.jpg)
គំនូរទឹកពណ៌រូបអប្សរាសិចស៊ីស្នាដៃរបស់វិចិត្រករស្រី សុគន្ធ កណ្ណិកា។ រូបថត ILLUSKA PAGE
ភ្នំពេញ៖ ក្រោយពីសាកល្បងប្រើជំនាញតាមចំណូលចិត្តគូរវាសជាគំនូរប្លែកៗចម្រុះមុខងារតាមអារម្មណ៍របស់ខ្លួនប្រមាណជាជិត ២ ឆ្នាំ និងទទួលបានការចាប់អារម្មណ៍ខ្លាំងរយៈពេលមួយឆ្នាំចុងក្រោយក៏ជំរុញចិត្តនារីម្នាក់ ដែលមិនបានរៀនជំនាញសិល្បៈគំនូរសោះ ក៏ក្លាយជាវិចិត្រករស្រីជំនាញគំនូរពណ៌ទឹក និងគំនូរឌីជីថល និងសុខចិត្តចោលជំនាញរៀនសេដ្ឋកិច្ច និងពាណិជ្ជកម្ម។
កញ្ញា សុគន្ធ កណ្ណិកា វ័យ ២៩ ឆ្នាំ អតីតជានិស្សិតរៀនចប់ជំនាញសេដ្ឋកិច្ច និងពាណិជ្ជកម្មពីសាកលវិទ្យាល័យជាតិគ្រប់គ្រង (NUM) បានសម្រេចចិត្តមកប្រកបរបរជាវិចិត្រករគំនូរទឹកពណ៌ និងគំនូរឌីជីថល នារយៈពេលប្រមាណជាង ១ ឆ្នាំចុងក្រោយនេះ ដោយសារស្នាដៃរបស់ខ្លួនទទួលបានការចាប់អារម្មណ៍ពីមហាជន ក៏ដូចជាមានអ្នកនិយមស្នាដៃគំនូរបានជាវច្រើនគួរឲ្យកត់សម្គាល់ ហើយក៏អាចចាប់យកជារបរចិញ្ចឹមជីវិតបាន។
កញ្ញា សុគន្ធ កណ្ណិកា ដែលមានទេពកោសល្យពីកំណើតខាងសិល្បៈ តែមិនបានចាប់យកតាំងពីពេលដំបូងមកពីព្រោះជាជំនាញមិនសូវទទួលបានការគាំទ្រនោះបានឲ្យដឹងពីការសុខចិត្តបោះបង់ចោលជំនាញសេដ្ឋកិច្ច និងពាណិជ្ជ មកស្រាវជ្រាវ រៀនស្វែងយល់ពីសិល្បៈគំនូរជាចំណូលចិត្តដោយខ្លួនឯងគ្មានគ្រូ និងគ្មានបានរៀនពីកម្មវិធីវីដេអូ YouTube នោះថា៖ «បើនិយាយទៅជំនាញគំនូរនេះ នាងខ្ញុំមិនបានរៀននៅសាលាណានោះទេ ហើយក៏មិនបានរៀនតាមកម្មវិធីរបស់ YouTube អ្វីដែរ គឺគ្រាន់តែជាការដកស្រង់យកបទពិសោធន៍ដោយខ្លួនឯងប្រមាណជាង ១ ឆ្នាំ ទៅលើការបង្កើតស្នាដៃគំនូរ ដែលភាគច្រើនទាមទារឲ្យនាងខ្ញុំប្រើអារម្មណ៍ស្រមើស្រមៃគិតផ្តោតខ្លាំងទៅនឹងរូបភាពណាមួយ ដែលនាងខ្ញុំនឹកឃើញចង់គូរ ទោះបីជា វាជាប្រភេទគំនូរទឹកពណ៌ក្តី និងគំនូរឌីជីថលក្តី។ ដូច្នេះហើយស្នាដៃគំនូររបស់នាងខ្ញុំភាគច្រើនកើតចេញពីការស្រមៃគិត ប្រើអារម្មណ៍បង្កើតជាគំនូរមក»។
វិចិត្រករស្រី កណ្ណិកា និងស៊ុមសម្រាប់ដាក់ផ្ទាំងគំនូរ។ រូបថត ILLUSKA PAGE
យ៉ាងណាការប្រកបរបរជាវិចិត្រករនាសម័យនេះ គឺទាមទារការគាំទ្រដែលអ្នកនិយមស្នាដៃគំនូរ និងជាប្រភពនៃការរកប្រាក់ចំណូលចិញ្ចឹមជីវិតបាននោះ ទើបវិចិត្រករស្រីស្រស់សោភា ក៏ទទួលយកការកុម្ម៉ង់ពីអតិថិជនសម្រាប់ស្នាដៃគំនូរចូលចិត្តរបស់ពួកគេផងដែរ។
កញ្ញា កណ្ណិកា បង្ហើបថា៖ «បច្ចុប្បន្ននេះ នាងខ្ញុំទទួលការកុម្ម៉ង់ពីអតិថិជនច្រើន ហើយថ្មីៗនេះ ក៏មានកិច្ចព្រមព្រៀងជាមួយនឹង Art Gallery នៅក្រៅប្រទេស ១ សម្រាប់យកស្នាដៃគំនូររបស់នាងខ្ញុំ ទៅដាក់តាំងលក់ផងដែរ។
ដោយសារតែយើង នៅមិនទាន់បានឈានដល់កិច្ចព្រមព្រៀង ១០០ ភាគរយ ពីសំណាក់ខាងនាងខ្ញុំព្រោះថា ខ្ញុំត្រូវការគិតពីទំហំនៃការងារមួយនេះ ឲ្យបានច្បាស់លាស់សិននោះ សុំមិនទាន់ជម្រាបប្រាប់អំពីដៃគូក្រៅប្រទេសនោះឡើយ។ ចាំដល់ពេលការងារចប់សព្វគ្រប់នោះ នាងខ្ញុំនឹងបង្ហាញឈ្មោះដៃគូ Art Gallery ក្រៅប្រទេសនោះជាមិនខាន»។
ស្នាដៃគំនូរជាច្រើនរបស់ កញ្ញា សុគន្ធ កណ្ណិកា តែងតែទទួលបានការសរសើរពីទេពកោសល្យពីមហាជន ជាតិ និងអន្តរជាតិ តាមរយៈរូបភាពគំនូរប្លែកៗ គំនូរបែបច្នៃប្រឌិតជាពិសេស រូបអប្សរាសិចស៊ី ដកស្រង់ចេញពីចម្លាក់តាមជញ្ជាំងប្រាសាទបុរាណខ្មែរ ព្រមទាំងរូបគូរឡើងវិញនូវគំនូរចាស់ ដែលបាត់បង់ពណ៌ដើមផ្សេងទៀត។
ចំពោះស្នាដៃគំនូររបស់កញ្ញា កណ្ណិកា វិញមានតម្លៃផ្សេងៗគ្នាទៅតាមទំហំ និងការកុម្ម៉ង់របស់អ្នកជាវ ខណៈសម្រាប់គំនូរទឹកពណ៌ ឬគំនូរឌីជីថលធម្មតាក្នុងខ្នាត A4 មានតម្លៃ ៤៥ ដុល្លារ ដែលត្រូវការពេលគូរ ១ ព្រឹក ឬ ១ ថ្ងៃទើបចប់៕
វីដេអូ៖
