ភ្នំពេញ៖ ដោយសារមានគោលបំណងចង់បង្កើនចំនួនធនធានមនុស្ស ផ្នែកផលិតភាពយន្តជំនាន់ថ្មី មជ្ឈមណ្ឌលបើកវគ្គបណ្តុះបណ្តាលផ្នែកផលិតភាពយន្ត និងពហុប្រព័ន្ធផ្សព្វផ្សាយនៃគម្រោងដែលស្តីពី«ការអភិរក្សសត្វដំរី និងបទពិសោធរបស់ជនជាតិដើមភាគតិចនៅប្រទេសកម្ពុជា ការផ្តោតការយកចិត្តទុកដាក់លើបរិស្ថានតាមរយៈការបង្កើតភាពយន្ត» សម្រាប់ក្រុមនិស្សិតជំនាន់ទី៥ របស់ខ្លួន ដែលបានទទួលវិញ្ញាបនបត្របញ្ចប់វគ្គបណ្ដុះបណ្ដាល កាលពីថ្ងៃទី ២២ ខែ មករា ឆ្នាំ ២០២១ ចំនួន ១២ រូប (ស្រី ៤ និងប្រុស ៨)។
គម្រោង «ការអភិរក្សសត្វដំរី និងបទពិសោធរបស់ជនជាតិដើមភាគតិចនៅកម្ពុជា ជាការផ្តោតការយកចិត្តទុកដាក់លើបរិស្ថាន តាមរយៈការបង្កើតភាពយន្ត» ទទួលបានមូលនិធិពី Arts and Humanities Research Council អនុវត្តដោយមជ្ឈមណ្ឌលបុប្ផាណា សហការជាមួយសាកលវិទ្យាល័យ Bath សាកលវិទ្យាល័យ Leeds សាកលវិទ្យាល័យ Queen''s University Belfast និងអង្គការថែរក្សាសត្វដំរី ជីវភាពរស់នៅ កិច្ចផ្ដួចផ្ដើម និងបរិស្ថាន (ELIE)។
បើតាមលោក ចេង រតនា មន្ត្រីផ្នែកទំនាក់ទំនង និងព្រឹត្តិការណ៍វប្បធម៌ នៃមជ្ឈមណ្ឌលបុប្ផាណា បានឱ្យដឹងពីគោលបំណង និងចំនួននិស្សិតបញ្ចប់វគ្គនៅជំនាន់ទី៣នៅបុប្ផាណាថា៖ «បន្ទាប់ពីអស់រយៈពេល ១២ ខែ សិក្ខាកាមទាំងអស់ បានបញ្ចប់ដោយជោគជ័យនូវវគ្គបណ្ដុះបណ្ដាល របស់ពួកគេ ប្រកបដោយជំនាញ និងបទពិសោធយ៉ាងច្រើន ព្រមទាំងបានសម្រេចចេញជាភាពយន្តឯកសារចំនួន ៣ រឿង ក្រោមប្រធានបទនៃគម្រោង ដែលនឹងបន្តផ្សព្វផ្សាយឱ្យកាន់តែទូលំទូលាយថែមទៀតទៅកាន់សាធារណជនក្នុងពេលដ៏ខ្លីខាងមុខ។ សំខាន់គឺចង់ឱ្យមានធនធានផ្នែកផលិតកុននេះច្រើនជាមនុស្សជំនាន់ថ្មី»។
សម្រាប់ពិធីប្រគល់វិញ្ញាបនបត្រនេះ ប្រព្រឹត្តទៅក្រោមអធិបតីភាពលោក ហាប់ ទូច រដ្ឋលេខាធិការក្រសួងវប្បធម៌ និងវិចិត្រសិល្បៈ លោក នេត្រ ភក្ត្រា រដ្ឋលេខាធិការក្រសួងបរិស្ថាន លោកស្រី Jemma Bullock ជាតំណាងនៃអង្គការថែរក្សាសត្វដំរី ជីវភាពរស់នៅ កិច្ចផ្ដួចផ្ដើម និងបរិស្ថាន និងលោក ជា សុភាព នាយកប្រតិបត្តិមជ្ឈមណ្ឌលបុប្ផាណា តំណាងស្ថានទូត តំណាងអង្គការ សារព័ត៌មាន និងមានសមិទ្ធករកុនជាច្រើនរូប។
គួរបញ្ជាក់ដែរថា ភាពយន្តឯកសារស្តីពីការអភិរក្សសត្វដំរី និងបទពិសោធរបស់ជនជាតិដើមភាគតិចនៅកម្ពុជា ចំនួន ៣ រឿងនោះ រួមមានរឿង «My Home» រឿង «ដានស្រអាប់» និងរឿង «មរតក»៕