.jpg)
នាគ Dragon of Calais ទាក់ទាញភ្ញៀវទេសចរជិតឆ្ងាយ។ រូបថត AFP
ក្រុងប៉ារីស៖ ចំពោះមនុស្សភាគច្រើន នាគគ្រាន់តែជាសត្វក្នុងទេវកថា ឬភាពយន្ដព្រេងនិទានប៉ុណ្ណោះ តែសម្រាប់ក្រុង Calais ប្រទេស បារាំង នាគព្រួសភ្លើងកំពុងស្រែកទន្ទ្រានតាមដងវិថី។ យ៉ាងណាមិញ កុំបារម្ភចំពោះសុវត្ថិភាព ពីព្រោះសត្វនាគនេះក្លែងក្លាយទេ។
នាគកម្ពស់ ១៤ ម៉ែត្រ និងប្រវែង ២៥ ម៉ែត្រ ជាសត្វព្រួសភ្លើងដ៏ធំមួយដែលត្រូវបានផលិតពីឈើឆ្លាក់ និងដែក។ តារាក្នុងព្រេងនិទាននេះបានផុសចេញពីសមុទ្រ និងធ្វើឲ្យអ្នកក្រុង Calais ភ័យស្លន់ស្លោ។ ក្រោយពីសម្ដែងចប់ នាគនៅតែរក្សាទុកក្នុងទីក្រុងដើម្បីទាក់ទាញភ្ញៀវទេសចរ។
នាគ Dragon of Calais ត្រូវបានបង្កើតឡើងដោយ La Machine ជាអង្គការក្រៅរដ្ឋាភិបាលមួយជួយបណ្ដុះបណ្ដាលអ្នកសិល្បៈ ជាងអគ្គិសនី និងអ្នកឌីហ្សាញឈុតឆាកភាពយន្ដ ដែលរួមគ្នាដើម្បីរចនាស្ដេចសត្វព្រេងកថានេះ។
នាគដ៏ធំផ្គុំពីដែក និងឈើនេះ គឺជាសត្វធំបំផុតរបស់ La Machine។ ក្រុមអ្នកផលិតបានឲ្យដឹងថា៖ «នាគ គឺជាសត្វថែរក្សាពិភពលោក។ វាជួយរក្សាតុល្យភាពផែនដី។ នាគមានរូបរាងគ្រប់សណ្ឋាន និងគ្រប់ពណ៌ ហើយវាមានអានុភាពខ្លាំងក្លា និងភាពវិសេសរៀងៗខ្លួន»។
នាគយន្ដកម្ពស់ ១៤ ម៉ែត្រ និងប្រវែង ២៥ ម៉ែត្រ ក្នុងក្រុង Calais។ AFP
ពួកគេបន្ដថា៖ « Dragon of Calais ចេះព្រួសភ្លើង ហោះហើរ ដើរលើដី និងចុះទឹក។ វាចូលចិត្ដនៅលើដីគោក និងសមុទ្រនៃភាគខាងជើង។ នាគបង្ហាញខ្លួននៅមុខមនុស្សក្នុងករណីចាំបាច់ប៉ុណ្ណោះ ដើម្បីចេញមុខដោះស្រាយជម្លោះ ឬកម្ចាត់សភាវអាក្រក់។ វាគឺជាអម្បូរសត្វល្អ តែក៏ព្រៃផ្សៃ និងមិនអាចយល់ចិត្ដបាន»។
កាលពីដើមខែវិច្ឆិកា នាគបានចេញដើរក្បួនតាមដងវិថីទីក្រុង Calais ជាផ្នែកមួយនៃមហោស្រពសិល្បៈ ដែលរមែងបញ្ជាដោយមនុស្ស ១៧ នាក់។
នាគ Dragon of Calais ពេលនេះ ស្ថិតនៅ La Cite provisoire ដែលចាប់ពីថ្ងៃទី ១៧ ខែធ្នូ កន្លងទៅ មហាជនអាចជិះលើខ្នងនាគដើរក្នុងក្រុង។ ដូច្នេះ អ្នកអាចយល់ពីអារម្មណ៍ដ៏អស្ចារ្យរបស់តារាស្រី Daenerys Targaryen ក្នុងភាពយន្ដ Game of Thrones ហើយ៕ AFP/HR
