.jpg)
លោក ហួរ សុបិន ជានិស្សិតរៀនជំនាញពេទ្យមានទេពកោសល្យសិល្បៈគំនូរបានទទួលចំណាត់ថ្នាក់ទី ២។ រូប Hour Soben
ភ្នំពេញៈ ទោះបីជាសព្វថ្ងៃ ខ្លួនជានិស្សិតកំពុងតែចាប់យកការសិក្សាជំនាញគិលានុបដ្ឋាកមែនក្តី តែទេពកោសល្យជាដុងពីកំណើតបូកផ្សំនឹងការធ្លាប់ចូលរៀនសិល្បៈវិចិត្រកម្មតិចតួចកាលនៅរៀនវិទ្យាល័យនោះ បន្តជំរុញអ្វីជាចំណូលចិត្តរបស់លោក ហួរ សុបិន ចាប់ជក់គំនូរមកគូរវាសស្នាដៃសិល្បៈខ្លួនដាក់ចូលរួមប្រកួតរហូតឈ្នះការប្រកួតប្រជែងទេពកោសល្យគំនូរប្រចាំឆ្នាំ ២០១៨។
លោក ហួរ សុបិន ជានិស្សិតរៀនជំនាញគិលានុបដ្ឋាកឆ្នាំទី ២ នៃសាកលវិទ្យាវិទ្យាសាស្ត្រសុខាភិបាលមានវ័យ ២១ ឆ្នាំមានស្រុកកំណើតពីក្រុងសៀមរាបបង្ហើបប្រាប់ពីហេតុផលដែលខ្លួនរៀនពេទ្យ តែបែរជាមានចំណូលចិត្តផ្នែកវិចិត្រកម្មទៅវិញនោះថា៖ «អាចនិយាយជាដុងសិល្បៈ ដែលមានតាំងពីកាលខ្ញុំរៀននៅថ្នាក់ទី ១១ វិទ្យាល័យក្នុងខេត្តសៀមរាបដោយសារខ្ញុំធ្លាប់បានចូលរៀនវគ្គសិល្បៈគូររូបខ្លីៗពីសាលាសិល្បៈឈ្មោះថា Colors of Cambodia ដែលបច្ចុប្បន្ននេះបានក្លាយទៅជាអង្គការមួយស្របច្បាប់នៅកម្ពុជាដោយមានគោលដៅសំខាន់គឺជួយបង្រៀនកុមារឲ្យចេះជំនាញផ្នែកគំនូរតាមចំណូលចិត្ត ហើយសាលានេះក៏ទទួលយកនូវស្នាដៃរបស់កុមារគូរមកលក់បានប្រាក់ជួយឲ្យកុមារយកទៅប្រើប្រាស់សម្រាប់ការសិក្សារបស់ពួកគេ។ កាលពីខ្ញុំរៀននោះ បានតិចតួចណាស់ គឺគ្រាន់តែចេះគូរគំនូរប្រើខ្មៅដៃ ប្រើខ្មៅដៃពណ៌ និងគំនូរទឹកពណ៌តែប៉ុណ្ណោះ។
លោក ហួរ សុបិន ដែលមានបងប្អូនបង្កើត ៤ នាក់គឺសុទ្ធតែប្រុសនៅក្នុងគ្រួសារ មានជីវភាពមិនសូវធូរធារទេ ខណៈខ្លួនក៏មានបងប្រុសចេះជំនាញវិចិត្រកម្មនេះដែរ តែគាត់មិនបានចាប់យកធ្វើជាអាជីពប្រកបចិញ្ចឹមជីវិត ហើយសម្រាប់លោកជំនាញសិល្បៈគំនូរ និងពេទ្យគឺស្រឡាញ់ដូចគ្នា ទើបជាហេតុមិនអាចឲ្យលោកបោះចោលចំណែកណាមួយបាន។
គំនូរចម្លាក់ព្រះនាងជ័យរាជទេវី ដែលជាប្អូនស្រីរបស់ព្រះនាងឥន្ទ្រទេវី និងជាមហេសីទី ១ របស់ព្រះបាទជ័យវរ្ម័នទី ៧។ រូបថត Hour Soben
វិចិត្រករទើបតែឈ្នះប្រកួតប្រជែងទេពកោសល្យគំនូរលើកដំបូងនៅកម្ពុជាឆ្នាំ ២០១៨ (Kbach Artist Competition 2018) ដែលកំពុងតែរៀនជំនាញគិលានុបដ្ឋាកនៅសាកលវិទ្យាល័យវិទ្យាសាស្ត្រសុខាភិបាលឆ្នាំទី ២ រូបនេះបានប្រាប់ពីគោលដៅសម្រាប់អនាគតដែរថា៖ «ក្រោយពីទទួលរង្វាន់ផ្នែកសិល្បៈឆ្នាំ ២០១៨ កន្លងមកនោះ ខ្ញុំក៏មានត្រៀមស្នាដៃគំនូរនានាសម្រាប់ការបើកតាំងពិព័រណ៍នៅចុងឆ្នាំ ២០១៩ នេះផងដែរនៅវិចិត្រសាល Kbach Gallery ខណៈស្នាដៃខ្ញុំភាគច្រើនលើកយកពីគុណសម្បត្តិរបស់ព្រះនាងជ័យរាជទេវី ជាប្អូនស្រីរបស់ព្រះនាងឥន្ទ្រទេវី និងជាមហេសីទី ១ របស់ព្រះបាទជ័យវរ្ម័នទី ៧ ដែលជាមហាក្សត្រខ្មែរនៅសម័យអង្គរ។ ចំណែកការរៀនចប់ជំនាញពេទ្យវិញនោះគឺខ្ញុំមានបំណងនឹងបន្តការសិក្សាកម្រិតថ្នាក់បរិញ្ញាបត្រជាន់ខ្ពស់ណាមួយដែលមានភាពពាក់ព័ន្ធគ្នាទាំងវិស័យវិចិត្រកម្ម និងវិស័យសុខាភិបាល (ផ្នែកគិលានុបដ្ឋាក) ផងដែរដោយសារខ្ញុំបានឮគ្រូខ្ញុំប្រាប់ថា ដូចជាមានមុខវិជ្ជាខ្លះអាចមានទំនាក់ទំនងគ្នារវាងសិល្បៈ និងសុខាភិបាលនេះ»៕
គំនូរចម្លាក់ព្រះនាងជ័យរាជទេវី ដែលជាប្អូនស្រីរបស់ព្រះនាងឥន្ទ្រទេវី និងជាមហេសីទី ១ របស់ព្រះបាទជ័យវរ្ម័នទី ៧។ រូបថត Hour Soben
