The Phnom Penh Post Search

Search form

នាយ ចឺម សម្រេច​ឈប់​ពី​ក្រុម​កំប្លែង​ងាក​ទៅ​ពង្រឹង​អាជីព​ជា​តារា​ចម្រៀង​នៅ​សាន់ដេ

Content image - Phnom Penh Post
នាយ ចឺម តារា​កំប្លែង​ល្បី​វ័យ​ក្មេង​។ វុទ្ធី

នាយ ចឺម សម្រេច​ឈប់​ពី​ក្រុម​កំប្លែង​ងាក​ទៅ​ពង្រឹង​អាជីព​ជា​តារា​ចម្រៀង​នៅ​សាន់ដេ

ភ្នំពេញៈ ក្រោយ​ពី​អតីត​ជា​តារា​ចម្រៀង​ប្រុស​កំពូល​ប្រចាំ​ផលិតកម្ម​សាន់ដេ លោក ខេមរៈ សិរីមន្ត បាន​ដើរ​ចេញ​ទៅ​រក​ទ្រនំ​ថ្មី​ផលិតកម្ម​ថ្មី​ហង្សមាស​មក​នោះ ឃើញ​ថា រាសី និង​ឱកាស​របស់​តារា​ចម្រៀង​រលក​ក្រោយ​ដែល​ផុសភាព​ល្បី​ពី​វិស័យ​កំប្លែង​នាយ ចឺម បាន​ហក់​ឡើង​ខ្លាំង​នៅ​លើ​ទ្រនំ​សាន់ដេ តែ​ក៏​ល្បី​ដែរ​ថា បាន​លា​ឈប់​ពី​ក្រុម​កំប្លែង​ស៊ីធីអិន​ហើយ!

តារា​កំប្លែង​មាន​ដុង​តាំង​ពី​ក្មេង​វ័យ ២២ ឆ្នាំ ដែល​មាន​ស្រុក​កំណើត​នៅ​ឯ​ខេត្ត​កំពង់ស្ពឺ នាយ ចឺម គឺជា​ក្មួយប្រុស​បង្កើត​ជា​តារា​កំប្លែង​ដ៏ល្បី​នាយ​ក្រូច​នោះ ប្រាប់​ភ្នំពេញ​ប៉ុស្តិ៍ យ៉ាង​ច្បាស់​ក្រឡែត​ថា៖ «ជាការ​ពិត​មែន​ហើយ​បង គឺ​ថា រូបខ្ញុំ​ពិត​ជា​បាន​សម្រេច​ចិត្ត​ឈប់ពី​លេង​កំប្លែង​នៃ​ក្រុម​កំប្លែង​ប្រចាំ​ទូរទស្សន៍​ស៊ីធីអិន និង​ស៊ីអិនស៊ី នោះ​មែន!»។

នាយ ចឺម បន្ត​ប្រាប់​ពី​មូលហេតុ​នៃការ​ឈប់​ពី​ក្រុម​កំប្លែង​នោះ​ថា៖ «បន្ទាប់​ពី​មាន​ការ​ពិភាក្សា​ជាមួយ​នឹង​អ្នកមាន​គុណ ដែល​បាន​ជួយ​លើក​ស្ទួយ​ខ្ញុំ​តាំង​ពី​ក្មេង​ក្នុងការ​ចូល​លេង​ក្នុង​ក្រុម​កំប្លែង​គឺ​លោក​តា វិចទ័រ នាពេល​ថ្មីៗ​នេះ​មក ខ្ញុំ​ក៏​សម្រេច​ចិត្ត​ថា​ឈប់​លេង​កំប្លែង​តែម្តង។ នៅ​ខណៈពេល​ពិភាក្សា​ជាមួយ​លោកតា វិចទ័រ គាត់​ក៏់បាន​លើក​ឡើង និង​ផ្តល់​ជា​ដំបូន្មាន​ដល់​ខ្ញុំ​ថា ប្រសិន​បើ​ពូជា​រូប​ក្មួយ​វិញ​នោះ នៅ​ខណៈ​ពេល​នេះ អាជីព​ជា​តារា​ចម្រៀង​កំពុង​តែ​ល្បី​ដូច្នេះ​គឺ ពូ​ប្រាកដ​ជា​ឈប់​លេង​កំប្លែង​ហើយ​ទៅ​ផ្តោត​លើ​អាជីព​ច្រៀង​វិញ​ជា​មិន​ខាន​ឡើយ។ គាត់​ក៏បាន​លើក​ហេតុផល​ផ្សេង​ទៀត​ដែរ​ថា ក្មួយ​នៅ​ក្មេង​អ៊ីចឹង ឱកាស​ចាប់​យក​អាជីព​ជា​តារា​ចម្រៀង​គឺ​ពិត​មាន​ទីផ្សារ​ល្អ​ខ្លាំង​សម្រាប់​ក្មួយ​ដែរ​នាពេល​ក្រោយ។ ម្យ៉ាងទៀត ក្រោយ​ពី​ពេល​ដែល​ខ្ញុំ​ក្លាយជា​តារា​ចម្រៀង​ទទួល​បាន​ការ​គាំទ្រ​ពី​បងប្អូន​ប្រិយមិត្ត​ច្រើន​មក​ក៏បាន​ធ្វើ​ឲ្យ​ខ្លួនឯង​មាន​ការ​គិត​ប្រៀប​ធៀប​មួយ​រវាង​ការ​បង្ហាញ​ខ្លួន​នៅ​ឆាក ២ ខុសគ្នា​គឺ​ឆាក​ចម្រៀង និង​ឆាក​កំប្លែង បាន​ធ្វើឲ្យ​ខ្ញុំ​កើត​ចេញ​នូវ​អារម្មណ៍​មួយ​ថ្មី​ផងដែរ​គឺ​អារម្មណ៍​អៀន​លើ​រូប​ខ្លួនឯង។ជាពិសេស​នឹក​ឃើញ​ពី​របៀប​ស្លៀកពាក់​នៅ​ពេល​លេង​កំប្លែង​នឹង​ឃើញ​រូបភាព​ខ្លួន​នៅ​លើ​ឆាក​ចម្រៀង ឬ​នៅ​ពេល​ច្រៀង​ក៏នឹក​ឃើញ​រូបភាព​នៅ​លើ​ឆាក​កំប្លែង​នោះ​ឯង»។

ទោះជា​យ៉ាងណា ការ​សម្រេច​ចិត្ត​លា​ឈប់​ពី​ក្រុម​កំប្លែង​នេះ មិន​មែន​មក​ពី​មូលហេតុ​នៃ​ភាពខុស​ឆ្គង​ណាមួយ​របស់​នាយ ចឺម នោះ​ឡើយ។ ឆ្លៀត​ឱកាស​នេះ នាយ ចឺម ដែល​មាន​ឈ្មោះ​ពិត​ថា សុខ មេសា តារា​ចម្រៀង​ថ្មី​របស់​សាន់ដេ ដែល​កំពុង​តែ​ល្បី និង​ស្រូប​យក​បាន​នូវ​ប្រជាប្រិយភាព​ពី​អ្នកគាំទ្រ​ដែល​ជា​យុវវ័យ​ខ្លាំង​នា​ពេល​នេះ ដោយសារ​មាន​តម្លៃ​ខ្លួន​ច្រៀង​នៅ​ក្នុង​កម្មវិធី​ប្រគំ​តន្ត្រី​តាម​ខេត្ត​នានា​តែម្តង ដោយ​មាន​ចំនួន​ចន្លោះ ១០០០ ដុល្លារ ទៅ​ដល់ ១ ៥០០ ដុល្លារ នោះ ក៏សុំ​ថ្លែង​អំណរគុណ​ទៅ​កាន់​អ្នក​គ្រប់គ្រង​ក្រុម​កំប្លែង​ជា​ឆ្នាំងបាយ​ចាស់ និង​សមាជិក​ក្រុម​កំប្លែង​ផងដែរ​ថា៖ «ខ្ញុំ​មាន​ថ្ងៃ​នេះ ក៏​ដោយសារ​តែ​មាន​ការ​ផ្តល់​ឱកាស​ពី​លោកតា វិចទ័រ ដែល​បាន​ទទួល​យក និង​បណ្តុះ​បណ្តាល​ខ្ញុំ​ឲ្យ​ចូលរួម​ក្នុង​ក្រុម​កំប្លែង​តាំង​ពី​តូច​មក​ម្ល៉េះ។ ចំណែក​សមាជិក​ក្រុម​វិញ ជា​ពិសេស​នោះ ពូ និង​មីង របស់​ខ្ញុំ​គឺ​ពូ​ក្រូច និង​មីង អ៊ីត តែម្តង ដែល​បាន​មើល​ថែទាំ​ខ្ញុំ​ដូច​ឪពុក​ម្តាយ​បង្កើត» ៕

អត្ថបទគួរចាប់អារម្មណ៍