The Phnom Penh Post Search

Search form

Logo of Phnom Penh Post newspaper Phnom Penh Post - នាយ ចឺម ផ្តាច់​ជំនាញ​កំប្លែង ប្រាថ្នា​ងារ​កំពូល​តារា​ចម្រៀង

នាយ ចឺម ផ្តាច់​ជំនាញ​កំប្លែង ប្រាថ្នា​ងារ​កំពូល​តារា​ចម្រៀង

Content image - Phnom Penh Post
តារាចម្រៀង​លាចាក​សិល្បៈ​កំប្លែង នាយ​ ចឺម​ ព្រមទាំង​តារា​ចម្រៀង​ ខេមរៈ សិរីមន្ត ដែល​ចាក​ទ្រនំ​សាន់ដេ ទៅ​ផលិតកម្ម​ហង្សមាស​។ ហុង មិនា វុទ្ធី

នាយ ចឺម ផ្តាច់​ជំនាញ​កំប្លែង ប្រាថ្នា​ងារ​កំពូល​តារា​ចម្រៀង

ភ្នំពេញ: ការ​បោះបង់​អាជីព​កំប្លែង ជាទី​ដែល​ធ្វើ​ឲ្យ​គេ​ស្គាល់ នាយ​ចឺម រហូត​មក​ដល់​បច្ចុប្បន្ន​នេះ ក៏​រង​នូវ​ពាក្យ​រន្ទឺ​ថា នាយ​ចឺម ទៅ​ពង្រឹង​សមត្ថភាព​តែ​ខាង​ច្រៀង ដើម្បី​ឲ្យ​ខ្លួន​កាន់​តែ​ល្បី និង​ជាការ​គ្រប់គ្រង​តំណែង​នៅ​ផលិតកម្ម​សាន់ដេ ខណៈ​កំពូល​តារា​ចម្រៀង ខេមរៈ សិរីមន្ដ ដើរ​ចូល​ផលិតកម្ម​ហង្សមាស។

ខណៈនោះ​ក៏មាន​ចម្ងល់​ជាច្រើន​ផ្ទុះ​ថា តើ​នាយ​ចឺម ពិត​ជា​មាន​សមត្ថភាព​អាច​កាន់​កាប់​តំណែង ខេមរៈ សិរីមន្ដ បាន​ដែរ​ឬទេ​នៅ​ពេល​នេះ បាន​ជា​រូបគេ​លែង​អាល័យ​ជាមួយ​អាជីព​កំប្លែង​ដែល​គេ​ខំតស៊ូ​តាំង​ពី​តូច​នោះ?

រំលេច​ពីបទ​ពិសោធ​ចម្រៀង​របស់​នាយ​ចឺម ក៏​នៅ​មាន​កម្រិត​ក្មេងខ្ចី ពោល​គឺ​ដំណើរ​ចូល​នៅ​ក្នុង​ផលិតកម្ម​សាន់ដេ ដែល​ជាទី​ចាប់ផ្តើម​អាជីព​ចម្រៀង​នេះ ទើប​បាន​ចេញ​បទ​ចម្រៀង​ចំនួន ១០ បទ ក្នុង​នោះ​មាន​បទ «ពុកអើយ​ម៉ែអើយ នាង​ការ​ចោល​ខ្ញុំ​ហើយ», «រាត្រី​ឯកា», «អារហាម», «លួច​ស្រឡាញ់​សុខ ពិសី», «នឹក​អូន​ឡើង​សរសៃ​ប្រសាទ», «ក្បត់​បង​ទៅ បង​អង្វរ», «អា​ប្ដី​ប្រមឹក», និង​បទ «នរក ១៨ ជាន់» ជាដើម។

បើទោះជា​បទពិសោធ​ចម្រៀង​នៅ​ក្មេងខ្ចី​ក៏ដោយ តារា​ចម្រៀង​ល្បី​ដោយ​ងារ​កំប្លែង​ថា នាយ ចឺមៗ ដែល​មាន​ឈ្មោះ ដើម សុខ មេសា អះអាង​ដោយ​ភាព​ជឿជាក់​លើ​សមត្ថភាព​បទ​ចម្រៀង​របស់​ខ្លួន​ថា៖ «ខ្ញុំ​គិតថា បើ​ខ្ញុំ​នៅ​តែ​មាន​ការ​គាំទ្រ​ដូច​ពេល​នេះ​តទៅ​ទៀត ចំពោះ​ការងារ​មក​ចាប់យក​អាជីព​ចម្រៀង​តែមួយ​មុខ​របស់​ខ្ញុំ ក៏​នឹង​កើន​ទ្វេ​អាច​ថា​ត្រឹម​តែ ១ ឆ្នាំ ខ្ញុំ​នឹង​តាម​ទាន់​ស្មើគ្នា​ជាមួយ​នឹង​រៀម​ច្បង​មុនៗ​នៅ​ក្នុង​ទ្រនំ​សាន់ដេ​នេះ»។

នាយ​ចឺម ក៏​លើក​ឡើង​ថា៖ «រាល់ថ្ងៃ​ពេល​ខ្ញុំ​ចុះ​ទៅ​ច្រៀង​តាម​ខេត្ត គឺ​មាន​បងប្អូន​គាំទ្រ​ខ្ញុំ​ច្រើន​​ណាស់ គឺ​ខ្ញុំ​ស្ទើរ​តែ​មិន​ជឿ​ខ្លួនឯង​ផង ព្រោះ​មើល​ទៅ ការ​គាំទ្រ​នោះ ប្រៀប​ដូច​ខ្ញុំ​ជា Super Star ម្នាក់​អ៊ីចឹង»។

នាយ ចឺម ក៏បាន​បញ្ជាក់​ថា៖ «អ៊ីចឹង​បទ​ចម្រៀង​ខ្ញុំ​ចេញ​មក មាន​ការ​គាំទ្រ​ច្រើន​តែម្ដង ហើយ​ខ្ញុំ​សប្បាយចិត្ត​ណាស់​ដែល​ឆ្នាំ​នេះ គឺ​ទទួល​បាន​ការ​ច្រៀង Concert ធំៗ ទាក់ទង​មក​ច្រើន​ណាស់»។

ការអះអាង​របស់​នាយ ចឺម នៅ​ពេល​នេះ គឺ​លាង​ជម្រះ​មន្ទិល​សង្ស័យ​របស់​ទស្សនិកជន​កន្លង​មក ដែល​នៅតែ​ស្រពេច​ស្រពិល​ថា មិន​ដឹង​ជា​តារា​រូប​ណា​ម្នាក់​នៅ​សាន់​ដេ ក្នុង​ចំណោម​អ្នក​ចម្រៀង​ប្រុស ៣ រូប នាំមុខ​គេ​របស់​សាន់​ដេ មាន ឆាយ វីរៈយុទ្ធ, ខាន់ ជេមស៍ និង​នាយ ចឺម ដែល​នឹង​ទៅ​គ្រង​តំណែង ខេមរៈ សិរីមន្ដ ដែល​នៅ​ទំនេរ​នោះ។

ជម្រះ​មន្ទិល​នេះ នាយ ចឺម បាន​បញ្ជាក់​ច្បាស់ៗ​ថា៖ «រូបគេ​ត្រូវការ​ពេលវេលា​តែ​ត្រឹម ១ ឆ្នាំ​ទៀត គឺ​គ្រប់គ្រាន់​ល្មម​ទៅ​តាម​ស្មើ​កំណត់ត្រា​របស់​ខេមរៈ សិរីមន្ដ ដែរ ព្រោះ​ពេល​នេះ ខ្ញុំ​មិន​មែន​នៅ​ជា​អ្នក​កំប្លែង​ទៀត​ឡើយ ពោល​គឺ​ខ្ញុំ​ជា​តារា​ចម្រៀង​របស់​សាន់ដេ ហើយ​ខ្ញុំ​ក៏មាន​ពេលវេលា​គ្រប់គ្រាន់​ដែល​មក​គិតតែ​អាជីព​ចម្រៀង​មួយ​មុខ ដើម្បី​ពង្រឹង​សមត្ថភាព​ចម្រៀង​និង​សម្រិត​សម្រាំង​បទ​ចម្រៀង ដើម្បី​ទាក់ទាញ​ការគាំទ្រ​ច្រើន ក្នុង​មហិច្ឆតា​ធ្វើជា​តារា​ចម្រៀង​ល្បីល្បាញ​ខ្លាំង​នៅ​ឆ្នាំ ២០១៨»៕

អត្ថបទគួរចាប់អារម្មណ៍