ក្រុងអាត្លង់តា៖ បវរកញ្ញាអាហ្វ្រិកខាងត្បូង បានគ្រងមកុដរាជិនីសម្រស់ចក្កវាឡ ឬ Miss Universe កាលពីថ្ងៃអាទិត្យ ក្នុងទីក្រុងអាត្លង់តា ក្រោយពីព្រឹត្ដិការណ៍ដ៏ធំគគ្រឹកគគ្រេងដំណើរការពោរពេញទៅដោយពាក្យពេចន៍ និងសារដ៏រឹងមាំស្ដីពីតម្លៃស្ដ្រី។
កញ្ញា ហ្សូហ្ស៊ីប៊ីនី ធុនហ្ស៊ី អាយុ ២៦ ឆ្នាំ បានបញ្ចប់ដោយនាំមុខកញ្ញាឯក ព័រតូរីកូ និងម៉ិកស៊ិក ក្នុងព្រឹត្ដិការណ៍បញ្ចាំងតាមកញ្ចក់ទូរទស្សន៍ រៀបចំឡើងដោយតារាកំប្លែងអាមេរិក ដែលប្ដូរមកជាពិធីករទូរទស្សន៍ Steve Harvey។
ពិធីករ និងពិធីការិនីទូរទស្សន៍ Vanessa Lachey និង Olivia Culpo ស្ថិតនៅក្រោយឆាក ធ្វើការសម្ភាសបេក្ខនារី ៧ នាក់ ដែលមានការតាំងចិត្ដយកជ័យជម្នះ។
កញ្ញា ធុនហ្ស៊ី បានទទួលការគាំទ្រជាច្រើនមុនពេលបង្ហើយពាក្យពេចន៍ ដែលនាងបាននិយាយអំពីបំណងចង់ផ្ដល់តម្លៃដល់ស្ដ្រីប្រកបដោយជំនឿចិត្ដមុតមាំ។
រាជិនីសម្រស់ចក្កវាឡបាននិយាយថា៖ «ខ្ញុំធំដឹងក្ដីមកក្នុងពិភព ដែលស្ដ្រីដូចជារូបខ្ញុំ ដោយមានស្បែក និងសក់ដូចខ្ញុំនេះ មិនត្រូវបានចាត់ទុកជាសម្បុរមានឆោមលោមពណ៌ស្រស់ស្អាតនោះទេ»។
កញ្ញាបាននិយាយអមដោយសំឡេងសាទរកងរំពងថា៖ «ខ្ញុំគិតថា វាដល់ពេលត្រូវបញ្ឈប់ទស្សនៈបែបនេះហើយ»។
ធុនហ្ស៊ី បានឈ្នះកញ្ញាឯកជាង ៩០ នាក់ ទូទាំងពិភពលោក ក្នុងការប្រកួតបវរកញ្ញាចក្កវាឡទី ៦៨ ដែលរៀបចំឡើងនៅស្ទូឌីយោ Tyler Perry Studios ក្រុងអាត្លង់តា សហរដ្ឋអាមេរិក។
បេក្ខនារីមានប្រជាប្រិយភាព ២ រូប មុនពេលប្រកួត គឺកញ្ញាឯកថៃ ផាវីនស៊ូដា សែតាន-ដ្រូវីន និងកញ្ញាឯកហ្វីលីពីន ហ្គាហ្ស៊ីនី ហ្គាណាដូស អត់ជាប់ដល់វគ្គជម្រុះ ១០ នាក់ ចុងក្រោយឡើយ។
បវរកញ្ញាអាហ្រ្វិកខាងត្បូង កញ្ញា ធុនហ្ស៊ី ត្រូវបានបំពាក់មកុដដោយបវរកញ្ញាហ្វីលីពីន ខាទ្រីយ៉ូណា ហ្គាយ ម្ចាស់មកុដចក្កវាឡឆ្នាំ ២០១៨។
ថ្វីដ្បិតតែដល់ឆ្លងចូលវគ្គផ្ដាច់ព្រ័ត្រ កញ្ញាឯកមីយ៉ាន់ម៉ា Swe Zin Htet បានបង្កការភ្ញាក់ផ្អើលកាលពីសប្ដាហ៍មុន ពេលនាងចេញមុខមកបកស្រាយថា រូបនាងជាបេក្ខនារីភេទទី ៣។
កញ្ញា Swe Zin Htet បានប្រាប់ទស្សនាវដ្ដី People ដោយប្រើពាក្យ «ភូមា» ជាឈ្មោះប្រវត្តិសាស្ត្រប្រទេសខ្លួនថា៖ «បើខ្ញុំនិយាយថា ខ្ញុំស្រឡាញ់ស្រីដូចគ្នា វាច្បាស់ជាប៉ះពាល់ដល់សហគមន៍ LGBTQ ក្នុងប្រទេស ភូមា»។
ស្នេហាភេទដូចគ្នាគឺ ជាទង្វើខុសច្បាប់ក្នុងប្រទេសអាស៊ីអាគ្នេយ៍មួយនេះ និងអាចទទួលទោសជាប់គុករហូតដល់អស់មួយជីវិត។
ឆ្នាំនេះ បវរកញ្ញាចក្កវាឡបានបន្ដរៀបចំការប្រកួតឈុតហែលទឹក ទោះជាមុននោះ វគ្គនេះរងការរិះគន់ថាបំពានដល់បេក្ខនារី។ យ៉ាងណាផ្នែកខ្លះនៃការប្រកួតមិនត្រូវបានចាក់បញ្ចាំងតាមកញ្ចក់ទូរទស្សន៍ក៏ដោយ៕ AFP/HR