.jpg)
តារាសម្ដែងជើងចាស់ និងតារាវ័យក្មេងក្នុងខ្សែភាពយន្តរឿង ជួបស៊យ វគ្គ ២។ រូបថត យូសុះ អាប់ឌុលរ៉ាស់ហ៊ីម
ភ្នំពេញៈ ទោះបីទើបតែដាក់បង្ហាញ Trailer របស់សាច់រឿងជួបស៊យវគ្គ ២ ក្ដីក៏កុមារា រឹម សុរ៉ាហ៊ាទ្រី ហៅ អូនតួ កូនប្រុសរបស់តារាកំប្លែង និងជាតារាចម្រៀងនាយ ពាក់មី បានស្រូបយកប្រជាប្រិយភាពពីមហាជន ដោយសារភាពក្រមិចក្រមើមលាយឡំជាមួយការកំប្លែងស្ងួត និងមានទេពកោសល្យសិល្បៈពីកំណើត។
ដោយសារតែមានការគាំទ្រច្រើនចំពោះស្នាដៃនិពន្ធ និងដឹកនាំសម្តែងព្រមទាំងសម្តែងខ្លួនឯងផ្ទាល់ក្នុងរឿងជួបស៊យ វគ្គ ១ កាលពីឆ្នាំ ២០១៦ ជារឿងបែបកំប្លែង នាយ គ្រឿន បានដាក់បង្ហាញស្នាដៃទី ៥ រឿងជួបស៊យ វគ្គ ២ កាលពីថ្ងៃទី ៥ ខែមេសាកន្លងទៅនៅក្នុងបរិវេណផ្សារទំនើបអ៊ីអន ២ ដោយសង្ឃឹមថាមានការគាំទ្រច្រើនដូចវគ្គ ១ តាមរយៈតួអង្គល្បីៗ ជាពិសេសតួប្រុសវ័យក្មេងដែលត្រូវជាក្មួយបង្កើតកូនរបស់តារាកំប្លែងនាយពាក់មីដែលមានសមត្ថភាពក្នុងការសម្តែង និងលេងទឹកមុខមិនចាញ់មនុស្សពេញវ័យ។
តារាវ័យកំប្លែងក្មេង និងជាតារាសម្តែង អូនតួ ទើបតែមានអាយុ ៦ ឆ្នាំ ប៉ុន្តែបានឆ្លងកាត់ការសម្តែងជាច្រើនបែបកំប្លែង កម្សត់ សម្រក់ទឹកភ្នែក តាមរយៈរឿងកំប្លែង «អូនតួសិស្សពូកែកូរ» របស់ទូរទស្សន៍ស៊ីធីអិន និងមានស្នាដៃក្នុងការសម្តែងជាច្រើនទៀត។
ក្នុងរឿង «ជួបស៊យ» វគ្គ ២ អូនតួ មានឈ្មោះក្នុងសាច់រឿងថា «អាចង្រៃ» ដើរតួជាតួឯកប្រុសពេលនៅតូចដែលត្រូវចាកចេញពីគ្រួសារទាំងវ័យក្មេងទៅរស់នៅក្នុងវត្ត ដោយសារភាពស៊យធ្វើឲ្យអ្នកដទៃដែលនៅជិតខ្លួនជួបបញ្ហា និងមានគ្រោះថ្នាក់លើកលែងតែឪពុកម្តាយនៅក្នុងសាច់រឿង (នាយគ្រឿន និងកញ្ញា គាត សុវណ្ណាឡាង) ខ្លួនដោយភាពស៊យបង្កប់ភាពកំប្លែងសើចបិទមាត់មិនជិតតាមរយៈពាក្យសម្តី និងកាយវិការក្នុងការសម្តែងបែបក្មេងមិនដឹងអី។
នាយគ្រឿន ដែលជាតារាកំប្លែងបានបន្ថែមអាជីពជាតារាចម្រៀង និងផលិតករភាពយន្តបានបរិយាយពីសាច់រឿងប្រាប់ ភ្នំពេញ ប៉ុស្តិ៍ ថា៖ «រឿងនេះដែរគឺជាស្នាដៃទី ៥ របស់ខ្ញុំដែលបានដឹកនាំសម្តែង ហើយវាមានភាពខុសប្លែកពីរឿងមុនដោយសារតែរឿងនេះមានតួថ្មីៗច្រើន ប៉ុន្តែពួកគាត់មានសមត្ថភាពក្នុងការសម្តែងខ្ពស់ ហើយវាកាន់តែមានភាពកំប្លែងជាងមុន (ជួបស៊យវគ្គ ១) និងខុសគ្នាត្រង់វគ្គ ២ នេះស៊យជាង ឲ្យតែអ្នកណាជួប «អាចង្រៃ» ដឹងតែមានគ្រោះថ្នាក់ បើមិនអ៊ីចឹងទេក៏រលាយធនធានតែម្តង»។
បន្ទាប់ពីរឿង ជួបស៊យវគ្គ ២ នេះ លោក ចែម សារឿន ហៅ នាយគ្រឿន ក៏បានបង្ហើបថា នឹងគ្រោងបញ្ចេញកុនថ្មី រសជាតិបែបថ្មី មានលក្ខណៈបែបកម្សត់វិញម្តង ដើម្បីឲ្យអ្នកទស្សនាបានប្តូរអារម្មណ៍ថ្មី និងមិនធុញក្នុងការទស្សនាជាស្នាដៃនិពន្ធរបស់លោក។
រឿង «ជួបស៊យ» វគ្គ ២ នឹងត្រូវចាក់បញ្ចាំងចាប់ពីថ្ងៃទី ១១ ខែមេសាគ្រប់រោងភាពយន្ត Legend Cinemas៕
