ភ្នំពេញ៖ ថ្មីៗនេះស្រាប់តែបង្កើតភាពភ្ញាក់ផ្អើលមហាជនអ្នកគាំទ្រ និងសង្គមអ្នកសិល្បៈ ខណៈប្តីប្រពន្ធមានអាជីពជាតារាចម្រៀងដូចគ្នាអ្នកនាង យក់ ឋិតរដ្ឋា និងលោក ឃុំ ប៉ុណ្ណាដែត ទទួលដំណឹងល្អរឿងបង្កើនសមាជិកថ្មីក្នុងគ្រួសារគឺមានបុត្រីទី៣ សម្រេចក្តីប្រាថ្នា នាគ្រាមានវិបត្តិកូវីដ ១៩ ទោះបីជាសិល្បៈរាងស្ងាត់បន្តិចក៏ដោយ។
ប្រិយមិត្តគាំទ្រមានការសាទរច្រើន នាពេលឃើញតារាចម្រៀងស្រីជ្រកទ្រនំថោន អ្នកនាង យក់ ឋិតរដ្ឋា បង្ហោះសារមួយឃ្លាដែលអមទៅនឹងរូបថតពពោះកូនស្រីទី៣ ខណៈអ្នកនាងក៏មានកូនប្រុស ២ នាក់ រួចមកហើយនោះថា៖ «អាទិត្យក៏នៅផ្ទះ ចន្ទក៏នៅផ្ទះ នៅផ្ទះច្រើនពេកធំតែពោះអ៊ីចឹងខ្ញុំ ហាសហា! បានមួយទៀតដូចចិត្តហើយលោកប្តីអើយ យើងបិទវគ្គត្រឹមហ្នឹងណាប្តី!»។
ដោយឡែកចំពោះបុត្រទី៣ ដែលប្តីប្រពន្ធជាអ្នកសិល្បៈ កំពុងតែសមតាមបំណងនោះ មានវ័យ ៦ ខែនៅក្នុងផ្ទៃទៅហើយ មិនមែនទើបតែនឹងមាននាពេលអ្នកសិល្បៈ សម្រាកនៅផ្ទះក្នុងគ្រាមានវិបត្តិកូវីដ ១៩ នេះឡើយ បើតាមការបង្ហើបពីលោក ឃុំ ប៉ុណ្ណាដែត ជាប្តីអ្នកនាង យក់ ឋិតរដ្ឋា។ លោកបានបញ្ជាក់បន្ថែមថា៖ «កូនទី៣ នេះ គាត់មានវ័យ ៦ខែ ហើយ ដោយត្រៀមសម្រាលនៅចុងខែសីហា ខាងមុខនេះ។ ជាការពិតសម្រាប់កំណើតកូនទី៣ គឺពួកយើងមានផែនការសម្រាប់គ្រួសារតាំងពីចុងឆ្នាំ ២០១៩ មកម្ល៉េះ មិនមែនទើបតែមានក្នុងពេលមានស្ថានភាពជំងឺកូវីដ ១៩ នេះឡើយ»។
នាមួយរយៈចុងក្រោយនេះ សង្កេតឃើញដែរថា តារាចម្រៀងស្រីរូបនេះ ក៏មានឱកាសថតកុនបន្ថែមពីលើអាជីពចម្រៀងជាមួយប្តីលោក ឃុំ ប៉ុណ្ណាដែត ផងដែរគឺថតកុនឲ្យផលិតកម្ម LD Picture និងទើបដាក់ទុនបើកហាងលក់ផលិតផលសម្អាងកាយឈ្មោះ «CHOB» ដែលមានទីតាំងស្ថិតនៅភូមិបាយាប សង្កាត់ភ្នំពេញថ្មី ខណ្ឌសែនសុខ ក្នុងតំបន់ផ្សារ Makro កម្ពុជា ខណៈប្តីប្រពន្ធអ្នកសិល្បៈ ១ គូនេះ ក៏រកស៊ីបើកភោជនីយដ្ឋានឈ្មោះ FactoryPub ហើយដែរ។
តែក្រោយពីចូលជ្រកទ្រនំថ្មីថោន សន្សំបានពិន្ទុល្អ ខំសាងកេរ្តិ៍ឈ្មោះលើវិថីចម្រៀងសាជាថ្មីបានឡើងកូដគួរសមវិញជាបណ្តើរទៅហើយនោះ ស្រាប់តែតារាចម្រៀង យក់ ឋិតរដ្ឋា លេចឮរលកព័ត៌មានចចាមអារ៉ាមពីសង្គមសិល្បៈថា អ្នកនាងត្រូវផលិតកម្មថោន យកមកធីបទុកចោលមិនសូវជាមានចេញបទឲ្យច្រៀង។
បើតាមសភាពជាក់ស្តែងតារាចម្រៀងស្រីកូន ២ ដែលមានស្វាមីធ្លាប់ជាតារាចម្រៀងផងដែរ គឺលោក ឃុំ ប៉ុណ្ណាដែត តែងតែមានបទចម្រៀងជារឿយៗ ចេញបន្តបន្ទាប់មិនសូវជាដាច់ប៉ុន្មាននោះទេនៅក្នុងទ្រនំផលិតកម្មថោននោះ៕