទឹកមុខរីករាយ។
ផ្លែឈើរដូវក្ដៅ ដូចជា ឪឡឹក និងត្រសក់ផ្អែម អាចជួយបំបាត់ភាពស្រែកទឹករបស់ភ្ញៀវ ខណៈបុគ្គលិកបន្ដលើកបង្អែម នំនែកជាហូរហែសម្រាប់ឲ្យភ្ញៀវលាងមាត់។
រានហាលដ៏ស្រៀវស្រើបលើជ្រលងភ្នំនោះ ថែមទាំងក្រាលកញ្ចក់ សម្រាប់ឲ្យគយគន់ទេសភាពនៅក្រោមជើងផ្ទាល់ផងដែរ។
ព្រឹត្ដិការណ៍អាហារលើអាកាសនេះ ត្រូវបានរៀបចំឡើងដើម្បីអបអរពិធីបុណ្យរដូវក្ដៅ។ ស្ថិតក្នុងគោលដៅកំពូលលំដាប់ទី 5A របស់ប្រទេស ភ្នំឡាវជុន ជាទីឋានគយគន់ថ្ងៃលិច និងថ្ងៃរះ ខណៈរានហាលរបស់វាជាទីឋានគន់ទេសភាពដ៏ល្អបំផុតមួយផងដែរ៕HR