.jpg)
នារីម៉ារ៉ុកខ្លះស្លៀកខោអាវធម្មតា ទុកឈុតហែលទឹកស្លៀកនៅបរទេស។ រូបថត AFP
ក្រុងរ៉ាបា: ស្ដ្រីម៉ារ៉ុកម្នាក់ដែលចង់រួចផុតពីភាពអាម៉ាសនៅតំបន់ឆ្នេរកំពុងនាំគ្នាសម្រុកទៅលេងអាងហែលទឹកសាធារណៈថ្មីមួយនៅទីក្រុងរ៉ាបា តែស្ដ្រីជាច្រើនអត់ហ៊ានគ្រងឈុតហែលទឹកដោយខ្លាចក្រសែភ្នែកក្នុងន័យមាក់ងាយ។
អ្នកស្រី សាណេ អាយុ ៣៦ ឆ្នាំ ដែលធ្វើដំណើរ ១៥០ គីឡូម៉ែត្រ ទៅលេងអាងទឹក «Grande Piscine» ដែលបើកសម្ពោធកាលពីថ្ងៃទី ៤ ខែ កក្កដា បាននិយាយថា៖ «ទីនេះ គ្មានការបៀតបៀន ឬមាក់ងាយអ្វីឡើយ។ ការងូតទឹកសមុទ្រ ធ្វើឲ្យស្ត្រីម៉ារ៉ុកឆ្អែតឆ្អន់នឹងការមើលដៀមដាមហើយ»។
អ្នកស្រីបន្ដថា៖ «ខ្ញុំត្រូវបានគេបៀតបៀន ដោយសារតែខ្ញុំពាក់ឈុតងូតទឹក។ សំណាងហើយស្វាមីរបស់ខ្ញុំក៏នៅទីនោះដែរ»។
កញ្ញា អាម៉ាល់ ជាសិស្សអាយុ ១៨ ឆ្នាំ ដែលមកលេងទឹកជាមួយមិត្ដភក្ដិស្រីៗ បាននិយាយថា៖ «នៅតាមឆ្នេរកាន់តែយ៉ាប់យ៊ឺនខ្លាំងហើយ»។
នារីស្លៀកឈុតហែលទឹកប្រទេសម៉ារ៉ុក ប្រឈមនឹងក្រសែភ្នែកបុរសៗ។ រូបថត AFP
មនុស្សរាប់ពាន់នាក់នាំគ្នាមកលេងអាងហែលទឹក ដែលដាប់ឆ្លាក់ពីថ្មដុសនៅជាយក្រុងម៉ារ៉ុក ជាផ្នែកមួយនៃគម្រោងអភិវឌ្ឍន៍ដ៏មហិមាដោយមានឈ្មោះថា «រ៉ាបា ទីក្រុងភ្លើងពណ៌»។
យោងតាមមន្ដ្រីគម្រោងបានឲ្យដឹងថា បរិវេណទឹក ១៧ ០០០ ម៉ែត្រការ៉េ បានទទួលភ្ញៀវមធ្យមក្នុងកំណត់ត្រា ៥ ០០០ នាក់មួយថ្ងៃ តាំងពីបើកដំណើរការ។ សំបុត្រមួយមានតម្លៃ ១០ ដឺហាម (១ ដុល្លារ) ជាតម្លៃសមរម្យសូម្បីតែគ្រួសារចំណូលទាបក៏អាចមានលទ្ធភាពមកលេងបាន។
ក្នុងទស្សនីយភាពជក់ចិត្ដកម្រៗនៅប្រទេស ម៉ារ៉ុក ទាំងបុរស និងនារីក្មេងៗហែលទឹក និងលេងកម្សាន្ដក្នុងទឹក ខណៈគ្រឿងបំពងសំឡេងបន្លឺបទចម្រៀងប៉ុបល្បីៗបែបយុវវ័យ។
បញ្ហាចោទត្រង់សន្ដិសុខល្អដែលទាក់ទាញចិត្ដនារីៗ ដោយឆ្មាំសន្ដិសុខប្រមាណ ៦០ នាក់ និងប៉ូលិសល្បាតក្នុងឯកសណ្ឋានស៊ីវិលធានារក្សាសុជីវធម៌ល្អ។ ប៉ុន្ដែទោះមានការលួចដៀងកន្ទុយភ្នែកតិចៗ នារីៗក៏មិនមានអារម្មណ៍ស្រណុកចិត្ដឡើយ។
ជាក់ស្ដែងអ្នកស្រី សាណេ សុខចិត្តស្លៀកខោខ្លី និងអាវរុំជិតល្វែងលើ ដើម្បីចៀសវាងការបៀតបៀន។
អ្នកស្រីនិយាយថា៖ «ឈុតហែល គឺសម្រាប់តែវិស្សមកាលក្រៅប្រទេស ទេទើបស្លៀកបាន»៕ AFP/HR
