ភ្នំពេញ៖ ជានិស្សិតចិនចាប់អារម្មណ៍រៀនអក្សរសាស្ត្រខ្មែរ ស្រឡាញ់ប្រពៃណីវប្បធម៌ខ្មែរ ចូលចិត្តម្ហូបខ្មែរ និងចង់ចេះភាសាខ្មែរ Wen Sheng-yuan ដែលត្រូវបានគេស្គាល់ថា សុភក្ត្រ បានមករៀននៅប្រទេសកម្ពុជា កាលពីឆ្នាំ ២០១៩ ខែមីនា ក្នុងនាមជានិស្សិតទូទៅនៃកម្មវិធីផ្លាស់ប្ដូរបទពិសោធសិក្សាពីគ្រឹះស្ថានអប់រំនៅប្រទេសចិន។
និស្សិតរូបសង្ហា សុភក្ត្រ មិននឹកស្មានថា ខ្លួនអាចមកដល់ចំណុច ដែលមានបងប្អូនខ្មែរស្គាល់រហូតដល់មានអ្នកគាំទ្រជាច្រើនដូច្នេះឡើយ។
ជាមួយរូបសម្បត្តិអំណោយផលពីធម្មជាតិ នៅពេលទំនេរក្រៅម៉ោងសិក្សា សុភក្ត្រ ក៏ដូចជាបងស្រីរបស់លោកដែរ គឺសុទ្ធតែមានការងារថតម៉ូដែលបន្ថែម។
មុនពេលមកដល់ទឹកដីកម្ពុជា សុភក្ត្រ ជានិស្សិតម្នាក់ដែលរៀននៅសាកលវិទ្យាល័យភាសាបរទេសហ្គ័ងស៊ី (Guangxi University of Foreign Language) ជាទីដែលលោកទទួលបានឈ្មោះ សុភក្ត្រ ពីគ្រូបង្រៀនភាសាខ្មែរនៅទីនោះ។
ជាកូនទី២ ក្នុងចំណោមបងប្អូន ៣ នាក់ សុភក្ត្រ បានរំឭកប្រាប់ពីបំណងដែលនាំឱ្យលោកជ្រើសរើសការរៀនភាសាខ្មែរប្រាប់ ភ្នំពេញ ប៉ុស្តិ៍ ថា៖ «ខ្ញុំចូលចិត្តរៀនភាសាបរទេស។ នៅពេលសម្រេចចិត្តជ្រើសរើសភាសារៀន ខ្ញុំឃើញភាសាផ្សេងទៀតមានអ្នករៀនច្រើន ហើយភាសាខ្មែរមិនសូវមានអ្នករៀនទេ»។
លោកបានឱ្យដឹងថា ការជ្រើសរើសរៀនខ្មែរ គឺជាអ្វីដែលលោកមានមោទនភាពបំផុត ព្រោះក្នុងចំណោមនិស្សិត ៨ លាននាក់ សុភក្ត្រ ស្ថិតក្នុងចំណោម ២០០ នាក់ ដែលបានជ្រើសរើសយកការរៀនភាសាខ្មែរ។
តារាម៉ូដែលក្រៅម៉ោងសិក្សារូបនេះបានបន្តថា៖ «ខ្ញុំគិតថា បើខ្ញុំចេះខ្មែរទៅធ្វើការនៅខ្មែរ ខ្ញុំនឹងមានឱកាសការងារច្រើន។ កាលនោះគិតបានត្រឹមតែថា ចង់រៀនឱ្យចេះ មិនគិតថាបានមកប្រឡូកក្នុងសិល្បៈអីនៅប្រទេសកម្ពុជា ទេ»។
មកកម្ពុជាដំបូង យុវជនវ័យ ២២ ឆ្នាំរូបនេះបានប្រាប់ពីការភ្ញាក់ផ្អើលនឹងការប្រើប្រាស់ភាសាខ្មែរថា៖ «ថ្វីដ្បិតថាបានរៀនភាសាខ្មែរនៅចិនក្នុងឆ្នាំទី១ និងទី២ ដែរ ប៉ុន្តែឆ្នាំទី៣ ដែលមករៀននៅស្រុកខ្មែរតែម្ដង ខ្ញុំបែរជាឃើញថា ការនិយាយ និងការសរសេរភាសាខ្មែរខុសគ្នាច្រើនណាស់»។
សុភក្ត្រ បានបន្តទាំងអស់សំណើចថា៖ «មានពេលមួយនោះ ខ្ញុំទៅទិញម្ហូប គេប្រាប់ថា អស់ មួយពាន់ប្រាំ ខ្ញុំឆ្ងល់មែនទែន ខ្ញុំអត់ដឹងថា ប៉ុន្មាន? ពេលខ្ញុំទៅសួរមិត្តភក្តិខ្មែរខ្ញុំ ទើបខ្ញុំដឹងថា មួយពាន់ប្រាំរយ»។
រំឭកមកដល់ចំណុចនេះ សុភក្ត្រ រៀបរាប់ពីវេលាមួយនៅក្នុងខែមេសា ឆ្នាំមុនមានអ្នកគាំទ្រម្នាក់បានយករូបលោកក្នុងឈុតប្រពៃណីខ្មែរពីបណ្ដាញ Weibo ទៅបង្ហោះក្នុងបណ្ដាញសង្គមហ្វេសប៊ុក រហូតដល់មានការចែករំលែក និងបង្ហោះតៗគ្នាធ្លាយដល់បណ្ដាញវីដេអូខ្លី TikTok។
ដោយលោកជាមនុស្សដែលចូលចិត្តចង់ដឹងចង់ចេះ ពេលនេះ សុភក្ត្រ អាចយល់ និងនិយាយភាសាខ្មែរបានយ៉ាងល្អ ដោយលោកបានបញ្ជាក់ថា នេះក៏ព្រោះតែគាត់តែងតែសួរនាំ និងព្យាយាមស្តាប់គេនិយាយច្រើន។
សុភក្ត្រ ផ្ទាល់មិនច្បាស់ថា ហេតុអ្វីបានជាមានបងប្អូនខ្មែរចូលចិត្តលោកច្រើនទេ តែលោកគិតថា ដោយសារមិនមានជនជាតិចិនច្រើនចេះនិយាយភាសាខ្មែរ។ ម្យ៉ាង សុភក្ត្រ ស្រឡាញ់វប្បធម៌ខ្មែរ ជាពិសេសគឺរបាំ និងភាពរាក់ទាក់របស់ប្រជាជនខ្មែរ ដែលនាំឱ្យលោកមានថ្ងៃនេះ។
រយៈពេល ១ ឆ្នាំពេញ សុភក្ត្រ បានបង្កើតអនុស្សាវរីយ៍ជាមួយមិត្តភក្តិ និងអ្នកគាំទ្រជាច្រើន។ លោកត្រូវបានគេអញ្ជើញចូលរួមកម្មវិធីនានាជាមួយតារាល្បីនៅកម្ពុជាចេញតាមកញ្ចក់ទូរទស្សន៍ ថតពាណិជ្ជកម្មផ្សាយផលិតផលនានា តាំងពីស្មាតហ្វូន រហូតដល់សាប៊ូកក់សក់។
ក្រោយពីបញ្ចប់ការសិក្សារយៈពេល ១ ឆ្នាំ សុភក្ត្របានត្រឡប់ទៅស្រុកចិនវិញកាលពីខែតុលា ឆ្នាំមុន ដើម្បីបន្តការសិក្សាឆ្នាំទី៤។
សុភក្ត្រ បានឱ្យដឹងថា៖ «ពេលនេះខ្ញុំរវល់ច្រើនក្នុងការសរសេរសារណាឱ្យសាលា តែបន្ទាប់ពីបញ្ចប់ការសិក្សាខ្ញុំចង់មកបន្តអនុបណ្ឌិតនៅស្រុកខ្មែរ ព្រោះក្ដីសុបិនរបស់ខ្ញុំ ខ្ញុំចង់ធ្វើជាគ្រូអក្សរសាស្ត្រខ្មែរនៅស្រុកចិន ហើយបើមានឱកាសបងប្អូនខ្មែរនៅតែគាំទ្រ ខ្ញុំក៏ចង់ធ្វើជាសិល្បករដែរ»។
ទៅដល់មាតុភូមិកំណើតវិញ រឿងដែល សុភក្ត្រ រីករាយបំផុតនោះ គឺសាលារៀនរបស់លោកមានមោទនភាព និងថែមទាំងចាត់ទុករូបលោកជាគំរូដល់សិស្សប្អូនក្រោយ។
រឿងដែលចងចាំបំផុតពីកម្ពុជានោះ គឺអ្នកគាំទ្រ ហើយ សុភក្ត្រ ក៏សូមផ្ដាំផ្ញើផងដែរថា៖ «ចង់ប្រាប់ហ្វេនៗខ្ញុំថា ខ្ញុំនឹងត្រឡប់មកវិញនៅពេលឆាប់ៗនេះ កុំភ្លេចរង់ចាំខ្ញុំផង។ ខ្ញុំនឹងខិតខំថតវីដេអូឱ្យកាន់តែប្រសើរឡើង។ ខ្ញុំក៏សង្ឃឹមថា គ្រប់គ្នានឹងនៅតែបន្តគាំទ្រខ្ញុំ ហើយកុំភ្លេចពាក់ម៉ាស់ មើលថែសុខភាព និងជ្រើសរើសការរស់នៅក្នុងភាពរីករាយជារៀងរាល់ថ្ងៃ»៕