.jpg)
នាយក្រិន និងភរិយាទី ២ កាលមានចំណងស្នេហ៍បានកូន ២ នាក់ សាងភាពផ្អែមល្ហែម។ ហ្វេសប៊ុក
ភ្នំពេញ៖ ចាប់តាំងពីបានសាងជីវិតគ្រួសារនឹងប្រពន្ធទី ២ ឈ្មោះ នាង យ៉ាយ៉ា ជាភរិយាក្រៅខាន់ស្លាបង្កើតកូនបានពីរគ្រាប់ បានប៉ុន្មានឆ្នាំមកនេះ ក៏ស្រាប់តែផ្ទុះសារបង្ហើបរឿងរង្គោះរង្គើធ្វើឲ្យ នាយ ក្រិន ក្លាយជាបុរសពោះម៉ាយលើកទី ២ និងសុខចិត្តមើលថែទាំកូនទាំង ៣ ដោយខ្លួនឯង ហើយប្រកាសដាច់អហង្ការថា មិនព្រមផ្សះផ្សាគ្នាឡើយ ទោះបីប្រពន្ធចង់វិលវិញយ៉ាងណាក៏ដោយនោះ។
មិននឹកស្មានថា ឆាកជីវិតស្នេហារបស់តារាកំប្លែងប្រុស មាឌតូចល្អិត នាយ ក្រិន ដែលត្រូវមហាជនតែងរំពឹងថា នឹងមានសុភមង្គលយូរអង្វែង បន្ទាប់ពីរូបលោកបានមករួមរស់ជាមួយនឹងប្រពន្ធទី ២ ក្រោយលែងលះប្រពន្ធដើមមកនោះ បានមកជួបរឿងប្រេះឆាសាជាថ្មីដោយភរិយាទី ២ បានលួចក្បត់ចិត្តទៅមានសាហាយថ្មី ចោលលោក និងកូនទាំង ៣ នាក់ ឲ្យរស់នៅយ៉ាងកណ្តោចកណ្តែង។
តារាកំប្លែង ទេស សុជន ហៅ នាយក្រិន បានបញ្ជាក់យ៉ាងម៉ឺងម៉ាត់ ពេលមានសំណួរថាតើនាយអាចទទួលយកបានទេ ប្រសិនបើភរិយាក្រោយនេះ ដឹងកំហុស ហើយចង់វិលមករួមរស់ជុំប្តី និងកូនវិញនោះថា៖ «ដោយសារតែដំណឹងបែកបាក់សង្គមគ្រួសារមួយនេះ បានបែកខ្ចាយគេដឹងឮស្ទើរគ្រប់ទិសទីទៅហើយ ដូច្នេះខ្ញុំគិតថា មិនអាចទទួលយកបានឡើយចំពោះករណី ដែលគាត់ចង់វិលមកវិញនោះគឺខ្ញុំសុខចិត្តស៊ូទ្រាំលំបាកគ្រប់យ៉ាងដើម្បីចិញ្ចឹមមើលថែទាំកូនទាំង ៣ តែម្នាក់ឯងចុះ និងបន្តមុខរបរហាងលក់គ្រឿងក្លែមឈ្មោះថា «ជួបគ្នានៅហាងនាយក្រិន» ដែលមានទីតាំងស្ថិតនៅលើវិថីលេខ ២០០៤ នោះដដែល។ ម្យ៉ាងវិញទៀត កាលពីមិនទាន់បែកធ្លាយជារឿងធំខ្ញុំក៏ធ្លាប់ផ្តល់នូវឱកាសឲ្យគាត់ដែរ តែគាត់មិនស្តាប់ និងមិនព្រមធ្វើទៅតាមសំណូមពរខ្ញុំឡើយ»។
នាយក្រិន ក៏មានជាសំណូមពរតូចមួយចុងក្រោយដែរ ពីមហាជនក្រោយពីអះអាងរក្សាជំហរមើលថែទាំកូនៗដោយខ្លួនឯង និងបន្តបើករបររកស៊ីមានស្រាប់ថា៖ «ខ្ញុំមិនចង់បានអ្វីពីបងប្អូនទេ គ្រាន់តែសំណូមពរជួយគាំទ្រ និងជួយជាវម្ហូបអាហារនៅហាងខ្ញុំផង ដើម្បីជួយឲ្យខ្ញុំឲ្យមានលទ្ធភាពចិញ្ចឹមកូនទាំង ៣»។
គួរបញ្ជាក់ដែរថា នាយក្រិន មានភរិយា ២ នាក់ហើយ ដោយប្រពន្ធដើមមានកូនប្រុស ១ បច្ចុប្បន្នកំពុងរស់នៅជាមួយអតីតប្រពន្ធដើម នៅខេត្តព្រះសីហនុ។ ខណៈប្រពន្ធទី ២ ចាប់ពីឆ្នាំ ២០១៣ គិតមកទល់ពេលនេះ ដោយទទួលបានកូន ៣ នាក់ ប្រុស ១ និងស្រី ២ គឺសរុបទាំងអស់នាយក្រិន មានកូន ៤ នាក់៕
